Entok (3)

Novel ...

Entok (3)
Oleh Wak Amin

5
JUT ... Juuut ...

"Wak Lung. Pancing kau ado yang narik," kato Wak Yeng. Ado brobokan. Terus tali pancing pecak begerak-gerak.

"Ai dakkenado," uji Wak Lung, raso dak cayo. Sebab, dio dewek yang tecuguk depan satang, dakdo ngeliyat apo-apo.

"Mano nak ngeliyat. Awak bae tekantuk-kantuk taditu," nyahut Wak Pet. Mulak'i kesel. La enam kali dibudike iwak.

Juuut ... Juuut ... Kapan ditarik dak katik iwaknyo. Umpannyo abis.

"Lambat-lambat bae Wak Lung," kato Wak Pet samo Wak Agus.

"Jangan maen-maen sentak bae tu. Salah sentak gek saro ..." Uji Wak Yeng. Betigo ngerewangi Wak Lung enjulurke satangnyo supayo pacak melok'i kemano tali pancing begerak.

"Besak caknyotu," kato Wak Pet. Amun dak patin pastila belido.

"Kalu dak belido?" Tanyo Wak Agus penasaran.

"Iwak bawung atau delek."

Ha ha ha ha ...

"Pokoknyo kalu dapet kito langsung balik. Bagi rato berempat," janji Wak Lung.

"Niyan apo?" Soalnyo, kato Wak Agus, iwak baru boleh sikok, mano cukupla nak dibagi berempat

"Kalu besak cukupla," simbat Wak Lung. "Aku basingnyola bae. Palak jadi, buntut lajuke. Asalke tetep iwak."

"Awas Wak ...!" Pekik Wak Pet. Dak pacak dak. Wak Lung mulak' masuk jeru banyu. Karno tali pancingnyo digawak ke tengah danau.

"Payu ... Rewangi oi iyo." Wak Lung kalang kabut jugo. Kalu ke tengah igo takutnyo ado buayo.

"Penakut igo awaktu," uji Wak Agus. "Jadi manusiotu jangan penakut igo. Saro idup kalu penakut .."

Ngeraso kesiyan nyelik Wak Lung bebasah-basah melok'i mato pan cingnyo, Wak Agus akhirnyo melok masuk jeru banyu. Nyusul pulo Wak Yeng samo Wak Pet.

Ampir parak ke  tengah, tibo-tibo tali pancing belok ke kiri. Nak minggir pecaknyo.

"Julurke bae Wak Lung," kato Wak Yeng. Sambil berenang, dio nyekel satang, dan alhamdulillah sampe darat.

Tali pancing dak begerak lagi. Tapi teraso berat.

Apola ye?

"Kito naik duken," saran Wak Pet. Becepet molompat. Sampe pucuk, tali pancing begerak-gerak lagi.

"Julurke bae Wak Lung. Kito pelok'i bae ..."

Wak Yeng ngongkon Wak Pet samo Wak Agus melok' Wak Lung dari buri. Lucu niyan enjingoknyo. Mecem beruk bejalan sikil sikok.

"Cepet Wak. Gek putus kalu lambat." Wak Yeng ngingetke. Agak ke ujung, dak katik lagi tepinyo. La terbis tanahnyo.

Untung bae tali pancing dak begerak lagi. Sepakat Wak berempatni narik satang lambat-lambat.

Satu ... Duwo .. Tiiii .. go.

Traaaash ...

Ha ha ha ha ...

Wak Yeng ketawo abis. Ruponyo sempak betino. Berat ditarik karno becampur lumpur.

Ngapo biso begerak-gerak?

"Peraso iwak besak. Cayo dak kamu betigo?" Wak Yeng ngeyakinke konco-konconyo.

"Cayo bae." Uji Wak Lung. Ketawo geli sambil enggiling-gilingke palak. Dak cayo mato pancingnyo diembat sempak.

Ha ha ha ha ...

"Mungkin bae kito dikongkon cepet-cepet nyari yang mudo," kelakar Wak Pet.

"Husssy ... Wak Pet. Yang tuwo nak dikemanoke?" Bales Wak Lung sambil ngedip-ngedipke mato cak wong kalilipan.

"Singitke bae jeru kotak..."

Ha ha ha ha ...

He he he he ...

6
"WAT? Apo dak salah denger akuni abahnyo?" Cek Lung ngengkeng sambil enggerak-gerakke lubang idungnyo.

"Idak salah denger dak Buk. Benerlatu. Aku jugo eran. Ngapo iwak melok puaso pulotu," uji Wak Lung. Biaso embela diri. Kalu bae bininyo langsung tediem. Dak marah lagi. Abis pekaro.

"Oi abahnyo .. Dimano-mano ye ... Dak katik yang namonyo iwak puaso. Yang ado tubuh yang lolo .."

"Jangan mak itutu Buk. Akuni dak lolo dak. Cuman dak tau bae ..."

"Apo bedanyo?" Cek Lung nyengirke rainyo. Bangso pempek la kutelen. "Ini uwong. Dakke muat dilungkungkuni."

"Bedala Buk. Kalu loloye ... Biar diajari tetep dak tau. Nah, kalu dak tautu, pas diajari pasti tau ..."

Ha ha ha ha ...

"Sudahla abahnyo. Jangan besak kelakar. Kalu buyan omongke bae buyan."

Wak Lung tediem. Mak itu jugo Cek Lung. Bukan apo-apo. Ngabiske uwong di mesjid. Ngebang Isya'.

Laaaa ... Ilaaaha illallah...

"Kito lanjutke lagi," kato Cek Lung.

"Batas mano taditu Bu?"

"Abah buyan."

Haaaa ...?

"Abah tau dak?"

"Idak. Yo namonyo idak dienjuk tau. Pastila dak tau."

Ha ha ha ha ...

"Apo kan uwong buyan ..."

Wak Lung cengar-cengir bae.

"Abah tau dak. Umpan roti samo dagingtu bemodal?"

Wak Lung senyum-senyum bae.

"Itutu pakek duitnyo anak kautu Sri Wedari. "

"Madak'i buk."

"Tanyola kalu dak cayo."

"Ibuk baela nanyonyo."

"Sri ... Sri ... Sri ...!" Tepaksola Cek  Lung yang manggil. Kenceng ni yan suwaronyo makkayo belis lomba lari seribu meter.

Sri yang baru bae selesai dari nge ringkeske cucian piring samo gelas, becepet nemui abah ibuknyo.

"Ado apo Bah, Buk?"

"Abahni nanyo. Makek duit kau kan yang ngawek umpanni?"

"Iyo Buk. Celengan Sri. Maksud Sri taditu. Abah mancing boleh iwak. Na ... Iwaktu dijual, sisonyo dimakan. Duit dari enjual iwaktu balikke lagi ke Sri. Mak itu abahnyo ..."

"Ooooo ...'

"Ok .. Oooo .. Dakke abis cuman di oooo bae Bah. Balikke gancang duit Sritu," kongkon Cek Lung.

"Bereslatu Buk. Memang berapo niyan duit Sri yang tepakektu?"

"Limo puluh ribu Bah," kato Sri kesenengan karno duit celengan bakal balik cepet.

"Apo? Limo puluh?"

"Ngapo Bah? Tekejut? Mangkonyo Bah, jangan banyak tingkah. La kuomongke .. Mak ini ari jangan mancing duken. Serbo mahal," uji Cek Lung, keringetan galo rainyo. Mano merah lagi.

"Kalu tau mahal, lemakla dak usah pakek umpan," kato Wak Lung, senyum dak kelemakan.

"Mancingnyo pakek apo Bah, kalu idak beumpan?"

"Pakek nasi bae."

"Galak apo iwak ngembat nasi Bah?" Tanyo Sri keeranan. Setau dio, cuman seluwang yang galak makan nasi. Lain dak. Paling cacing tanah.

"Galakla Sri, Buk."

"Darimano abah tau kalu iwaktu galak makan nasi. Umpan yang dibawak taditu bae kato abah idak dimakan iwak. Abahni pembohong niyan."

"Bukan pembohong Buk " kato Sri motong omongan.

"Jadi apo kalu bukan pembohong?"

"Embudike bae."

Ha ha he he he ...

Tobe continued