Entok (1)

Novel ....

Entok (1)
Oleh Wak Amin

1
WAK Yeng melenggang kangkung. Pakek sarung, baju kaos, bepeci item, kacomato item pulo. Sedikit-sedikit senyum. Sedikit-sedikit ketawo. Pecak uwong baru metu dari rumah sakit jiwo.

Mungkin dak pulo lemak kalu diem bae, benyanyila Wak Yeng kitoni. Supayo lemak endengernyo, sambil besiul. Dak pulo panjang niyan nyanyiannyo. Pendek bae ....

"Idup dakke bereti
Kalu kito diem bae
Baru ado reti kalu kito
banyak lokak sano-sini .."

"Oi Wak Yeng. Nak kemanotu. Alangke belagaknyo. Pecak budak tujuh belasan bae .." Kato budak berambut keriting sambil ketawo. Duduk pucuk garang samo konco-konconyo. Nabuh gitar samo ember. Ngudut sebatang diisep berenam.

"Biasola ponakan. Caro wong tuwo. Tengah ari mak ini ... Malek tiduk, yo mancingla" uji Wak Yeng. Tegak ngadepke rainyo ke budak-budak mudo taditula.

"Satangnyo mano Wak?" Tanyo budak gemuk kecik perut.

"Ado di kawan Wak," kato Wak Yeng. Dak katik lagi yang nak diomongke, Wak Yeng ngelan jutke bejalannyo.
Wak kitoni nak ke rumahnyo Agus duken. Nanyoke bae jadi apo idak mancingnyo.

"Jadila Wak Yeng, kato Wak Agus, semenit kurang lebih duduk di kur si rotan buruk. Ampir bae dio tebenem.

Ngapo biso mak itu?

Di tengah kursi ado lubang besak sebesak pantat. Bolong. Karno lum ado duit lum sempetla dibagusi Wak Agus.

Kemarintu sebenarnyo ado. Cu man, karno bininyo kepingin niyan makan durian, tepakso duit untuk ganti kursi dibelike durian sepuluh ikok. Abis bedelep bae.

Dak lamo igo di rumah Wak Agus. Sebab, masih nak mampir ke rumahnyo Wak Lung.

Kebetulan lagi sembahyang zu hur. Jadi tecugukla di pucuk garang sambil enjingok budak betino nyari kutu di tanggo.

"Alangke pecak lemaknyo Wak Yeng yo jingok gadis-gadistu nyari kutu."

Wak Agus bukak omongan. Dio dak tahan dari tadi enjingok uwong bae, tapi idak seomongan.

"Awak naksirnyo yang manola Wak Agus?"

"Hussssy .. Wak ini. Kitoni latuwo. Lenak parak masuk liang kubur."

"Bukan untuk kito Wak Agus ..."

"Jadi untuk siapo?"

"Untuk siapo bae yang lum kawin."

Ha ha ha ha ...

"Ooooo ... Kalu itu aku .. Milih yang rambut panjang itu bae." Wak Agus nunjuk betino tinggi kurus item manis nyarike kutu konconyo.

"Samo kalu mak itu Wak Agus ."

"Yo ... Supayo adil kito sit baela," kato Wak Agus. Enjingokke limo jari tangan kanannyo. Siap usitan.

"Ai dak galak ai. Kalu aku kalah makmano. Padohal aku galak niyan dengan budak betinotu."

"Dak pacak dak galak Wak. Sebab, aku jugo galak .." Uji Wak Agus bekenceng nak betinotula. Padohal di sebelah betino item manistu, ado sikok betino lagi yang belagak. Beidung mancung, putih pulo cak kapas. Cuman sayang dak tinggi. Pendek.

Ribut-ribut, Wak Lung datang.

"Sudah-sudah. Pasal betino bae jadi ribut. Supayo adil makmanola kalu budak-budaktu kito panggil kesini. Galak dak?"

"Jangan Wak Lung." Wak Agus samo Wak Yeng nyekel tangan en sikil Wak Lung supayo dak turun ngenjuk tau budak-budak gadistu.

"Ngapo?"

"Kami kan penesan bae. Tul dak Wak Yeng?"

"Betul Wak Lung. Sebaiknyo kito becepet ke rumahnyo Wak Pet. Kagek kesorean. Iwak kalu la sore galak besingit. Dak berani metu ..."

Ha ha ha ha ...

"Ado-ado bae kauni Wak Agus. Yang namonyo iwaktu katikla yang besingit. Yang ado sumputan," uji Wak Lung.

"Samo bae Wak Lung, singitan samo sumputantu."

"Lainla Wak Agus."

"Makmano lainnyo?"

"Kalu singitantu dio yang istirahat. Tengah malem gek misalnyo," jelas Wak Lung sambil enggerak-gerakke tangannyo pecak guru ngajar di depan anak muridnyo."

"Kalu sumputan?"

"Dio galak tapi malu-malu."

Hua ha ha ha ...

2
"AI mano niyan beruk-berukni. La sepuluh menit di depan lawang dak katik apo-apo. La tengah ari, puaso pulo. Apo dak kesel ..."

"Oi Bah. Jadi dak mancingnyo?" Tanyo bini Wak Pet. Tangannyo putih galo-galo. Ngawek pempek dos untuk bukoan gek.

"Jadila Buk."

"Ngapo lum pegi. Nak mintak duit apo?"

"Ai ibukni ado-ado bae. Nunggu lanang tigoni. Lum datang-datang jugo. Apo jadi apo idak, lum tau."

"Telepon baela Bah." Saran Cek Pet.

"Itula masalahnyo Buk. Pulsa lupo beli. Abis."

"Kalu mak itu memang salah abah dewek. La tau nak pegi, hape abis pulsa. Sudah kalu mak itu. Ibuk lanjut ke dapur ..."

"Yang sedep Buk ye cukonyo."

"Ek ... eeeeee."

Wak Pet nyekel selopnyo. Dio la malek nunggu. Jadi bejalan bae. Mondar-mandir depan rumah. Kalu bae tejingok uwong tigotu.

Kriiiing ...

Kriiiiing ...

Mang Daus kebetulan lewat pakek sepeda embawak kempelang iwak delek.

"Nunggu siapo Wak?"

"Ai kau ruponyo Mang Daus. Ini lagi nunggu Wak Yeng. Lum teselik sampe mak ini. Ngomong-ngomong, Mas Daus tejingok dak?"

"Tejingok Wak."

"Dimano?"

"Di warung Wak. Denget lagi dio pasti kesini. Wak tenang bae ..."

"Syukurla. Tapi kau dewek nak kemano Mang?"

"Biasola Wak. Bekeliling. Kalu bae ado yang nyangkut," uji Mang Daus ngelap rainyo yang basah keno keringet.

"Idak payah apo. Panas mak ini ari bekeliling enjajoke kempelang?"

"Alhamdulillah idak Wak."

"Cek .. cek ... cek. Salut aku samo awakni Mang. Puaso lancar, bedagang jugo lancar."

Ha ha ha ha ...

Kriiiing ... Kriiing ...

"Payu Wak, aku keliling duken."

"Payu kalu mak itu. Ati-ati bae." Pesan Wak Pet. La pacak ketawo karno la tejingok Wak Yeng, Wak Agus samo Wak Lung.

Betigo jalan cepet. Limo langkah ngelambat. Mak itula begenti-genti. Cepet, lambat, lambat, cepet.

"Ngapo? Pecak nak ..."

"Biasola Wak. Latihan buko," uji Wak Agus, enjingokke perutnyo yang tibo-tibo ngecik.

"Tapi masih tahan kan?"

"Tahanla Wak Pet. Akutu cuman nak ngenjuk tau bae. Walau perut ngecik, puaso tetep tahan."

Plak ... pak .. pak .. pak ..

"Ini baru namonyo konco Wak Pet," uji Wak Pet. Dio nak metuke becak duken dari samping rumah.

Kloneeng ...

Kloneeng ...

Tek ... tek ... tek ...

Becak baru pacak tenaik ke jalan besak pas ditarik Wak Lung, Wak Agus samo Wak Yeng. Bangso Wak Pet dewekan pastila temundur lagi.

"Caro uwong puasola," kato Wak Pet dak kelemakan. Pecak ditunjukke niyan kalu puaso.

Tobe Continued