Entok (5)

Novel ...

Entok (5)
Oleh Wak Amin



9
WAKTU makan saur ...

Wak Pet tekejut. Madak'i lauk makan saur cuman tempe samo sambel. Yang dak abis pikir, duwo anaknyo Leni samo Lina malah kelemakan makan.

"Payu Bah. Sedaaap Bah. Cubola kalu dak cayo," kato Lina sambil enggigit tempe. Mak itu jugo Leni.

Cek Pet senyum-senyum bae.

"Buk, apo dak katik gulai lain?" Tanyo Wak Pet. Dari tadi gawenyo cuman enjingo'i nasi jeru piring.

"Makan baela Bah. Yang penting sedeeep," uji bininyo agak kepedesan karno kebanyakan igo sambel cengkedironyo. Sampe teabang galo nasi jeru piring seng.

Glek ... Geeek.

Glek ... Geeek.

"Duit kan la kuenjuk kemarintu. La abis apo?" Wak Pet keeranan. Dakken ado duit duwo puluh ribu la abis.

"Beli umpan abah." Cek Pet akhirnyo beterus terang. Karno lakinyo la bejanji kemarintu pasti dapet iwak. Jadi duit yang dienjuk untuk belanjo saur diabiske buat beli umpan.

"Sekarang nak kutanyo duken. Salah abah apo salah aku. Cubo nak kudenger duken omongan abahnyo."

Wak Pet dak kelemakan.

"Ngapo diem Bah?"

"Duwo-duwonyola Buk," uji Wak Pet selemaknyo bae enjawab.

Tanyo jawab terenti denget sampe Lina samo Leni pegi masuk jeru kamar. Besiap nak tiduk lagi.

Duwo laki binini sepakat ngelanjutke tanyo jawabnyo di kamar tiduk bae. Beduwo bae. Walau seru, kan dak katik yang endengernyo. Paling semut samo nyamuk.

"Idak pacak abahtu melok-melokke aku. Abah kan yang mancing. Abah kan yang ngongkon ngawek umpan. Abah kan yang ngomong, dak jadi apo duit abis, yang penting iwak dapet. Dakdo besak, kecik jadila."

Wak Pet tediem.

" Iyo. Tapi seharusnyo ibuk taula. Untuk saur, siapkela. Jangan tempe bae. Tambahkela iwak asin samo kemplang apo. Cak itu. Ibuk kan tau. Aku jugo makan yang namonyo iwak asin samo kempelangtu."

"Aku malu Bah."

"Malu ngapo?"

"Aku bukannyo dak tau kalu abahtu galak makan iwak asin samo kemplang. Tapi nak embelinyotu dak niyan katik duit sepeser pun. Bayangkela oleh abah ..."

"Ngutang bae ngapo Buk. Cak saro niyantu. Jangan tunjukke gino kalu kito saro."

"Dak pacak Bah. Yang namonyo saro dak pacak dak mesti ditunjukke. Mano galak uwong nak minjemi duit kalu kito gengsi ngomong saro ..."

"Kalu mak itu ngapo Ibuk dak ngomong bae Buk tadi?"

"Itula masalahnyo ..."

"Masalah?"

"Utang kitotu la betumpuk di warung sano ...buku utangan la penuh. Nak dilepakke kemano lagi kalu kito ngutang lagi."

"Apo hubungannyo ngutang samo buku utangan penuh Buk?"

"Adola ..."

"Apo?"

"Kito lum bayar sudah tigo bulanni. Sampe-sampe kato yang punyo warung ngomongke makmanola kalu aku ngutang bae ke tempat lain ..."

Wak Pet enggaut palaknyo.

"Ngomong-ngomong utang kito di warungtu la berapo banyak Buk. Cak seru niyantu?"

"La ratusan ribula abahnyo."

Wak Pet ngembek dompet dari kantong celanonyo yang dio lepakke deket gerobok pakaian.

"Ngapo? Abah nak embayarnyo apo?"

"Gek duken. Kujingok duken. Ado dak duit di jeru kelepitkuni."

Cek Pet  ngarep ado.

Tapi Wak Pet pecak uwong bingung bae. Sesen pun dak katik duit di kelepit. Cuman ado kertas kecik betuliske ...

" Dak katik duit dak apo-apo abahnyo ..."


10
WAK kito berempatni kompak ngumpul denget di pos ronda. Bukan apo-apo. Ado nak diomongke bae. Soal adola ..."

"Selik duken. Ado uwong dak." Wak Pet ngingetke. Dio dewek pecak uwong ditutul antu.

"Dak katik," uji Wak Lung. Baru bae balik dari ngencing parak pos ronda.

"Alhamdulillah," kato Wak Pet. "Sekarang aku nak becerito duken."

"Aku dulula," potong Wak Agus. Dak galak ketinggalan. Pengennyo nak duluan.

"Aku dulula oooo." Wak Pet dak galah ngalah.

"Sudah .. Sudah. Malu dijingok uwong. La tuwo masih galak bebalah. Mak ini bae. Siapo yang dulu datang ke pos rondani, diola yang duluan becerito. Setuju?"

Dak katik yang nyahut.

Karno yang datang lebih dulu Wak Yeng, diola yang berhak dapet giliran pertamo.

"Payu Wak Yeng. Beceritola pado kami betigoni. " Wak Pet la dak lesu lagi karno denget lagi beduk megrib. Tando kito boleh mecahke puaso.

"Mak ini. Aku semalemtu bemimpi didatengi wong betino ..."

Haaaa ...?

Tekejut galo.

Cantik dak Wak Yeng?" Tanyo Wak Agus pecak uwong kegatelan bae.

"Namonyo jugo betino. Pasti cantik," simbat Wak Yeng. Sengajo ngelambatke omongan.

"Bang," uji si betino, "Balikkela celano dalem akutu. Aku sekarang dak becelano ..."

Ha ha ha ha ...

"Ssssst. Jangan kenceng igo ketawonyo. Kedengeran uwong gektu," uji Wak Pet. Padohal dio len
ak ketawo ngekek. Paling besak ketawonyo.

"Apo kato kau taditu Wak Yeng?" Wak Agus penasaran. Bukan dengan cerito betinotu sebenernyo. Tapi makmano sampe betinotu dak pakek celano dalem.

"Katonyo. Kito berempatni ngembek celano dalemnyo idak permisi lagi."

" Terus .. Terus .. Marah dak dio Wak Yeng?" Giliran Wak Pet yang betanyo. Dio takut kalu betinotu ngamuk. Itu bae ..."

"Idak apo-apo. Dio dak marah dak samo kito berempatni. Cuman dio pengennyo kito becepet nemuke celano dalemnyo. Dahtu enjukke ke dio. Kelarlatu ..."

Eeeeeemm ...

"Mak itu." Wak Lung, Wak Pet samo Wak Agus manggut-manggut.

" Retinyotu samo dengan mimpi aku semalem," kato Wak Lung.

"Biso samo makmano ceritonyotu Wak Lung?" Wak Pet eran. Entah makmano galak galo nak becerito. Padohal giliran dio. Tapi dak apola. Lain ari biso ...

"Dio dak lamo dak ngomong samo aku. Denget. Paling semenit. Dahtu ilang entah kemano."

"Pasti ado pesan. Beceritola samo kami. Jangan dipendep bae ..." Uji Wak Agus, nambah besemangat endenger cerito. Lapar dak teraso. Yang teraso cuman di pos ronda dak lagi terang. La agak gelep. Denget lagi pacak gelep niyan.

"Dio mintak balikke gancang sempaktu. Jangan lamo igo. Itu bae pesannyo."

Oooo ... Mak ituuuu ...

Wak Lung lego sudah becerito. Kalu bae ado jalan metunyo.

"Wak Pet."

Eheeem ..

"Mak ini bae. Karno la malem. Mun ujiku, makmano kalu kito cari besok bae ..."

Wak Lung keberatan.

"Aku takut dio marah ..."

Ha ha ha ha ...

"Diemke bae Lung. Madak'i samo betino takut, nak jadi apo lanang sikokni."

Wak Agus nyaranke, kalu wong betinotu datang lagi malem gektu, omongke bae, dicarinyo besok bae. Dak antu dak manusio, pasti ngertila.

"Makmano kiro-kiro?" Tanyo Wak Pet.

"Kito cari besok baela yo. Oke?"

"Okeee ..."

Tobe continued.