Entok (6)

Novel ...

Entok (6)
Oleh Wak Amin


11
TEPAKSOLA Wak kito berempatni becariyan sempak. Wak Yeng deket danau kecik samo Wak Agus. Naa, Wak Lung samo Wak Pet ngelilingi rumput-rumput yang tumbuh di sekeliling danau.

Yo namonyo jugp puaso. Aus samo laper la jelas. Siang pulo. Amun dak kuat biso pecah puasoni. Mecah diem-diem. Sebab, kalu sampe ketahuan uwong rumah, pasti keno marah.

"Makmano Wak Yeng. Dapet dak?" Wak Agus tibo-tibo sakit pinggang. Kelamoan igo nunduk. Embawak kayu kecik, segalo kayu atau apo bae yang nyelip parak danau, dijingok'i.

"Mun mak inila kito dak dapet Wak Agus. Ari gek la sore. Celano dalem lum jugo ketemu. Bahayo Wak .." Uji Wak Yeng. Ngajak ke kiri, dak jauh dari batang pisang.

"Bahayo ngapo Wak Yeng?"

"Kito bakal diusir dari rumah."

Wak Agus tediem.

"Bener jugo uji awaktu Wak Yeng. Cuman kalu bukan salah kito lagi. Kitola becariyan. Mun dak dapet jugo, yo apo boleh buat. Kito tahanke bae. Kalu bae betino antutu dak ngemarahi kito."

"Makmano Wak Lung samo Wak Pet?"

"Samo bae. Lum dapet jugo. Padohal yang endapetke sempaktu Wak Lung. Cuman, karno dak pulo ngiro sampe mak ini kelanjutannyo."

Dimanola Wak Lung ngelepakkenyo.

"Naaa. Aku lupo. Ngelepakkenyo dimano," kato Wak Lung. Ngomong dewekan.

"Disano Wak," uji budak rame-rame. Baru nak pegi maen layangan.

"Dimano Cung?" Wak Lung langsung marak'i budak item kecik tapi cakep.

"Situ Wak!" Nunjuk parak tanah tinggi dak jauh dari jalan besak.

"Mokasih yo Cung." Wak Pet becepet ngomong. Dio ngeliyat budak-budakni lagi ladas niyan nak maen layangan.

"Biarla kito beduwo bae nyarinyo Wak Lung. Yang penting tempatnyo kito la tau," kato Wak Pet, la pacak ketawo.

Tadinyo, dari ninggalke rumah sampe nyari celano dalemtu, Wak Pet merengut bae samo Wak Lung.

"Alhamdulillah," uji Wak Lung. Bardoa denget. Dahtu becepet ke tempat yang ditunjukke budak taditu.

Wak Yeng samo Wak Agus teeran-eran enjingok Wak Lung en Wak Pet belari sambil joget, melunjak-lunjak mecem budak kecik makek baju  baru.

"Ngapola uji awak, Wak Agus?"

"Kalu la ketemu ..."

"Celanonyo?"

"Iyooo .. Kito susul baela Wak Yeng. Mano tau bener ..."

Jauh jugo nutul Wak Lung samo Wak Pet. Pecaknyo bae deket. Lum lagi batu kerikil. Kapan teinjek  bedenyut. Sakitnyo sikilni minta ampun.

Tapi sesakit-sakitnyo sikilni,  kalu yang dicari ketemu alias dapat, dak pulo teraso. Baru kerasoan kalu sikil la sakit, yang dicari dak jugo ketemu.

Wak Lung kemengesan enggeserke batu besak dewekan. Mangkonyo dio mintak tolong Wak Pet yang sebenernyo sejak tadi nak nolong.

"Dikit lagi Wak Pet." Sampe teabang rai uwong duwoni ngangkat  batu besaktu.

Duuup ...

Plaaak ...

Nyampak lagi. Tadi la terangkat dikit. Endenger suwaro Wak Yeng manggil-manggil, Wak Lung samo Wak Pet teduduk.

Untung bae dak tekeno sikil. Kalu sampe keno, amen bengkak la jelas. Sakitnyotu pacak seminggu lebih baru ilang.

"Sudah kalu mak itu. Kito berempat endorong batu besakni," kato Wak Pet enggulung lengan bajunyo supayo dak kotor. Keno becek.

"Oke?"

"Oke Wak Pet."

"Satu ... Duwo ... Tiii ...goooo."

Draak ...

"Terus ... Terus gelindingke bae." Uji Wak Pet. Batu besaktu akhirnyo masuk jeru danau.

Duuum ...

Bleeeep beeep ...

Preeesh ...

Celano dalemnyo?

"Ini ...," kato  Wak Lung sambil ketawo nyelik sempak betino bolong duwo ikok.


12
"WAK Luuuuung...!"

"Siapotu?"

"Wak Luuuung ..!"

"Siapotu?"

"Wak Luuuung ...!"

" Siapotu?"

"Apo dio kauni Bah. Siapo?" Cek Lung dari tadi merengut bae. Bukan apo-apo. La dalu mak ini, lakinyo lum tiduk-tiduk jugo. Sebentar-sebentar ke kiri, sebentar lagi ke kanan. Makkayo cacing kepanasan. Iyo kalu di jalan beaspal. Ini kan pucuk kasur. Lembut. Bekipas angin pulo.

"Wak Lung!"

"Siapotu?"

"Mano sempak aku. Balikkela gancang ..."

"Anuu .. Anuuu ..."

Kesel endenger  ngomong dak jelas, dicubitnyola paha Wak Lung.

Tebangunla wak kitoni. Senyum-senyum bae ...

"Apo anu .. Anutu haaa? Cepet omongkela. Kalu daktu kuceturke gek ranjangni," ancam Cek Lung. Turun dari ranjang sambil teken pinggang.

"Anu Buk. Anuu ..."

Entah makmano, payah niyan Wak Lung nak ngomong. Padohal dak payah igo kalu dio galak ngomong. Enjuk tau bae  ngapo.

Dak galak ai.

"Yo sudah kalu dak galak ngomong. Aku nak tiduk lagi. Tejelitla dewekan."

Ngambik bantal guling. Tiduk miring ke kanan. 

"Alhamdulillah," ucap Wak Lung jeru ati.

Untung bae dak teomong. Kalu sampe kuenjuk tau, matila aku. " Pasti dikiro aku selingkuh pulo."

Selain babak belur digebuki bini, kato Wak Lung, masih di jeru ati, malunyotu yang dak ketahanan.

Apo kato uwong-uwong?

" Wak Lung selingkuh dengan antu betino ..."

Pasti ngerila wong sekampung. Pacak lari tekincit-kincit.

"Wak Lung gilo. Wak Lung kesurupaaaaan ..."

"La tau ado bini. Masih nak bebini lagi .."

" Bininyo ... Bininyo ..."

"Siapo?"

"Antu betinooo .."

Wak Lung nyium pipi bininyo denget. Dahtu nelentangke badan, ngadepke rai lurus ke pucuk penaku.

"Maafke aku Buk. Aku bukan dak galak ngenjuk tau. Tapi aku takut tejadi apo-apo samo kito beduwo....."

"Abah sayang ibuk selamo-lamonyo."

Cek Lung batuk-batuk ...

" Ngomong apo abah barusan?"

"Dak katik Buk."

"Dak usahla bohong abah samo akutu," kato Cek Lung. Embalikke badannya.

Samo-samo nelentang ...

"Ngomong apo Bah?"

Tepaksola Wak Lung ngenjuk tau.

"Abah sayang ibuk selamo-lamonyo .."

Ha ha ha ha ...

Hi hi hi hi ..

"Kanji tuwo abahni .."

"Kalu abah dak kanji dak beranak ibuk tu."

"Iiiiich kau ..."

"Aduh Buuuk .."

Cubitan  Cek Lung sebenernyo dak pulo kuat igo. Tapi yo itu tadi, nun cep ke daging. Sakitnyo dak pacak ngomongkenyo.

Tobe continued