Goh-Gohda (7)

Novel ...



Goh-Gohda (7)
Oleh Wak Amin




12
"GUS, dipa umakmu hanjona?" Tanyadu Mang Nasir. Biyak ga minjak. Kapingin ga nginum. Bak api mak ngorah Agus bagawoh.

Sumangda. Wai sai diakukko anggoman rik anak sumang. Mak pacak bak apiya. Mungkin bagawoh bakdu sarasiyan.

"Bak .. Oi Ubak. Umak lokok nasak. Tunggu sangarobok cakna," cawadu Agus . Bingung ngaliyak ubakna pocak kahasangan.

"Ubak ga ngopi. Onti kuguwaiko."

"Mak api-api niku Ubak korah?" Icak-icaknana kilu ikhlasna mun dikorah. Padohal kapingin nihan nginum wai tingakuk anggoman.

"Makwat Bak. Saunisa pangrasaku nyak dikorah Ubak torus. Kugawiko. Alhamdulillah pacak kan Bak?"

"Layonda sina maksud Ubakmuja Gus. Mun niku wat gawe barih, lajuda pai. "

Mang Nasir ngaharop.nihan Agus luwah jak kamar. Konaiko ya posai rik Umakna ngantak wai handak.

Mihya Agus mak haga. Ya ompai luwah jak kamar pas Ubakna ngo rah ya muloh.

"Cawako, onti usungko wai handak. Gancangda," korahdu Mang Nasir.

Tidipada Agus?

Santai bagawoh. Ngaliyak Umakna radu angguring sopat siyam, gulai joh pagi. Ya sonang bakdu wai sai dihaga Ubakna sangarobok lagi ratong ...

"Mak. Ubak kilu wai handak," cawadu Agus rik Umakna. Nuangko wai di cirik, ga dijorangko. Wai di termos tinggal cutik, mun mak dijorangko, nginum rik wai api.nonti.

"Cawadu Ubak, Umak ngantak kona," cak Agus. Kintu nihan Umakna haga.

Agus hoda kapingin ngaliyak Ubak rik Umakna muloh juk paija. Tidipa-dipa kacah buruwa. Taka kuruk wese mak ulah posai.

"Niku jugaya Gus yo. Kok diliyak umakmu lokok anjorang wai," jawabdu umakna.

"Payu mun juksapona Mak."

Sambil nyangking golas balak isina wai, Agus nomuni Ubakna di lom kamar.

Kabotulan matana tipojom. Ga ngaminjakko Ubakna Agus rabai. Mihya, mun mak tiinjakko, idanya nginumna.

Sorba salah ...

"Bak .. Oi Bak."

Digalitik cutik di bah katiyak Ubakna, ngaraso goli mungkin, tiinjakda Mang Nasir.

Untung ya mak suya ..

"Nginum pai Bak. Radu sina ompai anggulik muloh."

Mang Nasir mak cawa. Bakdu ka haosan. Ga nginum wai handak. Dikapabolana. Mak busisa lagi.

Gleeeek ..

Geeek ..

Heeeeurgh ...

"Juksipa Bak. Bangik kan?"

"Sodop Gus. Dijuki apiya wai handaksa?"

"Mak ongka dijuki-juki Bak. Sa tongah panas. Hangok kuku cak hun ho ..."

"Oooo ... Juksina munih yo Gus."

"Iyuda Bak. Hortinana Ubak layon
da kahaosan."

"Mun juksina bak apiya Gus?"

"Mih kakurangan cairan bagawoh. Bakdu sinada, Ubak losu. Cuba ganta, rasaiko dapai Bak. Lokok losu Mak?"

Rogoh jak puk turui. Lapah cutik ulang uloh. Radu sina ...

"Mak lagi Gus."

"Api cakku kan Bak?"

Rawang kamar tibuka'.

"Api lagi nganik kan panas rik sop ayam, pasti juk superman Ubak muna Gus." Gurau Bik Nasir.

Ha ha ha ha ...



13
"MOJONG kiyai mun miyoh ho," to gur anggomanna waktu ngaliyak Mang Kafi miyoh togak di kamar mandi.

Ceeeer ...

Cuuuur ...

"Mak diliyak hun hoda Dik. Mak api-api kintu ..." Cakdu Mang Kafi. Luwah jak kamar mandi.

"Anak kok mouli. Mak bangikda ..."

"Mak katahanan lagi Dik. Kok ga tikayoh," jawabdu Mang Kafi. Bugan cang kuruk kamar. Anggulik muloh.

Bik Kafi, radu ngaliyak Yulia lokok turui, ya nutup rawang kuruk kamar lakina.

Nyeeet ...

Mang Kafi lokok turui ..

Heeeergh ..

Heeergh ..

Heeeergh ..

"Mak kambih. Ompai sada kuruk, lokok turui, landok munih. Mak parcaya nyak ah .." Cak Bik Kafi di lom hati.

Ya podoki lakina. Jak kabolah kiri, jak balakang huluna. Dipasatina hirung, banguk, alis mata rik cuping.

"Lokok cindo oi lakikuja. Mak salah nyak ngamilihnya paija. "

Bik Kafi ngahusap pipidu Mang Kafi. Bulanjut di buwok.

"Halom nihan. Sai juga makkung ongka uban."

Tok ... Tok ... Tok ...

Mari lakina mak minjak, Bik Kafi sai bupodok di rawang. Pas dibuka' anakna Yulia pocak karabaian.

"Rabai nyak Mak."

"Bak api? Kuruk ... Kuruk ..!"

Mojong podok kukutna Mang Kafi, Yulia bucurita ya jona buinipi ditutul asu.

"Digigikna Mak?"

"Makkung Mak. Cutik lagi. Bakdu wat mija. Nyak cakak. Si asu mak pacak cakak bakdu langgar, kira-kira samitirda."

"Untungda mak digigikna," cak Bik Kafi.

"Ngapida Mak?"

"Hortinana niku mak api-api," torang Bik Kafi.

"Kintu digigikna?"

"Bahaya ..."

Yulia tikanjot.

"Bahaya apida Mak?" Tanyadu Yulia. Ngating pungu indokna.

"Disopok hun .." Jawabdu Mang Kafi. Tiba-tiba minjak jak turui.

"Ah Ubakmuja juksijada. Bugurau-gurau hoda. Mak ongka barih. Icak-icak turui ..."

"Turui nyak Dik. Mih ngahoning kuti ruwa bucurita nyak minjak. Nyak rokob andongi bagawoh. Matasa sangajo mak kubuka' mari mak kanahan nyak kok minjak ..."

"Oooo juksina yo .."

Pak .. Pak .. Pak ...

"Adooow .."

"Raduda Dik. Sakik," jorit Mang Kafi sambil ngilakko pungu anggoman na sai mak buhodak nopuk punggungna.

"Mak ... Mak, raduda ...Nonti Ubak.mati."  Yulia nahan pungu Umakna.

"Ubakmuja. Kacah ga bugurau hoda jak jona."

"Dang ditabuk punggungna Mak. Mun punggung holau sina lobon kabolah juksipa?"

"Konaikoda. Mariya rasako posai. Kaliwatan. Anggoman payah bugawe di sanglolak, ya kabangitan turui."

Ha ha ha ha ...

"Ngapi niku maha Yulia. Tulung Umakmuja gancang ..."

"Lucu bagawoh Mak. Amun Ubak mak bupinggang, juksipa lapah yo Mak .."

"Dikui-kui ..."

He he he he ...


14
NOM bulan kemudian ..

Kretaaak ...

Plaaak

Kleteeek ...

"Mak karasaian. Kok ngahatok .." Cakdu Mang Yahya waktu ngakuk hatok gonting jak Mang Kafi.

"Hibatna lagi, santai kita ngahatok. Mak panas ga, pangrasaku. Tuwon mak?"

"Tuwon dayona. Hujan mak, panas ga mak. Pocakna mak kolu ngali yak kita bupanas-panas."

Di kabolah kanan ..

Podok teras. Mang Latif rik Mang Nasir kok radu ngahatok. Mih tinggal ngarapikona bagawoh.

"Alhamdulillah," cakdu Mang Nasir, ngolap hiting di pudakna.

"Haos mak Mang?" Tanyadu Mang Latif, pocak ga rogoh.

"Iyu Mang ..."

"Tungguda dija. Nyak bagawoh rogoh ngakuk wai inuman."

Tinggalda posai Mang Nasir.

"Sir .. Sir."

"Oi, api adok? Kok radu api?"

"Dijada pai," ajakdu Mang Kafi. "Bucuritada pai ..."

"Payu mun juksapona. Tunggu yo!'

Waktu Mang Latif cakak muloh ngusung termos wai handak rik cangkir palastik, Mang Nasir kok andongi Mang Yahya bucurita.

Curita api ya?

"Sir ... Mang Nasir!" Mak ongka jawaban. Ngaliyak kiri kanan mak ongka. Ompai tolu langkah tidopan, maha posai. Bakdu Mang Nasir mojog rik Mang Yahya, Mang Kafi.

"Oi. Ajak nyak oi ..."

Katolu-toluna nuleh.

"Dijada," cakdu Mang Yahya.

Apiya sai dicuritako?

"Amun tiyak jak hatoksa juksipada cakmu Mang Nasir?" Tanyadu Mang Yahya. Radu bucurita sual tukang tiyak jak hatok.

"Mun mak mati, patoh mamatoh .."

"Niku Mang Kafi?"

"Ngaliyak tiyakna hoda. Mun ya langgar, radu sina sai di bahna aspal, mati dayona. Mak kayawat urung lagi."

"Mihya," lanjut Mang Kafi, "Mun di bahna lawok, atau kasur rik kalam bu, juk partunjukan sirkus, insya Allah mak api-api."

"Tuwon cakmuna Mang Kafi," cawa du Mang Latif  sambil nuangko wai handak di lom golas. Diinum Mang Nasir. Jak jona haos.

"Amun tiyakna di lom wai, waina rolom, mak api-api. Mihya kintu mak rolom pacak mati."

Ha ha ha ha ...

Di bah podok tong sampah ..

"Kayaknya mereka senang ya Seng?" Oceng ngaliyak tiyan pakja jak jona maha torus.

"Mereka senang karena sebentar lagi rumah ini selesai," jawabdu Oseng. Maha munih.

"Kenapa kau ketawa Seng?"

"Aku senang aja Ceng."

"Kenapa?"

"Kita berdua bisa numpang di rumah ini. Benar enggak Ceng?"

"Kalau tak boleh bagaimana Seng?"

"Tak mungkinlah. Sebab, seperti kita-kita ini, tidak bisa di dalam, di luar rumah jadi. Asal bisa berteduh, cukuplah. Benar enggak Ceng?"

"Benarlah itu. Mudah-mudahan saja mereka tidak mengusir kita nantinya," haropdu Oceng.

Huuup ...

Bugilir nginum di cangkir sai. Radu nginum, bugawe muloh. Jam satu istirahat. Gawean kok podok radu. Tinggal lagi ngahatok sangkolak.

Waktu mamang pakja mongan gulai pindang botuk tiusung jak lambahan, Oceng rik Oseng bupodok.

Luwah lui munih ...

"Pingin juga aku Ceng."

"Tak usahlah Seng."

"Tak apa-apa kan?"

"Coba lihat dulu mamang empat ikokni. Kelaparan kayaknya. Kita tunggu saja di sini sampai mereka selesai makan ..."

Tobe continued