Embedat (6-Habis)

Cerita Pilihan



Embedat (6)
Oleh Wak Amin


10
SETELAH dibawak ke rumahnyo, besok baru dikuburke. Jakir, Jul samo Badu berunding parak dapur rumahnyo Mansur yang mayatnyo dikumbut kain, ditelentangke tengah rumah.

Rundingan dak lamo idak. Denget bae. Paling duwo menit. Budak tigoni langsung ke rumahnyo Mang Ridwan. Malemtula. Ngenjuk tau Mansur mati ditembak uwong.

Siapo laye?

"Dak katik siapo-siapo. Pacak dipastike yang nembaknyo uwong yang embedat warung mamang tula," kato Jakir sambil ngepalke tinjunyo, enggocoh kayu parak garang.

"Kalu mak itu kito gari bae. Kito carila budak-budaktu," usul Mang Ridwan.

Berempat langsung nancep ke ru mah Mang Salim. Diintip dari batang pohon seri. Sepi-sepi bae.

Mungkin karno la malem. Daripado diceridik'i uwong lemakla balik duken. Cuman tanggung nian kalu nak balik. Nyaroke badan namonyotu.

Jadi?

"Kito besumput disinila bae," kato Jul. "Kalu bae gektu ado yang lewat, langsung kito sikat."

"Kalu bukan budaktu, cakmano?" Tanyo Jakir.

"Kito embat ..."

He he he he ...

Ssssst ...

Ado lanang gemuk lagi bejalan. Jalannyo lucu. Zig-zug, dewekan pulo.

Setengah mabuk. Mato merah. Baju tebukak kancing pucuk. Idak beselop. Nyekel gudu.

" Ha ha ha ha ...
Mang Salim memang hebat
Sekali tembak
Langsung sekarat ...

Ha ha ha ha ..."

"Mang Ridwan?"

"Tunggu sedenget lagila," uji Mang Ridwan.

Baru nak metu dari batang pohon seri, Roni samo Abdul nyongol. Nutul  Mang Salim.

Bukan nak ngapo-ngapo. Cuman nak ngembek gudu dari tangan Mang Salim, yang tinggal separo kurang dikit isinyo.

"Mang Salim ... Mang Salim!" Panggil Roni.

Namonyo jugo uwong mabuk. Nolehla dio. Tapi dak pulo tau kalu yang manggilnyo barusan duwo anak buahnyo.

"Mang Salim. Ini aku samo Abdul," kato Roni. Ngembek gudu, melok minum.

Abis denget tula.

"Ngapo kau abisi?"

"Bos kan sudah  ..."

"Ooo iyo. Lupo aku."

"Ha ha ha ha ...
Mang Salim memang hebat
Sekali tembak
Langsung sekarat

Ha ha ha ha ..."

Endenger bosnyo nyanyi, Abdul jugo melok nyanyi, lenak parak mabuk ...

"Ha ha ha ha ...
Mang Bedul memang hebat
Ado musuh langsung disikat
Tak kenal baik atau  jahat
Yang penting dio sikaat .."

Dahtu nyusul pulo Roni ...

"He he he he ...
Mang Roni uwong kuat
Sekali tau pacak teluncat
Muko pucat biso tamat ..."
Betigo ketawo ngakak ...

Ado sikok budak mudo pakek sepeda numpang lewat. La dikringke dak jugo minggir. Akhirnyo balik arah.

Lewat jalan lain ...

"Ha ha ha ha ...
Malemni memang nikmat
Apo bae kito embat
Sampe-sampe dak ngeliyat
Perut kenyang badan kuat

Ha ha ha ha ..."

Gedebug ...

Buuuugh ...

Namonyo teler. Mang Salim nyampak. Palaknyo keno tanah. Idung samo mulutnyo bengor dikit.

Hua ha ha ha ...

Abdul samo Roni ketawo libar.


11
BANGUN la agak siang. Kapan tebangun, uwong tigoni, Mang Salim, Roni samo Abdul tekejut. Bukan lagi di rumah, tapi la di jeru sel.

"Apo salah aku, apo salah aku?" Pekik Mang Salim, duwo-duwonyo nangis cak budak kecik.

"Ngapo aku disini," uji Roni, duduk di semen sambil enggoyang-goyangke sikilnyo.

"Keluarke kami," kato Abdul. Nyantukke kepalaknyo ke dinding. Bebunyi nyaring.

Datangla penunggu sel.

Kesiyan, tapi makmano.

"Metuke kamek oi  Te .." Roni ngerengek. Mak itula sifat dio kalu mintak tulung samo cewek.

Kebetulan yang jago selni betino. Masih gadis pulo. Cak betino ke banya'anla. Ramah, cantik.

Kurang apolagi.

"Tolongla Te. Aku lum tebiaso tiduk di sini. Aku biaso tiduk di rumah," kato Abdul. Sempet bemain mato pulo samo cewekni.

Untung bae ketemu cewek yang idak pemarah. Walau dak boleh, dio senyum-senyum bae.

"Jangan nemen igo Dek main matotu," uji si cewek sambil embukak gembok.

Dio ngongkon Abdul, Roni samo Mang Salim duduk.bebener. Jangan pecak ayam tecuguk mangkuk.

"Ngapo Te, dak boleh apo?"

"Bukan dak boleh. Gek sakit mato."

He he he he ...

Priiit ...

Penjago sel lanang ngenjuk tando sel mesti dikunci. Enjingok sel Mang Salim samo duwo konconyoni lum tetutup, si petugas endeket.

"Sudah galo Dek?"

"Sudah. Tinggal bantalnyo.bae," kato si betino. Metu, yang ngunci sel petugas lanang.

"Dadaah Dek!" Mang Salim endadahke tangannyo. Abdul samo Roni mak itu jugo.

"Hei ... Dak boleh," tegur petugas lanang. Nyerem-nyeremke rainyo. Dak biaso serem. Mesti biso supayo yang di jeru sel idak besak kepalak.

Treeeeng ...

Di rumah Mang Ridwan ...

"Jadi cakmano Jul, Kur, Du?"

"Beres Mang. Kito tunggu bae hasilnyo, uji Jakir. Ngirup banyu kopi idak begulo.

Sedep jugo ruponyo. Karno mungkin makanannyo cempedak samo nangko.

Apo dak raso nak terbang ...

Hi hi hi hi ...

" Konco-konconyo makmanola?"

"Makmano aponyo Mang?"

"Maksud mamang Jul, gektu enggari mamang budak-budaktu. Balas dendem, cakmano?"

"Tenang bae Mang," kato Jakir. "Karno ado kami betigo. Kami betigo siap nulung mamang kalu ado apo-apo."

"Kalu dak katik?"

"Ngincit bae Mang Ridwan."

Ha ha ha ha ...

"Itula ujiku samo mamangmuni," nyimbat Bik Ridwan. "Amun uji bibikni, beberapo arini dak usah duken bejualan."

"Kalu dak bejualan, apo yang nak dimakan kito seberanak."

He he he he ..

"Idak pulo Mang. Pasti ado tula yang dimakan. Bener dak Bik?"

Jul nyaranke bejualan bae di rumah. Enjuk tau erte soal keamanannyo. Pasti maklum dio.

"Kiro2 la sebulan apo lebih, baru bejualan di tempat yang lamo."

"Makmano Kak? Awaktula yang mutuske. Kau kan lanang. Aku melok kakak bae," uji Bik Ridwan.

"Aku?"

"Yo mamang melok jualan jugola. Beduwo jualan. Tarokke barang di garang. Ado meja samo kursi. Jadi latu. Pasti banyak uwong yang datang.

" Maksudnyo jualan sayur cak itu?"

"Sementaroni dak usah duken Mang. La aman gek baru duwa'an ke pasar pagi.

Eeeem ...

Lum ado jawaban. Cuman bagus jugola. Namonyo jugo cari makan. Kalu kito galak, ado-ado tula jalannyo ...

Bener dak Lur?



TAMAT