Kerak Nerako
Oleh Wak Amin
Cerbung Musi Bebanyu (23)
LUM sempet Ningsih, Yuli dan Olis, beganti baju, sudah
disambut dengan siraman rohani. Panitia ‘Pisah Sambut Siswa Baru dan Lama’
siswa es em a ini nampilke penceramah top, namonyo Ustad Cecep.Masih mudo,
belagak pulo. Bodi bagus, gemuk idak, kurus jugo idak. Tinggi semampai, pasla
buat ukuran lanang jaman mak ini.
Eheeem …
“Assalamualaikum warohamtullahi wabarokatuh …” Ucap Ustad
Cecep dengan suaro lantang. Nyaringla cak itu.
“Waalaikum salam,” jawab yang hadir serempak.
“Makmano, la lapar lum?”
“Luuuuum …”
“Niyan apo. Jangan bohongi aku … Beduso besak kau embohongi
ustad, tau dak.”
Hadirin saling bebisik.
“Aku tanyo lagi yo.
Jawab dengan jujur. La lapar lum?”
“Lapaaaar.”
“Na mak itu. Soalnyo ustad jugo lapar. Tapi dak pacak
ngomongkenyo. Panitia lum nyuruh makan. “
Ngeraso disindir, panitia berseragam serbo putih, cuman
pacak nyengir bae.
Kagek sakit ustad …
Laju dak pacak ceramah lagi …
Cak keiyo niyan …
“Baiklah hadirin sekalian. Arini aku dak becerito duken.
Galak dak kiro-kiro endengernyo?”
“Galaaak …”
“Mak ini ceritonyo. Ado uwong nanyo, makmano benyanyitu.
Boleh apo idak. Na, ustad tanyo balik ke dio. Awakni nak nguji apo betanyo
niyan. Dijawab oleh si betanyo tadi, memang nak betanyo niyan. Dahtu ustad
tanyo lagi, apo dasar awak betanyo soal nyanyitu. Dio jawab, ustad, aku
kepingin jadi penyanyi.”
Seru caknyotu ustad …
Buka’la galo-galo …
Biar tau galo …
“Terus, ustad tanyo lagi samo budaktu. Ngapo kau nak jadi
penyanyi. Apo dak katik gawean lain selain benyanyi. Apo jawabnyo? Nak tau dak
…?”
“Nak tauuuuu …”
“Jawab wong taditu, mudah nyari duit. Sekali nyanyi ratusan
ribu dapet, itu paling kecik. Kalau lagi mujur, besak cetukannyo, pacak ratusan
juta. Na, kalike bae ustad. Sebulan sepuluh kali nyanyi, la berapo dapet duit.
Bandingkela kalu misalnyo, aku beniago. Untung sehari paling banyak sepuluh dua
puluh ribu rupiah. Lum dipotong pajak, sebulan paling tigo ratus ribu rupiah.
Lum temasuk duit rokok dan tetek bengek lainnyo …”
“Ni budak, tau jugo di duit ruponyo, ujiku di jeru ati bae
.”
Ha ha ha ha …
Ustad Cecep ketawo.
Yang lain pado ketawo galo …
“Itu namonyo apola? Ustad Cecep ngelemparke pertanyaan ke
hadirin.
Diem galo-galo.
“Pengen lemak, begawe dak galak …”
Ha ha ha ha …
Singkat ceritonyo, kato Ustad Cecep, dengan wong lanang
taditu kumongke bahwa siapo bae nak benyanyi, please. Silakan. Boleh bae,
asalke meloki aturan …
“Aturan makmano? Yo, caro bepakaian misalnyo. Harus sopan.
Kalu betino, yo nutupi aurat. Dak boleh kejingokan, apolagi sengajo dijingokke,
buka’-buka’an cak itu. Berok pendek. Kapan nunggit, masya Allah, kejingokan kue
lapisnyo …”
Ha ha ha ha …
Memang yang mak itu dicari, ustad …
Lemak nyeliknyo …
Make’nyo jugo …
Ilang stres kito …
“Jadi saudara-saudara dan adik-adikku sekalian. Dak katik
larangan kamu-kamuni nak benyanyi. Asalke, yo itu tadi. Jangan macam-macam.
Bepakaianla yang sopan, lagu yang dibawakke bagus, bukan jorok dan ngajak wong
ke jalan dak bener. .. Eeeem .. sampe sini, paham dak maksudnyo?”
“Setengaaaah, ustad.” Kato lanang berambut lurus.
“Setengahnyo lagi apo?”
“Batasannyo ustad. Yang dak bolehtu makmano, yang bolehtu
makmano niyan. Masih lum jelas.”
“Ooo mak itu. Sebelum ustad jawab, kito enjuk adik atau
kakakmu ini tepuk tangan duken.”
Plak .. plak … plak … plak …
“Jadi adik-adikku sekalian. Islam membolehkan siapo bae nak
benyanyi. Tegasnyo, dak katik yang ngela rang kamu benyanyi. Di kamar mandi
boleh, dimano bae. Asalke dak dicampur dengan omongan kotor, cabul dan lainnyo
yang dapat mengarah kepada perbuatan duso …”
Ustad Cecep enjingok jam.
“Sampe mano tadi? Tanyo Ustad Cecep.
“Perbuatan dusooo …”
“Na itu … Kalu misalnyo, kito benyanyi, lalu diringi musik,
dak apo-apo. Bagus. Asalke musik taditu
dak sape embangkitke nafsu syahwat … “
Malah, katoU stad Cecep, disunatke dalam keadaan riang
gembira, ngibur ati. Kapan? Waktu ari rayo, ngantenke anak, kedatangan orang
yang la lamo dak kalo datang, walimah, aqiqah atau waktu lahirnyo seorang bayi.
“Makmano yang endengernyo ustad?”
“Maksudnyo, boleh apo idak, cak itu?”
“Kiro-kiro cak itula, ustad …”
La jelas bolehla …
Buat apo nyanyo kalu dak katik penonton …
Samo bae bo’ong …
Mulut bebuih, duit
tak boleh …
“Jawaban ustad mak ini ..” Uji Ustad cecep tesenyum dikit.
“Barang siapo endengerke nyanyian dengan niat untuk membantu
maksiat kepada Allah Taala, maka jelas yang bersangkutan adalah fasik.
Sebaliknyo, barang siapo beniat untuk ngehibur ati agar pacak berbakti kepada
Allah SWT, dan tangkas dalam bebuat kebaikan, maka yang bersangkutan adalah
orang yang taat dan bebuat baik serta perbuatannya masuk perbuatan yang benar.”
Ustad Cecep narik nafas denget.
“Bagi siapo bae yang dak katik niat taat kepada Allah, jugo
idak untuk bemaksiat, maka perbuatannyo dianggap penesan bae yang tentunyo di bolehkela.
Samo misalnyo, kito pegi ke kebon untuk belibur,” jelas Ustad Cecep.
“Makmano dengan bejoget, ustad?” Tanyo wali murid, serius
niyan nanyonyo.
“Untuk joget alias lenggang, kato Ustad Cecep, samo jugo.
Samo dalam reti ado yang dibolehke, ado jugo yang idak dibolehke. Lantas, makmano niyan yang dak dibolehketu,
ustad?”
“Yang secara sengajo bejoget agar nafsu kito bangkit,
nimbulke fitnah dan perbuatan ca …”
“Luuuuk …” Teriak siswa baru.
Hayaaa …
Ketawo galo …
“Caaaa …” Ustad Cecep
nunggu hadirin ngomong.
“Buuuuul.”
“Betul .. betul. Seratus untuk kamu galo-galo …”
“Terus ustad, makmanola sikap kito kalu idak bener
nyanyinyo?” Tanyo betino bekerudung, mancung ke luar idungnyo.
Kalu nyanyiannyotu pacak embangkitke nafsu, jelas Ustad
Cecep, dan nimbulke fitnah serta nafsu kebinatangannya pacak ngalahke sisi
rohaniahnyo, “Minimal kito ngehindarinyo. Jangan endeket, apolagi sampe melok
nyanyi samo begoyang …”
“Ngapo mak itu, ustad?”
“Ancur galo-galo …” Jawab Ustad Cecep.
“Apo maksudnyo, ustad, ancur galo-galotu ?” Gantian Bu Guru
yang betanyo, sambil nunjuk tapi jari telunjuknyo begoyang-goyang, mungkin la
kelaperan.
“Dak boleh pahalo, malah boleh duso. Di akherat sano gektu
jadi kerak …”
“Nasiiiii … Teriak siswa baru.
“Bukannyo nasi. Nasitula pikirannyo …”
Ha ha ha ha ..
“Tapi keraaak neee …”
“Rakoooooo …”
“Betul … betul …”
-------------------------------
Jangan Lupoke Dio
Oleh Wak Amin
Cerbung Musi Bebanyu (24)
SAMPE mano tadi,
Buk?”
Yang ditanyo ustad, betino tuwo, giginyo bae la ompong galo,
cuman senyum-senyum, lain dak.
“Dak endanger lagi, ustad. La pekak,” jawab ibu mudo di
sebelahnyo.
Ha ha ha ha …
“Sampe mano tadi, Pak?” Ustad Cecep nanyo ke lanang gendut,
duduk cak lagi saro niyan.
“Baru kilometer limo, ustad. Lum nyampe kilometer 12.”
Ha ha ha ha …
Ketawo galo. Kalu yang taditu pekak, lanang sikokni
ketidukan. Maklum baela, badan bae besak, segalonyo pasti nyenyaaak.
“Maaf ustad, ketidukan,” kato si lanang taditu malu ati.
Makonyo kalu makan jangan banyak igo …
Biar dak ngantuk …
Ngemalu wong lanang bae …
Dah dibisiki panitia, Ustad Cecep ngangguk. Dio senyum libar
dengan yang hadir.
“Ustad lanjutke dengan pacaran. Kito sekalini ngomong soal
ngepek-ngepekan. Makmano, galak dak kiro-kiro?”
“Galaaak.” Serempak
siswa lamo en baru ngatoke galak sambil tegak. Baru duduk lagi setelah
dikongkon duduk oleh ustad.
“Payu kalu mak itu. Kito masuk ke sesi pacaran. Sebelum
ngomong lebih lanjut, aku nak nanyo duken. Boleh dak?”
“Boleeeeh.”
Ustad Cecep ngarahke rainyo ke siswa betino. Anehnyo, nunduk
galo-galo. Nunduk sambil bebisik. Takut kalu gektu ditunjuk ustad, dikongkon
ngomong soal pacaran.
Iyola niyan …
Yang keno kongkon siswi yang duduk paling kiri. Dikongkon
tegak ngadepke rai ke depan, nyingok hadirin.
“Cubo adik ceritoke, dak pacak banyak dikit jadila, tentang
apa itu pacaran …. Silake ..!”
Asyik …
Yang ngomong cantiiiik …
Kalu nurut aku, ustad, kato siswi berambut lurus ini,
pacarantu serbo bedua’an. Jalan dua’an, makan dua’an, cuman tiduk bae dakdo
dua’an. Terus curhat-curhatan, sisip dikit belajuan …
Ha ha ha ha ..
Pengalaman caknyotu ..
Namonyo jugo budak mudo …
“Ngap biso mak itu, Dik?
“Karno kujingok seari-ari, waktu pacarantu memang mak itu,
ustad. Malah, kalu yang nekat, besepian. Beduwo bae. Padohal bapak samo emaknyo
la ngelarang, ustad …”
“Oke … oke,” kato Ustad Cecep. “Menurut kamu dewek,
makmanola bagusnyo pacarantu?”
“Kalu nurut aku, ustad ye, lemakla tembak langsung bae. Abis
pekaro …”
Cak kealiman bae …
Diotu uwong bukan umpan pelor …
Main tembak-tembak langsung bae …
“Jadi, dak usah pacar-pacaran lagi? Kagek nyesel. Dak tau
dilemak …”
Ketawo galo-galo.
“Kalu aku ustad, lemak dak lemak, nyesel dak nyesel, dak
usah lagila pacaran. Lanang ngesir, betino galak, langsung bae ngadep ke uwong
tuwo betino. Diterimo lamar, dak diterimo mundur teratur.”
Ha ha ha ha ...
“Tepuk tangan duken untuk adik kito yang cae’em ini,”pinta
Ustad Cecep kepada yang hadir, sebelum nyilake siswi bepakaian putih abu-abu
itu turun lambat-lambat dari pucuk panggung.
Plak … plak .. plak … plak …
Jadi, kato Ustad Cecep, saudara-saudaraku sekalian.
Bepacarantu sebaiknyo diganti bae dengan perkenalan. Bukan kenalan langsung
antaro gadis dan bujang. Bukan cak itu. Tapi kenalnyo lewat pihak ketiga yang
memang dipecayo.
“Ngapo mesti nak mak itu, Ustad?”
“Kalu kenal langsung, ditakutke kenyanya’an. Yang namonyo
langsung, dienjuk buntut, laju nak paho. Betul dak?”
“Betuuuul …”Kato siswa betino serempak.
“Salaaah …” kata siswa lanang.
“Arini betemu mato, besoknyo ngajak jalan. Duduk di taman,
bemotor boncengan. Dahtu …”
Hadirin diem.
“Bibir bekenoan, ustad,” jawab siswa bekepalak gundul.
“Pecah perawan, ustad.” Simbat yang lain sambil ketawo
ditahan.
“Hussyy. Dak boleh mak itu. Marah gek uwong tuwo,” tegur
wali murid bebadan kecik item legem.
Na, ujar Ustad Cecep, kito dak tau apo yang bakal terjadi
kemudian. Jangankan kito, uwong tuwonyo bae dak tau kalu anaknyo cak itu. Kalu
tau pasti dilarangnyo.
“Bener dak?”
“Bener, ustad.”
“La besak perutni baru ngomong ke uwong tuwo, sambil
nangis-nangis pulo. Bener dak?”
Dak ado yang enjawab.
“Bener ustad.” Tibo-tibo salah sikok siswa betino emberanike
ngomong.
“Kalu la cak itu, ustad ye,” kato siswi taditu, “Yang
disalahke pastila betino. Ngapo dibiarke tebukak.”
Ha ha ha ha …
“Tebukak aponyo” Tanyo ustad sambil embetulke letak
kopiahnyo.
“Barang beregotu ustad. Namonyo lanang, dikit bae
dilanjakke, apolagi bukak banyak …”
Ha ha ha ha …
Mati kito …
Masih budak la tau galo …
Apo dak anyut jadinyo …
“Seharusnyo ye ustad,” masih kato siswi tadi tula, “Lanang
jugo harusnyo disalahke. Terus terang ustad. Sebagai betino aku kesiyan nyelik
kaumku dimak ituke. La sakit, dibuat morat-marit …”
Kasiyan deh lu …
Cubola dulu samo aku …
Dakke sampe mak itu …
Ustad Cecep nyelik jam lagi. Dio minum denget. Aus niyan
pecaknyo. Yo namonyo jugo ceramah, pastila, dak aus, laper, atau suaro abis …
Ahai …
“Sampe mano taditu?”
“La sakit, dibuat morat-marit, ustad,” kato siswi bebadan
kurus tapi belagak caro dio bepakaian.
“Na, itula akibatnyo. La kembung perut, baru nangis. Nyesel.
Ngapo waktu kempes dulutu dak nangis.
Karno lum dicubo …”
Ustad Cecep merhatike sikok-sikok dari jauh siswa betino.
“Jadi adik-adik yang betino. Ati-ati jago diri. Sebab, yang
namonyo lanang nak lemaktula. Rasan nak lemak, saro dak galak. Bener dak?”
“Beneeer,” jawab siswa betino serempak.
“Apola sebabnya mak itu? Karno lanang bukan betino. Titik.
Jadi dio dak tau dan ngalami apo itu menstruasi, apo itu hamil. Nah, yang
betino?”
La bunting …
Salah dikit, laki embanting …
Apo dak pening bin pusing …
Tapi, kato Ustad Cecep, telepas betino yang paling banyak
nanggung akibatnyo, bepacaranla yang benar. Makmanola yang benertu? Adi tigo,
dindo-dindo yang cindo …
Apo bae?
Pertamo, idak melanggar perintah Allah SWT. “Ini yang
pertamo.”
Nah, yang keduwo, inget selalu kepada yang nyiptake kito.
“Ini yang keduwo … “
Ketigo, libatkela selalu uwong tuwo kito, saudara-saudara,
sanak kerabat kito. “Temasukla uwong yang lebih mudo atau tuwo dari kito … “
--------------------------
Nyium Bauk Surgo
Oleh Wak Amin
Cerbung Musi Bebanyu (25)
“SAMPE mano taditu?”
“Libatkan selalu wong tuwooo.” Serempak hadirin ngomong
sambil senyum-senyum ketawo.
“Nak terus apo idak?”
“Teruuuus …”
“Nak terus apo makan?”
“Makaaaan.”
Galo-galo ketawo.
“Kato panitia le kepalang tanggung ustad. Abiskela duken,
baru kito makan samo-samo …”
Hadirin bisik-bisik bae.
“Lanjut?”
“Lanjuuuut …”
“Baikla saudara-saudara sekalian. Ini yang terakhir,
buncitan.” Ustad Cecep nyelik jam lagi. Nyingok hadirin pecak gembira galo.
Namonyo perut ustad …
Apo yang dijingok dak lagi pasaaaat …
“Kapanla terakhir berarti sudahni maaa …”
“Makaaaan …”
Sampe kenyang …
Apo yang terakhir ini, kato Ustad Cecep dengan nada suaro
agak dinyaringke supayo dak lesu yang endengarnyo, caro endidik anak.
Makmano?
Pertamo, kata sang ustad, parakke dio dengan Tuhan. Keduwo,
tanamkan selalu bebuat baik kepada sesamo. Ketiga, hormati yang lebih tuwo,
sayangi yang lebih mudo, dan ayomila yang seumur dengan kito.
“Apo maksud parakke dengan Tuhan?”
Maksudnyo, kato Ustad Cecep, tanamkan iman dan takwa,
beribadah dengan ikhlas hanya kepada Allah SWT. Jauhi larangan dan teladanila
Rasulullah SAW.
“Ini idak, yang ditiru Michael Jackson, David Beckham dan
yang lain-lain. Kadangtu waktu ditanyo ngapo niru si tuwotu, apo jawabnyo.
Melok-melok bae …”
Ha ha ha ha …
“Apo dak ancur dunio …”
Seharusnyo, “Yang kito tirutu … siapo?” Tanyo Ustad Cecep.
“ Mick Jaggeeeer …” Teriak siswa yang bekelamin lanang.
“James Booooond,” simbat siswi yang duduk di urutan tengah.
“Mati kito … Pacak kelebu kalu mak ini …” uji Ustad Cecep.
Namonyo budak mudo …
Galo-galonyo cak nak dio …
Dak mikirke akibatnyo …
“Ustad ulangi yo. Siapo yang harus kito meloki dan contoh?”
“Rasulullah,” jawab wali murid bebaju putih tangan panjang,
bekopiah item lamo.
“Naaa … itu baru klop namonyo.”
Ngapo kito katoke klop, karno beliautu adalah junjungan
kito. Utusan Allah. Punya akhlak dan budi pekerti yang mulia, serta nabi yang
terakhir.
“Sampe sini paham dak?”
“Paham ustaaad …”
Niyan apo …
Gek ditanyo dak tau …
Namonyotu purak-purak dak tau …
“Kalu mak itu, kito lanjutke lagi yang keduwo …”
Teng … teng .. teng …
Lonceng jam bebunyi duo belas kali. Tando jam dua belas siang.
“Apo yang keduwo?
Selalu bebuat baik kpeada sesamo. Apo retinyo? Retinyotu galak nulung
uwong. Idak berat tangan, idak kikir dan idak …”
“Sombong,” simbat siswa berambut potongan cepak.
“Betul … betul …”
Kalu kito galak nulung uwong, gektu kito ditolong Tuhan.
Sebaliknyo, kalu kito dak galak nulung uwong,
Yang Kuaso dak bakalan nulung kito …
“Paham?”
“Pahaaaam …”
“Perlu contoh dak?”
“Dak perluuuu …”
“Perlu ustaaad …”
Supayo adil, Ustad Cecep nanyo lagi.
“Perlu contoh dak?”
“Perluuu …:
“Na, mak itu. Harus kompak supayo rezeki kito tambah banyak
…”
Apo contohnyo? Mudah bae. Ado kawan sekelas kito buntu. Dak
katik niyan duit sepeser pun untuk embayar duit SPP. Nemui kito, nak minjem
duit.
“Makmano. Ditulung apo idak?”
“Dituluuuung …”
“Gratis apo mintak balikke pinjamantu gek …?”
“Balikkeeee …” Jawab siswa serempak.
“Kapan-kapan bae …” Uji guru betino sambil ketawo geli.
“Bagus. Bagus galo jawabannyo adik-adik dan ibuk-ibuk
sekalian. Tapi yang lebih bagus lagi kalu kito enjukke bae duittu sebagai
sedekah, bukannyo pinjaman. Ngapo?”
Duit kito dak katik lagi ustad …
Husss, peritungan niyan …
Yo namonyo duit …
Dak makan kalu dak ado duit …
“Pahalonyo besak niyan,” jelas Ustad Cecep, becepet nambahke
.. “Kalu idak, yo dak apo-apo, asalke bae dak kito batasi kapan utangtu pacak
dibalikke. Ngerti kiro-kiro?”
“Ngertiiiii …”
“Na, yang ketigo. Hormatila yang tuwo, sayangila yang lebih
mudo, dan ayomi yang seumur dengan kito. Perlu nak diterangke?”
“Perluuuu …”
“Jangan panjang igo, ustad.” Kato siswi berambut poni.
“Ngapo?”
“Perutni ustad. La be bunyi dari tadi. Kroook … kriukkk.
Krokk …”
Ketawo galo.
Ado-ado bae …
Perut bae bebunyi …
Apolagi yang bukan perut …
Pasti benyanyi …
Hi hi hi hi
“Payula kalu mak itu, ustad pendekke bae penjelasannyo …”
Apo pacak?
“Dengan uwong tuwo kito hormati. Jangan galak ngelawan.
Ujinyo jangan metu malem-malem, kamu metu … Apo gawe?”
“Llanang tula yang galak metutu, ustad.” Uji siswi bekulit putih
cak kapas.
“Betino jugo, ustad. Galak kelayapan malam. Dugem … Pegi
malem balik subuh.” Simbat siswa berambut keriting digulung, dak galak ngalah.
Ampir nak begocoh.
Priiiit … priiiit … priiiit …
“Sudah … sudah …” Beberapa ikok guru tepakso ngelerai,
nenangke lanang inoni. Malu samo uwong banyak kalu sampe begocoh.
Ustad Cecep tepakso turun panggung, melok nenangke. Alhamdulilla
h tenang. La pacak penesan dan ketawo-tawo lagi.
“Darah mudo. Panas galo-galo,” kato Ustad Cecep. “Makmano
nak endinginkenyo? Itula tugas kito samo-samo, terutamo uwong tuwo dan para guru
di sekolah …”
“Yang mudo harus pacak embawak diri, yang tuwo pacak
nyesuaike diri … Sampe sini ado yang masih nak ditanyoke?”
Diem galo-galo.
“Jadi kesimpulannyo, anak itu amanah dari Allah SWT kepada
kito selaku uwong tuwo. Harus dijago
baik-baik. Kalu idak …”
“Nagapo ustad?” Tanyo Pak Satpam sekolah yang lenak besiap
enjago meja makan besak.
“Kalu idak, kito dak bakalan biso nyium …”
“Betinooo …” Teriak siswa baru serempak.
“Bukan betino adik-adikku … Tapi nyium bauk sur …”
“Goooo …”
-----------------------------------
Payu Kito Balik
Oleh Wak Amin
Musi Bebanyu (26)
LEPAS salat zuhur bejamah yang diimami Ustad Cecep,
dilanjutke dengan acaro santap siang besamo.
Na, pas uwong, dak lanang dak betino, sedang lemak-lemaknyo
makan nasi kunyit panggang ayam,
Mamat en Lebay dikongkon naik panggung.
“Idup Ok om kito,” uji Ningsiih ngajak Olis samo Yuli
betepuk tangan nyemangati Mamat dan Lebay
supayo dak lemes gino waktu nyanyi gektu.
“Terimo kasih hadirin atas kesediannyo nerimo kami beduwoni.
Kami tegak disinini nak nyanyi, katik la in. Nyanyike apo. Lagu, la jelas.
Karya siiapo, Ismail Marzuki, la tentu. Judulnyo … “Selendang Sutera.”
Betepuk tangan galo.
Ado yang betepuk tangan pakek garpu, mukul lambat-lambat ke
piring. Ado yang nepak-nepak kursi. Ado
lagi yang narokke duken piring berisi nasi ke kursi, baru betepuk tangan.
Pokoknyo serula …
Mamat metik gitar samo anggota personil ben pengiring, Lebay
besiap metuke suaro emasnyo … Inila dio syair lagunyo …
“Selenda sutra
tanda mata darimu …
telah kutrima
sebulan
yang lalu …
Selendang
sutra
mulai di
saat itu
turut
serentak
di
dalam baktiku …
Ketika lenganku
terluka parah
selendang sutramu
turut
berjasa
Selendang sutra
kini pembalut
luka
cabik
semata
tercapai tujuannya … “
Abis Lebay, Mamat yang benyanyi. Beganti posisi. Kalu taditu
Mamat nyekel gitar, sekarang mikropon. Mak itu jugo mamang kito, Lebay. Kalu
taditu nyekel mikropon sambil nyanyi, sekarang nyekel gitar ngiringi konco
benyanyi.
“Terima kasih, terima kasih,”uji Mamat nanggepi tepuk tangan
siswo baru dan lamo yang baru berenti betepuk setelah dio ngomong mak ini …
“Izinkan saya nyumbangke sebuah tembang. Judulnyo …? Waduh,
maaf hadirin aku lupo niyan. “
Ha ha ha ha …
“Lum two la pelupo,” kato wali murid bekopiah putih. Saking
ngakaknyo ketawo lupo kalu pas ngangap giginyo la dak katik galo ruponyo …
Ompong niyeee …
Namonyo jugo la tuweee …
Idak ompong, rambut ditumbuhi uban ..
Irama musik melantun merdu. Satu … duwo .. tiii .. go.
Metula suaro emas Mamat.
“Terpujilah wahai engkau
ibu bapak guru …
namamu akan selalu
hidup
dalam sanubariku
…
Semua baktimu akan
kuukir
di dalam hatiku
s’bagai
prasasti trima kasihku
‘ntuk
pengabdianmu …
Engkau bagai
pelita
dalam
kegelapan
engkau
laksana embun
penyejuk
dalam kehausan …
Engkau
patriot pahlawan bangsa
tanpa
tanda jasa …”
Terakhir, sebelum turun panggung, Mamat en Lebay dikongkon
lagi nyanyo beduwo. Duet. Idak pacak nulak karno yang ngongkon bukan bae Ningsih dan konco-konconyo, tapi jugo para ibu- bapak guru temasukla wali
muridnyo jugo.
Apo judul lagunyo?
Ampar-ampar Pisang dan Dek Sangke.
Plak … plak … plak … plak …
“Selamat menikmati,” kato MC, lanang belagak tinggi
semampai.
Sambil nikmati semangko, kates, pisang ambon dan es krim,
Ningsih samo konco-konconyo dak berenti
muji penampilan Mamat en Lebay di
pucuk panggung. Dak kalah dengan penyanyi top …
Inila dio duet nyanyinyo …
Lagu pertamo …
“Ampar
ampar pisang
pisangku
belum masak
masak
sabigi
dihurung
bari-bari
masak
sabigi
dihurung
bari-bari …
Mangga lepk mangga lepo
patah kayu bengkok
bengkok dimakan api
apinya clang curupan
bengkok dimakan api
apinya clang
curupan …
Nang mana batis kutung
dikitipi
dawang
Nangmana batis
kutung
dikitipi dawang …”
Lagu keduwo …
“Dek sangke aku
dek sangke
awak tunak
ngaku juare
alamat badan ‘kan
sare
akhirnye
masuk penjare …
Dek sangke
ture sangke
ujiku lanang tak batanye tua bangke
anaknye
‘lah gadis gale
Dek
sangke gadis tegile
dek sangke ture dek sangke
cempedak
babuah nangke
dek sangke ture sangke
cempedak babuah nangke …
Dek sangke aku dek sangke
ujiku gadis tak batanye jande mude
anaknye ‘lah ade tige
Ddek sangke bujang tegile
Dek sangke ture
sangke
cempedak babuah
nangke
dek sangke ture
sangke
cempedak babuah nangka
….”
“Tambah sikok lagi oiii …” Pekik yang hadir. La besiap-siap
nak balik.
Bebisik denget dengan anggota personil ben pengiring. Daklamo
dak. Cuman dua puluh detik. Tedengerla lagu cak ini …
“ Gelang
sipaku gelang
gelang si rama-rama
mari pulang
marilah
pulang
marilah pulang
bersama-sama
Mari
pulang
marilah pulang
marilah pulang bersama-sama …”
----------------------------
Tidak ada komentar:
Posting Komentar