Mang Kerio (93)

Mang Kerio (93)
Oleh Wak Amin




DI taman kota ...

"SEBENERNYO .. akutu ngesir samo kautu Dek," uji si lanang, duduk di sebelah Nona Elen. Kursi panjang berwarna warni.

Nona Elen tekejut ..

"Maaf Kak yo. Sebelum kujawab biso dak begeser dikit tangannyo," kato Nona Elen.

Si lanang enggeserke tangannyo. Kalu taditu ampir nyekel tangan Nona Elen, sekarang balik ke awal. Dilepakke pucuk paha.

"Sebenernyo apo sih maksud kakak tu nyolong celano dalem akutu?"

Si lanang tediem denget ...

"Cuman nak ngasah ilmu bae Dek," kato si lanang.

"Ilmu apotu Kak?"

"Ilmu nundukke betino ..."

"Maksudnyo supayo betino yang kakak incar galak cak itu?"

"Bener sekali Dek."

"Kalu misalnyo si betinotu dal galakna, cakmanola Kak?"

"Dipakso galak."

"Terus .."

"Kalu dio tetep dak galak, yo tepak sola disantet."

"Santettu apo Kak?"

"Yo santetla Dik," uji si lanang agak dak lemak ati. Takutnyo kalu diomo ngke Nona Elen berubah takut. Laju gek dak galak samo dio.

"Supayo uwong celako dak?"

"Eeem ..." Ecak-ecak bingung.

"Kakak jujurla samo aku. Supayo uwong celako kan?"

Si lanang ngiyoke ..

"Cuman biasonyo dak sampe mak itu Dek."

"Maksudnyo?"

"Tibo-tibo betinotu galak. Klepek-klepek. Malah ado yang sampe eng gari kito," uji si lanang, tepakso bu ka' kartu.

Ooo cak itu ...

"Eeem balik ke aku Kak. Cakmanola kalu kito bekawan bae ..."

Si lanang tediem.

Dibalik kersi panjang tetutup bungo Dahlia, Mang Kerio samo Cek Leh ketawo ngekek.

"Tau raso sekarang si lanangtu," uji Mang Kerio.

Ssssst ..

"Kito tunggu Mang kelanjurannyo," kato Cek Leha.