Tebok Ulu Ati (2)

Cerita Fiksi

Tebok Ulu Ati (2)

By  Wak Amin

VI

“IBU anter yo!” Karno sudah kesorean, dak tega rasonyo Bu Guru Tuti embiarke muridnyoni balik ke ru mah dewekan.

“Dak usahla Bu. Lia la biaso balik dewekan,” kato Lia. Selamoni dia la biaso balik dewekan. Balik sekolah, kalu lagi dak katik kawan, dewekan. Jugo waktu balik dari masjid, dewekan tula.

“Jangan Lia. Gek ngapo-ngapo dengan awak.” Uji Bu Guru Tuti. Dio metuke sepeda motornyo dari garasi. Didorong ke deket pintu pagar.

Creeeet …

“Jangan libar gino Lia embukaknyo. Gek saro pulo nutupnyo. “ Kelakar Bu Tuti. Sudah nutup lagi pintu pager, ngongkon Lia  naik di buri motornyo.

Reeeen …

Reeeen …

Motor bejalan lambat.

Di lain tempat …

Bi Cek mondar-mandir depan teras rumahnyo. Dio marah seabisan. La sesoreni abah samo anak lum ju go kejingokan batang idungnyo. Sedenget-sedenget teken pinggang, dahtu duduk. Tegak lagi, duduk. Tegak lagi. Bejalan denget, balik lagi duduk.

“Anak samo bapak samo bae.” Bi Cek enggeretekke grahamnyo. Kesel ado, marah iyo. Pengen rasonyo nguntalke uwong duwotu ke sungi, baru tau raso. Paling dak lemak nunggu uwong yang lum balik-balik. Mato ngantuk, perut laper, waktu abis. Yang dimasak dak katik.

Piiiiin …

Lia turun dari motor. Disusul Bu Guru Tuti. Dio masuk sambil endorong motornyo.

“Maaf Buk kesorean,” kato Bu Guru Tuti setelah Lia nyium tangan Bi Cek. Dio enjelaske  ngapo Lia balik telambat.   Ke rumahnyo duken, embantu ngawek kue jualan.

“Ooooo mak itu. Dak apo-apola Buk. Payo diaturi. Duduk duken Buk.” Bi Cek ngongkon Lia ngembekke banyu putih buat ibu gurunyo.

“Ai dak usahla Buk. Aku denget bae,”kato Bu Tuti. “Ngenjuk tau ibuk bae memang tadinyo aku yang ngo ngkon Lia ke rumah …”

Bi Cek ketawo bae.

“Dak apo-apo Buk. Aku terus terang melok senang kalu Lia embantu ibuk. Daripado dio katik gawe. Cu man ngelamun bae di rumah …”

Giliran Bu Tuti yang ketawo.

“Dah, itu dulu Buk ye. Aku balik duken.” Bu Tuti pamitan.

“Cepet niyan Buk?”

“La sore. Gek kito sambung lagi.”  Bi Cek ngantar sampe depan pintu pagar.

Lia metu. Karno Bu Guru Tuti la laju bemotor, dio ngatret nak  ke buri lagi.

“Lia … tunggu!”

Bi Cek, entah aus entah lapar, langsung bae minum banyu putih anget itu. Sekali teguk abis. Segar rasonyo badan.

“Bawak kue dak awak Lia?”

“Bawak.”

“Mano? Cubo ibuk nak pengen enjingok …”

Becepat Lia ke kamar. Embukak tas sekolah. Dio embek duwo ikok wadah kue . Isi nyo kumbu samo pempek. Masih anget pulo.

Ha ha ha ha …

Bi Cek ketawo ngeliatnyo. Sugi dilepasnyo denget. Ditarokkenyo pucuk meja.

“Ibuk makan yo!”

“Yo Buk. Abis kela. Pasti ibuk kelaparan kan?”

“Tau jugo kau Lia kalu ibuk lapar,” kato Bi Cek. Sekali duwo kumbu dio masukke ke jeru mulutnyo.

Keselekanla dio. Untung bae, Lia embawak  termos banyu kecik. Demi ibuknyo, dienjukkenyola banyu dingin itu.

Glegeeek ..

Geeek …

Glegeeek …

“Alhamdulillah,” ucap Bi Cek. Gelas kosong, dienjukkenyo samo Lia. Ngongkon anaknyoni ngembek lagi banyu putih di buri.

Bi Cek neruske lagi makan kuenyo. Kalu tadi kumbu, sekarang giliran pempek. Pistel samo adaan. Ado cu konyo lagi. Wadah plastik.

Namonyo sedep, cuko dalam plastik taditu dicucup bae oleh Bi Cek. Ditebokinyo pucuk plastik dengan giginyo yang paling besak.

Jadi tangan kiro megang plastik sambil nyucup cuko, tangan kanan megang pempek. Enam ikok pempek abis keno lanjak.

Heeeegh …

Heeeegh …

Heeeegh …

“Na Buk banyunyo …” Lum sempat Lia narokke cangkir plastik ke pucuk meja, sudah disambar Bi Cek.

“Lambat-lambat bae Buk. Gektu keselek pulo.” Lia ngingetke bae. Bukan bae karno makan lupo minum yang galak keselekantu. Banyak minum jugo keselekan. Pacak jugo  temuntah.

“Kalu ado apo-apo kan ibuk tula yang saro.”

“Kan ado awak Lia.”

Perut kenyang, Bi Cek duduk bedengkang.

VII

“ADUH … panas … anget … panas … anget. Minum Nak tolong,” uji Mang Jen minta tolong anaknyo Lia ngembekke banyu putih pucuk meja.  Dio lum sanggup tegak. Kalu dipaksoke takutnyo nyampak. Lemak kalu ke pucuk nyampaknya, ini ke bawah. Idak tepeletot, palak tecium semen. Nambah pening.

Lia yang baru bae nak telelep, endanger abahnyo ngomong mintak tolong, begancang bangun. Dio tuang ke banyu segelas dari termos plastik.

“Duduk Bah …”

Alangke pecak saronyo Mang Jen kitoni. Bangun nak duduk bae lagi dak pacak kalu idak dibantu Lia. Ba ru sehari ngamen, la pecak uwong senewen.

“Lambat-lambat Bah …”

Lia tepakso endudukke abahnyo lambat-lambat. Karno bekeringet galo, dilapnyo duken pakek  kain selimutnyo waktu abahnyo la teduduk.

“Makmano Bah.”

“Jadila.”

“Sekarang Bah, bukak mulut abah. Lia nak ngemasukke banyu putih ini ke mulut abah.”

“Dikit-didik bae yo Nak.” Kato Mang Jen. Embukak mulutnyo. Lia nuangke gelas taditu ke mulut abah nyo. Abisla kiro-kiro setengah cangkir kecik.

Mang Jen baring lagi. Lum sanggup dio duduk lamo-lamo. Badan masih panas. Pegel-pegel, sedikit pilek, gawe nak minum bae.

“Lia kompres lagi yo Bah.” Lia ngembek anduk kecik pucuk bantal. Anduk yang la agak keringni dimasuk kenyo  ke jeru baskom kecik. Dahtu ditempelke di kening abahnyo.

Dingin teraso.

Sejuuuuk …

“Lemak Nak. Dingin rasonyo. Sekarang tidukla lagi kau Nak. Besok kau nak sekolah.”

“Kalu abah ado apo-apo, panggil Lia bae yo …”

“Yoi.”

Lia milih tiduk parak abahnyo. Dio embentangke tikar pucuk lantai semen. Sedangke ibuknyo tiduk pucuk ranjang.

Tadinyo Lia tiduk di samping ibuknyo. Karno dak berenti ranjang beringgut-ringgut, dio pindah. Milih tiduk di bawah bae.

Yo namonyo uwong bontet, pasti ngorokla. Lemak kalu diem. Dak begerak-gerak.  Ini begerak terus. Pecak cacing kepanasan. Bolak-balik sampe telelep, baru berenti.

Saronyo lagi, pas dio bebalik badan. Kito yang tiduk di paraknyoni dijadikonyo bantal guling. Dipeluknyo. Kuat pulo.

“Aduh … ibuk. Geser dikit Buk …” Uji Lia. Untung bae cuman  tangan samo sikilnyo. Jadi dak pulo payah igo ngelepaskenyo.

Teng … teng … teng .. teng .. teng …

Lia tebangun jam limo. Dio bangunke ibuknyo supayo sembahyang subuh. Beduso kalu la besak tapi idak galak sembahyang.

Apo kato Bi Cek?

“Denget lagi. Lajula duken Lia. Tanggung. Mimpi ibukni baru setengah jalan.”

Sudah salat, Lia enjerang banyu samo masak nasi dikit. Dio sempatke nyingok abahnyo. Masih tiduk. Ke pengen dio nak embangunkenyo. Tapi dak kolu rasonyo. Karno masih sakit. Cuman, waktu dirabo pa laknyo, la dak panas niyan lagi.

“Syukurla,” uji Lia di jeru ati. Dio ngarep abahnyo gancang sembuh. Sebab kalu dio lum sembuh, masih sakit, siapo yang nak ngurusnyo. Bi Cek, ibuknyo dak kenado.

“Lia …

“Lia …

Mato Bi Cek sempat enjelit. Mang Jen yang sempat enjingoknyo ecak-ecak mejem. Dio baru bukak matonyo lagi  waktu Bi cek mejemke matonyo lagi.

Lia yang baru sudah nyiapke sarapan pagi, banyu teh anget samo nasi lauk iwak asin kecik pucuk meja makan, tibo-tibo ingat abahnyo.

Dio begancang masuk jeru kamar. Pas niyan. Mato abahnyo lagi tebukak. Lia marakinyo. Anduk kompres dibalikkenyo, yang bawah ke pucuk, dahtu ditempelkenyo lagi.

“Abah nak minum Nak.”

“Tunggu denget Bah yo.”

Ado siso kue semalam. Pempek sikok samo kumbu yang baru dikukus samo nasi taditu. Dimakan samo banyu teh manis anget, alangke sedepnyo. Badan sakit langsung sehat.      

“Bah … Jingok ini!”

Mang Jen yang miring ke kanan, noleh. Tejingok kumbu, pempek adaan samo teh manis, dio senyum.

“Dikit bae Nak.”

“Banyak dak apo-apo Bah. Abah kan la sehat.”

Bi Cek ngigau. Dio enggarut-garut tangannyo. Denget, dak lamo.  Dahtu muter badannyo ke kanan.

Tiduk lagi.

VIII

SORE ari di bawah tanggo rumahnyo Bu Syawal …

“Masak apo taditu Bi Cek. Pecak lain niyan kito soreni. Ceria. Dahtu pecak nak ketawo terus bae,” kato Bu Rijal embukak emongan.

“Dak katik yang dimasak Bu Rijal. Mak ikola caro uwong sare …”

Ha ha ha ha …

Po Inem ketawo ngakak.

“Ngapo awak yang ketawo?” Tanyo Bu Syawal keeranan bae. “Kan Bi Cek yang ditanyotu. Bukan awak.”

“Akutu la tawu Bu Syawal …”

“Apo awak sengajo nguyok Bi Cek?” Sender Bu Rijal.

“Kau jingok duken itutuna …”

Po Inem nunjuk ke bawah pohon nangko. Ado ayam, lanang betino, lagi bekenoan. La duwo menit dak berenti-renti. Baru berenti setelah diusir Bu Syawal.

“Ado-ado bae,” uji Bu Rial.

“Tando apolatu?” Bi Cek ngirup banyu teh campah buatan Bu Syawal. Walau campah, karno diirup sam bil makan ubi selo, sedepnyo bukan main.

“Kalu bae nak ado rejeki yang datang,” kato Po Inem.

“Ah awakni. Ngado-ngado ba …” Kato Bu Rijal.

“Dak cayo, jingokla gek …” Uji Po Inem.

Ting … tring … tiiing …

Baru bae Po Inem ngomong, lewatla tukang tekwan. Eeeem … Baunyo sedep niyan. Anget pulo. Alangke lemaknyo kalu dipajuh soreni.

“Apo dak ujiku. Rejeki kan?” Po Inem lego. Kalu bukan rejeki ngapo  mamang tekwantu lewat sini. Lewat sano.  Jalan lain ngapo. Kan banyak jalan di kampung kitoni.

“Ah betatuan pulo. Itutu bukan rejeki tau dak. Inini namonyo ngilerke. La tau bulan tuwo, lewat sini pu lo. “ Kato Bu Rijal melok majuh ubi selo. Cak idak bae. La tigo ikok dia pajuh.

Dak lamotu lewatla Pak Erte. Biaso … kapan sore dio ngontrol wargonyo pakek kereto angin. Pakek se wet samo kopiah item.  Kapan tejingok Bi Cek, rainyo langsung pecak nak ketawo.

“La lamo niyan aku dak ketemu betino empat ikokni,” katonyo di jeru ati sambil endorong sepeda, dahtu disandarke parak cagak rumah.

 “Aha … Pak Erte kito. Lah lamo kito dak besuwo. Kemano selamoni wahai kando Pak Erte?” Bi Cek bece pet tegak. Nyalami Pak Erte.  Melok jugo nyalami Bu Rijal, Bu Syawal samo Po Inem, yang sempat salah besalaman. Seharusnyo tangan kanan, taunyo tangan kidal.

Duduk serempak.

“Pak Erte. Tekwan yo …” Bisik Po Inem. Pak Erte tekejut denget,  dahtu ngiyoke.

“Mamang tekwan. Limo piring,” kato Po Inem begancang maraki mamang tekwan. Dak lamotu Bu Rijal, paling buncit Bu Syawal.

“Siap Bu,” kato mamang tekwan. Baru metu dari rumah, sudah limo piring uwong mesan. Biso-biso lum Isya’ la abis galo-galo. Apo dak hebat.

“Aku … cabenyo banyakke yo mang,” uji Po Inem. La nyendoki cabe iju, siap nak ditarokke ke piring tek wan dio yang lum ado isinyo.

“Aku dak usah becabe Mang. Bawangnyo bae banyakke,” kato Bu Rijal. La ngenggem bawang, siap dita burke pucuk piring. Tapi lum ado piringnyo.

“Aku dak usah pakek su-un Mang.” Bu Syawal la nyekel piring.

“Aku duken yo Mang.” Kato Po Inem.

“Aku duken Mang,” uji Bu Rijal.

“Aku Mang. Aku kan la nyekel piring. Dio beduwoni lum. Bener dak Mang?”

Mamang tekwan ngiyoke.

“Dak pacak mak itu Bu Syawal. Aku yang duluan. Aku kan yang duluan maraki dan ngomong samo mamang tekwanni. Bener dak Mang?”

Mamang tekwan embenerke.

“Aku makmano mang jadinyo?” Tanyo Bu Rijal.

“Awak buncitan bae Bu Rijal. Kato Bu Syawal ketawo ditahan.

Karno Bu Rijal dak terimo dibuncitke, ributla dio. Dio nuduh Bu Syawal samo Po Inem sengajo embuncit kenyo.

Ampir nak begocoan, Pak Erte turun tangan akhirnyo. Sambil ketawo ngakak samo Bi Cek, dio mintak ma mang tekwan  enderetke limo ikok piring.

Begantian diwadahi. Kalu la sudah, embekla oleh yang punyonyo.

Gampang kan …

Ngapo nak sulit-sulit …

IX

DI rumah makan lesehan …

     Mari kawan kita bedendang

     Sambil makan coba dengarkan

     Ini lagu bukan sembarangan

     Lagu untuk menghibur kalian

        Yuk kita berdendang

        Sambil makan duduk bedengkang

        Jangan bae laju tekangkang

        Idak baik itu dilarang

                 Mari kawan kita berdendang

                  Dendang melayu coba dengarkan

                  Payu bejoget dak lupo daratan

                  Perut kenyang hati pun senang

                        Yuk kita berdendang

                        Sambil minum kito samo rayakan

                        Susah hati kito enyahkan

                        Senang hati kito ciptakan

                                Mari kawan kita berdendang

                                Ado rejeki kito ucapkan

                                Terimo kasih hanya kepada Tuhan

                                 Tempat kita memohonkan

                                 Segala ampun dan kemudahan

                                     Yuk kita berdendang

                                      Mari kita bergandengan tangan

                                      Besok lusa kita ketemuan

                                      Terima kasih kami haturkan …

Jreeeeng …

“Terima kasih … terima kasih,” uji Mang Jen, yang kebagian nabuh ketipung. Metik gitar si Ceper, se dangke Dakian samo Tato megang kericikan. Nyanyi samo-samo,  ngelilingi uwong yang makan, jugo samo-samo.            

Banyak jugola boleh duit. Karno banyak yang makan. Ado yang ngenjuk duit logam limo ratusan, duit ker tas sepuluh ribu, limo puluh ribu, malah ado yang, dak tau pulo ikhlas apo idak, ngenjuk seratus ribu.

“Kalu cak inila kito pacak kayo rayo. Dak lagila ngamen,” uji Tato, melok ngitung duit sebelum dimasukke ke jeru kantong celano.

Karno lum tengah ari, tanggung niyan kalu lenak balik. Sepakat neruske ngamen.

Tapi dimano?

Di rumah makan yang banyak pengunjung bulenyo …

    I’m sorry my love

    If I’ve broken your heart last night

    I beg of you to forgive me

    Dearest one I’m sorry

       I Promise my love

       I won’t  make that mistake again

       Oh won’t you please forgive me

       And be my love again

              I was a cool to treat you mean

              And cruel

              I didn’t know at all

                 Now I realize so I apologize

                 I’ll never

                 Never hurt you again

                 Oh oh ….

                       I’m sorry my love

                      If I’ve broken your heart last night

                      Oh won’t  you please forgive me

                      Nd be my love again

                         I’am sorry

                         I’m sorry

                         I’m sorry my love …

Para bule raso kanyut endanger lagu “I’m Sorry My Love”. Ado yang temangu lum apo-apo. Ado yang be renti majuh. Jugo ado yang senyum-senyum bae. Pokoknyo mecem-mecemla. Tapi kejingokan niyan kalu wong baratni ngeraso puas.

“Yang kedua … Oh Carol …” Pekik bule yang dak berambut lagi. Kelimis galo-galo.

“Oke …” Uji Mang Jen. Jangan dak lemak bae. Ecak-ecak pacak bahasa Inggris. Padohal cuman tau ‘yes or no’ bae. Dak lebih.

Jreeeng …

Pak pung .. ketipak tipung …

       Oh … oh Carol

       I am but a fool

      Darling, I love you

      Tho’ you treat me

      Cruel you are hurt

      And you made me cry

            But if you leave me

            I will surely die

            Darling, there will

            Never be another

            ‘Cause I love you so

                     Don’t ever leave me

                     Say you ‘ll never go

                     I will always  want you for my sweet

                     Heart no matter what you do

                     Oh Carol

                     I’m  so in love with you ….

X

PAS niyan jam duwo belas. Lagi lemak duduk di pinggir taman kota, Tato yang dikongkon embeli nasi bungkus, la datang sambil ketawo-ketawo. Nasi anget, dipajuh samo-samo, apo dak lemak.

“Nasi iwak Mang. Tapi besak niyan iwaknyo. Nasinyo jugo banyak dienjuk wong rumah makantu. Kato nyo supayo kito berempatni kenyang galo-galo …”

Ha ha ha ha …

“Bismillahirrohmanirrohim … Kito pajuh samo-samo,” kato Mang Jen besemangat. Baru bae sembuh dari flu hongkong, pastila yang namonyo majuh, dak kalo dikit. Banyaktula.

Duduk besilo berempat. Beadep-adepan pulo. Nasi bungkus dibukak. Woow … ado kuwahnyo. Sayurnyo nangko samo daun ubi. Iwaknyo digoreng. Panjangla, kiro-kiro sekilan uwong besak. Pokoknyo sipla. Na si anget .. banyak putih wadah plastik. Besak pulo plastiknyo.

Dak tanggung-tanggung. Ngeraso sedep, nasi samo lauknyo dak besiso lagi. Selain daun samo kertas korannyo bae.

Dug .. dug .. dug …

Ceper nepuk-nepuk perutnyo yang gendutan dikit.

“Kaget temuntah Per. Baru tau raso. Lapar lagi kau gek,” kato Tato, engguling denget karno  kekenya ngan.

“Dakken ado mak ini bae temuntah,” uji Ceper. Masih aus, dio abisila banyu dalam plastik.

“Payu … gek temuntah. Saro pulo.” Dakian ngingetke bae.

Lagi lemak-lemaknyo penesan, datangla duwo ikok lanang tanggung. Masati wong berempatni, teru tamo Tato yang kejingokan niyan kantong celanonyo agak kembung.

“Mano jatah kami?” Segak lanang bejerawat batu.

“Jatah apo Kak?” Ceper tegak. Takut lagi idak dio.

“Na budak ini. Ecak-ecak dak tau pulo. Kamu berempatni kan dapat duit banyak dari ngamen taditu. Na, bagila kami sedikit. Jangan cemeke’an ginotu,” uji lanang berambut landak.

“Ngapo nak maksotu Kak. Duit, duit kami,” tantang si Ceper. Embales melototi si jerawat batu. Jadila saling pelotot-pelototan.

“Ei kau. Kupotelke gek kepalak kau. Baru tau …”Kato si landak, lenak digocohnyo si Ceper, tapi ditahan Mang Jen.

“Ini sepuluh ribu, jadila. Balikla kamuk beduwotu.” Mang Jen ngeraso kesiyan dan jugo dak galak ribut. Tapi, yang dienjuk lum ngapo-ngapo. Nyingok lagi idak duit enjukan Mang Jen.

“Nguyok apo Mang?” Jelit si landak.

“Kautu dak usahla enjelit-enjelittu. Akutu kesiyan bae enjingok kamuk beduwotu. Kalu dak galak ngo mong bae ke aku. Dak tesinggung idak akutu,” uji Mang Jen, lenak naik darahnyo.

“Rego kamini ratusan ribu Mang. Bukan sepuluh ributu. Tau dak mamangtu.”  Ejek landak yang dak galak ngalah.

Praaak … pak ..

Gedebuk …

Dihojike Mang Jen, tepental tigo meter.  

“Majula awak,” ancam Mang Jen. Enjingok si jerawat batu la ngembek ancang-ancang nak embales gocohan Mang Jen.

Jegup …

Gedebuk …

Pantatnyo ditendang serempak oleh Tato samo Dakian. Temaju, Ceper ngelanjakke tengkuknyo. Tesungkur. Tetengkurep.

Enjingok konconyo saro nak bangun, si landak bukannyo belari. Malah nak embales pulo. Ecaknyotu jadi anak mudo kalu di film sepay. Dio nyepak kanan kiri sambil enjerit-enjerit. Dielakke bae oleh Mang Jen.

Ha ha ha ha …

“Nyepak antu,” uyok Ceper.

Sikok pun dak katik yang keno.