Entok (9)

Novel ...

Entok (9)
Oleh Wak Amin



 
17
DUG ... dug ... dug

Allahu akbar ... Allahu akbar.

"Assalamualaikum ..."

Tiga kali mengucap salam, Wak Pet pecak nak nangis. Mano perut lapar, lawang dak dibuka'. Dakken ado dak katik uwong di jeru rumah.

Tapi ... Caknyotu sepi-sepi bae ..

"Oi Wak Pet. Ngintip siapo. Dak katik uwong di rumahtu," uji lanang setengah tuwo tetanggo sebelah yang baru balik dari begawe bangunan.

"Kemano?"

"Bini Wak Pet pegi tadi samo kawan-kawannyo ... Sedangke anak Wak Pet, Leni Lina, pegi jugo. Barusan bae," kato budak, abis buko langsung ke mesjid, melok sembahyang megrib bejamaah.

"Melok emaknyo?"

"Idak Wak. Cek Pet duluan peginyo."

"Ooooo ..."

"Yo sudah kalu mak itu," uji Wak Pet, ditawak'i buko di rumah, dio nulak karno malu ati.

Mak itu jugo Wak Lung. Anak samo bininyo tibo-tibo ilang dari rumah. Ngomong idak, ngapo-ngapo idak. Makmano anak samo emak. Samo iyo. Dak keruan aguk galo.

"Payula Wak Lung. Makan bae di rumah. Sekali-kali dak jadi apo. Cuman Wak taula dewek. Katik apo-apo di rumah. Nasi, sambel, lalap kangkung samo tempe goreng," kato tetanggonyo yang baru balik dari warung embeli rokok sebatang.

"Terimo kasihla."

"Payu kalu mak itu, aku buko duluan yo Wak Lung."

" Payu diaturi."

Na, makmano pulo  dengan Wak Agus samo Wak Yeng?"

Duwo-duwonyo tepakso makan kerupuk samo banyu putih enjukan uwong di warung. Bedanyo, kalu Wak Agus kerupuknyo besak, Wak Yeng kecik. Tapi duwo-duwonyo lego karno pacak buko samo kerupuk.

"Balik apo?" Wak Agus la dak tahan nak majuh. Buko dak makan nasi samo bae bo'oong.

"Balik jugo ngapo," kato Wak Yeng. "Bini katik, anak jugo dak katik. Lemakla sini. Duduk di warung. Idak makan, jadila duduk meguk."

"Iyo jugo ye. Payu kalu mak itu kito duduk sini bae. La malem gek baru kito balik."

"Cocoklatu," kato Wak Yeng. Siso kerupuk dio abiske. Jugo banyu putih anget-anget kuku wadah cangkir plastik.

Entah makmano ceritonyo, Wak Lung ketemuan jugo dengan Wak Pet. Duduk sambil nyuguk tepeguk di garang rumahnyo

Untung bae Wak Lung dapat roti isi kacang iju  enjukan budak mecahke puaso. Roti dienjuknyo. Dibaginyo duwola samo Wak Pet.

Banyunyo?

"Dak usahla bebanyu. Yang penting rotu masuk duken ke perut. Jadi dak lapar igo lagi," kato Wak Lung, tetap semangat bebuko walau cumo dengan roti belah duwo.

Sambil nahanke cegukan karno makan dak minum, balikla Leni samo Lina dari belanjo baju di mall.

Namonyo budak gadis, nak deket lebaranni, kalu dak baju, sepatu apo selop, yo bedak membedakla. Soal isi perut nomor duwo.

"Abah?" Duwo anak Wak Pet tekejut nyelik abahnyo tetiduk pucuk becak samo Wak Lung. Tiduk sambil megangi perut pulo.

"Abah ...!" Kato Leni samo kakaknyo Lina.

Pas dirabo Lina perut abahnyo. kempes niyan. Mak itu jugo Wak Lung.

"Lum buko caknyo," uji Lina, ngeraso kesiyan jingok abahnyo samo Wak Lung tetiduk karno nahanke lapar.

"Sudah taditu abah samo Wak Lung bebuko," kato Wak Pet, turun dari becak, sambil ngusap matonyo yang abang dikit.

"Abah jangan embudikela," uji Leni, tetap dak cayo kalu abahnyo sudah bebuko.

"Kalu dak cayo, tanyola Wak Lung."

"Iyo Wak Lung yo?"

"Iyo ... Kami beduwo abah kau sudah bebuko sebenernyo. Tapi dak banyak. Cuman roti kacang iju, belah duwo pulo. Makan tapi dakdo
minum," terang Wak Lung. La nak ketawo tapi dak jadi.

"Idak keselekan apo?" Tanyo Leni, pengen tau bae.

"Idak. Karno rotinyo kecik. Semak Ini besaknyo." Wak Lung nunjukke kepelan tangan.

Haaaaa ..?

18
"JANGAN  malu- malu Cek. Sikat bae ..." Kato Cek Yeng, waktu bebuko di warung makan pinggir jalan.

Yang namonyo ditawak'i majuh, jangan diomongke lagi. Pasti galak tula. Terutamo Cek Agus samo Cek Pet.

Lum apo-apo, kapal selem duwo ikok disikat abis. Martabak mak itu jugo. Pelayan warung yang tepakso enggilirke pesenan bukoan, enggeleng-gelengke kepalak.

Ngapo mak itu?

Baru bae laksan ditarokke pucuk meja wadah besak, kapan balik lagi nak ngantarke pindang betok, tesiso piringnyo bae.

"Buk ... Laksannyo sudah lum?" Cewek bejilbab emberanike diri nanyo. Kalu bae dio kelupoan ngelepkkenyo.

Eeeeeekh ...

"Sudah ponakan. Ini wadahnyo," kato Cek Pet. Ngenjukke wadah rantang sikok ke cewek taditu.
Dak
"Kalu masih ado, boleh dak ponakan nambah lagi?" Tanyo Cek Agus. Iseng bae sebenernyo. Tapi di jeru ati ngarep sewadah lagi laksan ado di pucuk meja.

"Boleh bae Buk,' simbat si cewek. " Berapo ikokla kiro-kiro?" Metuke notes samo pulpen. Besiyap nulis.

"Sewadahla ponakan," uji Cek Pet sambil ngirup kuwah pindang betok.

"Tunggu ye Buk ..."

"Iyo ponakan ..."

Lain dengan Cek Pet en Cek Agus yang banyak ngomong, Cek Yeng samo Cek Lung sedieman bae. La duwo piring pindang betok abis disikat. Temasukl jatah Cek Pet samo Cek Agus.

"Sudah. Dak usah marahla. Malu dijingok uwong. Pesan lagi gektu," kato Cek Lung nenangke Cek Pet yang tekejut en cak nak marah. Pindang betoknyo tinggal tulangnyo.bae.

"Payu. Aku jugo yo." Cek Agus melototi tulang betok jeru piring.

"Sudah ... Sudah. Pesen lagi gek," uji Cek Lung. "Bilo perlu empat piring besak. Mangko puas .."

Ha ha ha ha ...

Sambil nunggu pindang betok samo laksan, Cek Pet en Cek Agus beceritola. " Dulu," kato Cek Pet, "Waktu lum kawin, pernah jugo bebuko di luar ..."

"Cuman ..." Tibo-tibo Cek Pet, ketawo geli ngingetnyo.

"Lucu yo?"

"Yola Cek Agus."

"Lucu ngapo?"

"Kurang duit. Untung aku bawak duit. Kalu idak alangke malunyo. Bajula bagus, sepatu mengkilat galo. Tas, tasnyo kulit. Motor anyar, walau kredit. Cubola Cek Agus bayangke ..."

"Gek duken. Aku embayangkenyo duken. Kalu misalnyo yang cowoktu aku ..."

"Cek Agus .."

Masih embayangke.

"Cek Agus. Jangan lamo igo."

Cek Agus sadar. Tadinyo bukan embayangke. Tapi ngelamun bae. Buko di luar, lauk sawur gek dak katik .."

"Makmano Cek Agus. Sudah embayangkenyo?" Cek Pet eran nyelik konconyoni senyum-senyum dewek.

"Kalu aku jadi lanangtu, malula aku ..."

Haaa ...?

"Ngapo malutu Cek Agus?"

"Cubola awak jadi lanang. Dimano rego diri kito si lanang kalu makan bae yang dak seberapo duitnyo mesti ditukuk'i betino, cubo."

Cek Pet manggut-manggut.

"Iyo jugo yo Cek Agus. Tapi kalu dak katik duit makmano?"

"Temui bosnyo. Omongke terus terang kalu kurang duit. Pasti si bos maklum."

"Kalu idak?"

"Ajak begocoh."

Haaaa ...?

Serempak uwong yang bebuko noleh ke Cek Pet samo Cek Agus. Ado yang ketawo, eran samo senyum-senyum bae. Ngelambaike tangan tando senang.

"Maaf Buk."

Cewek pelayan tadi becepet datang. Ngenjuk tau kalu pindang batok la abis. Tinggal kuwahnyo bae ...

"Kalu laksan?" Tanyo Cek Pet, la ngiler nak ngembat laksan.

"Samo jugo Buk. Tinggal kuwahnyo bae ..."

Cek Pet samo Cek Agus bebisik.

"Sudah yo Buk." Si cewek bemaksud nak ke meja yang lain.

"Tunggu sebentar ponakan .." Cek Pet nyekel tangan si cewek.

"Ado yang ...?"

"Yang lain abis jugo dak?"

"Iyo Buk. Yang tesiso cuman .." Si cewek dak lemak ngomongkenyo. Malu-malu kucing.

"Cuman apo ponakan?" Tanyo Cek Agus besemangat. Kalu bae pindang patin.

"Jengkol."

Ha ha ha ha ...


Tobe Continued.