Cerkom (Cerita Komedi
)
Warung Kopi (1)
Bagian Pertama
Oleh Om Amin
I
“ASSALAMUALAIKUM Mang Cek!” Kata Mang Fir sambil embukak
plastik penutup jualan Mang Cek.
“Waaaikum salam. Dari mano bae kau Fir. La lamo niyan dak
kejingokan,” jawab Mang Cek, ngudek-ngudek kopi samo gulo.
“Biasola Mang Cek. Caro wong sarola,” kato Mang Fir.
“Ngembek pisang goreng sikok, tejerit karno kepanasan.”
Astaghfirullah …
“Mangkonyo Fir. Kalu nak makan gorengantu ditanyo duken samo
yang enjualnyo. Masih anget apo la dingin,” uji Mang Kasim yang baru bae balik
dari pasar.
“Yo kelupoan. Biasola amun la kelaparan pecak inila. Lupo
noleh kiri kanan. Lajuke bae.”
Ha ha ha ha …
“Na Mang Fir, kopinyo. Sebenarnye untuk aku, karno kau yang
datang, untuk kaula. Masih panas. Awas. Kagek enjerit pulo,” kato Mang Cek.
Narokke segelas banyu kopi manis samo piring kecil di bawahnyo.
“Aku jugo sikok Mang Cek. Ngiler pulo laju.” Mang Kasim
ngelepakke belanjoannyp denget, dahtu bekipas pakek kain buruk.
“Manis apo masem Mang Kasim?”
“Ai Mang Cekni. Ngolakhe aku bae. Setahu aku dak katekla
yang namonyo kopi masem. Kalu jeruk memang ado,” simbat Mang Kasim ketawo
libar.
“Ado Mang Kasim. Itu, kopi yang dienjuk jeruk kunci,” uji
Mang Fir melok ngomong pulo. La pecak kesedepan ngirup kopi samo enjejelke
bakwan goreng.
“Itu bukan namonyo kopi masem Mang Fir. Itu namonyo kopi
jeruk …”
Hua ha ha ha ha …
Sambil ngopi, bekelakar. Lemak niyan. Cuman kelakar arini
soal antu yang galak engganggu wargo kampung.
Banyak wargo yang ngeluh, takut dan gelisah. Ado yang
pecayo, ado jugo yang idak. Yang pecayo keba nyakan betino. Yang idak pecayo
rato-rato lanang.
Si antu baru engganggu kalu la malem. Kadang di depan
lurung. Kadangtu di rumah kosong. Kadang jugo rumah yang ada penghuninyo.
Kalu yang dibucu gang penampakannyo mecem-mecem. Kadang cak
budak mudo; idak bujang yo betino, gadis cindo.
Kadangtu jugo penjingokan kito cak uwong tuwo. Kadang
engganggu, kadangtu idak. Yo namonyo juga antu. Ganggu dak engganggu tetep bae
namonyo antu.
Ngapo mak itu?
Kito yang enjingoknyo, atau paling idak pacak ngerasokenyo,
pastila ada raso takut. Bulu kuduk tibo-tibo merinding, tegak galo-galo.
Bukan dak pacak belari bukan. Pacak bae. Tapi yo itula.
Karno takut, sikil ini payah nak enggerakkenyo. Sungkan beringgut, nak mendep
tula. Kalu sudah cak ini, kalu dak pingsan, yo tekencing di celanola.
Kalu di rumah kosong lain lagi. Kapan kito masuk terumpak
ado yang tejingok. Ado suaro-suaro yang manggil kito. Ada suaro uwong benyanyi
di kamar, waktu kito jingok, dak katek apo-apo.
Atau yang lebih serem lagi. Pintu kamar misalnyo, tibo-tibo
bukak tutup. Ado suaro uwong bejalan. Jugo ado yang tedenger suaro mintak
tulung. Dak pulo tau dimano.
Kito yang penakut, ecak-ecak berani, jangan niyan makso diri
masuk ke rumah kosong. Pacak tepucet.
Kapan metu gek dak katek darah lagi.
Cubola kalu dak pecayo. Cubola sekali-sekali ngelewati rumah
kosong malem ari. Ngeri kan? Apolagi amun la temasuk ke jerunyo. Bayangkela
sambil engguling.
Kalu di rumah yang ado penghuninyo lain lagi. Kalu kito di
kamar mandi misalnyo, ado-ado bae yang tedenger oleh kito. Idak suaro banyu
ledeng yang ngocor, uwong lagi mandi, atau suaro uwong nyiul-nyiul.
Kalu kebetulan siang, kito dewekan, masih pacakla diberani-beranike.
Tapi kalu tengah dalu umpa ma nyo, apo pacak.
Lum tentula. Kito yang lum tebiasoni pacak tedemem. Dio
memang dak secaro langsung engganggu kito-kitoni.
Misalnyo cak ini. Kito tiduk dewekan, atau beduwola di
kamar. Tibo-tibo, ini biasonyo, kito tebangun. Nah, kawan kito idak. Tetep
tetiduk.
Waktu kito tebangun taditu, ado wong noktok kamar kito. Kito
yang dak tauni, jalanla ke deket lawang. Kapan dibuka’ke, dak katek
siapo-siapo.
Jadi siapo?
Na, pasti kito takut. Bener dak? Madak-I tengah malem ado uwong
noktok kamar kito. Kalu dak antu, siapo lagi. Kalu uwong pastila, kapan pintu
dibukak, dio ado. Dak tegak, duduk. Idak lanang, yo betinola.
Selain tigo tempat taditu. Kadang jugo kito tejingok
penampakan di jalan besak yang ado pohonnyo. Kato uwong disitu banyak antunyo.
Penunggunyo, wong biaso nyebutnyo.
Nak embuktike disitu ado penunggunyo apo idak, idak mudah.
Karno uwong lain dak kan pecayo. Kapan la teselik baru pecayo. Tecuguk di depan
mato, baru nak enjerit.
Jadi janganla eran,
misalnyo, kalu kito kebetulan jalan samo-samo konco kito bemotor di
tempat gelep yang banyak pohonnnyo, terumpak lain penjingokan. Rewang kito yang
tadinyotu dak beboncengan, tibo-tibo ada boncengan. Beduwo entah samo siapo.
Na, yang nak embuat kito tepakso nak ngekek ketawo tapi dak
jadi, dak lamo kito sampe rumah, kito tanyo rewang kito taditu, siapo niyan
yang dio bonceng taditu.
Apo jawabnyo?
Pasti idakla. Karno tadinyo waktu bemotor dewek-dewekan, dak
katek yang dibonceng. Uji kito tejingok ado yang dibonceng, rewang kito taditu
pasti lum pecayo dengan omongan kito.
Ngolahke pasti dak lain, itu jawabnyo. Dio baru pecayo kalu
kito serius ngomongkenyo, atau kito samo dio la bekawan lamo. Sudah tau asem
uyanyo.
“La berapo lamo mang engganggu?” Tanyo Mang Kasim. Sempet batuk-batuk
sudah ngirup banyu kopi. Mang Cek nunggu Mang Kasim selesai batuk, baru dio
ngomong.
“Adola semingguni,” kato Mang Cek. Duduk denget. Kecapekan
pulo. Dari jam tujuh pagi tadi enggut jam sebelas, baru sekarang sempet duduk.
“Dari mano Mang Cek tau?” Mang Fir melok nanyo karno yang
namonyo cerito antu pasti galak galo uwong endengerkenyo.
“Dari uwong-uwong yang ngopi disinila. Sambil ngopi dio
cerito soal antu. Kapan ditanyo do niyan apo, katonyo ado. Cuman aku lum sempet
ngeceknyo. Ado niyan apo idak …” Uji Mang Cek tesenyum dewek.
“Dimano Mang Cek nak ngeceknyo?” Keperi semangatnyo betanyo,
banyu kopi sampe temetu dari mu lut Mang Fir.
“Iyo mang. Ini kan antu. Mang Cek nak ngeceknyo dimano?”
Mang Kasim melok pulo betanyo. Kalu la tau tempat ngeceknyo, kapan ado waktu,
pengenla sekali-sekali nak melok ngecek pulo. Mano tau ado niyan antunyo.
“Di kuburanla.”
Haaaa …
“Apo dak salah Mang Cek. Kalu bukan di kuburan, tapi di
jalanan besak …”
Ha ha ha ha …
“Ado-ado bae mamang betigoni. Ngecek antu segalo. Antutu dak
pacakla dicek. Dijingok mungkin, tapi denget. Dak jelas pulo. Bener dak
omongankutu?” Bujang bedengkang melok ngopi, tapi ngutang duken samo Mang Cek.
Ado duit baru bayar. Dak ado duit terusla ngutang.
“Benerlatu ponakan ..” Simbat Mang Cek. Akutu penasaran bae
dengan omongan uwongtu.
“Penasaran ngapo Mang Cek?” Tanyo si bujang yang galak
bejalan melenggang kayak pempek lengang abis dipanggang.
“Uwong becerito, akhir-akhirni antu lagi galak main-main di
kampung kitoni. Mamang pecaya bae. Tapi yang lain apo pecayo. Idak kan. Na,
supayo jelas, mamangni cerito samo bapak duwo ikokni. Kapan memang harus dicek.
Ado niyan dak antu engganggu wargo kitoni …”
“Dak usahla mang.”
“Ngapo ponakan?”
“Yang jago warung kopi mamang gektu siapo?”
Antu …
Ha ha ha ha …
II
“ABAH … Auuwww!” Teriak Jamilah, waktu duduk tengah dalu di
ruang tamu. Nonton tivi idak, mato sedenget-sedenget ke pucuk. Mulut dak
berenti begerak-gerak.
Mang Fir, bapaknyo Jamilah, dak nyangko niyan yang dio
tangkep dari burit bukannyn antu. Tapi anaknyo dewek.
“Mecem-mecem bae abahni. Anak dewek dipeluk-peluk. Mati
kekanjian,” kato bini Mang Fir, narik tangan anaknyo, tegak parak dio di deket
televisi.
“Maafkela abah Jamilah. Abah kiro …” Mang Fir nutup mulutnyo
sambil ketawo mato tejelit.
“Kiro apo? Abahtu yang kekanjian. Awak latuwo, balik abege
…” Simbat bininyo merengus seabisan.
“Abah kiro antu Jamilah. Maafke abah yo …”
Jamilah ngangguk. Uwong lain bae dimaafke, uwong tuwo dewek
idah, kelewatan namonyotu.
“Abahtula yang antu. Katik-katik antu di rumahni.” Bi Cek
Fir lum jugo ketawo. Taditu memang sempet nak ketawo, enjingok lakinyo ngajak
ketawo, dio ngulang lagi merengut.
“Sudah buk .. abah. Jamilah sudah maafke abah. Kalu mak itu
kito masuk jeru kamar lagi,” kongkon Jamilah. Endinginke suasana yang
kejingokannyo taditu nambah panas bae.
“Dak galak. Masukla dewekan,” kato Bi Cek Fir. Nambah
merengut, mato tejengil, pipi kempot.
La bekali-kali dirayu, dak jugo mempan. Dasar kepalak batu.
Akhirnyo Mang Fir samo anaknyo Jamilah yang masuk jeru kamar. Tinggalla dewekan
Bi Cek Fir di ruang tamu.
Ngapola dio?
Dak katik apo-apo sebenarnyo. Urusan Mang Fir dengan anak
gadisnyo Jamilah sudah selesai. Dasar bae betino mintak alem. Biasola bulan
tuwo. Yang bener bae jadi salah. Yang salah? Nambah salah. Dak teke ruan aguk.
Kiro-kiro sepuluh menit dahtu, Bi Cek Fir, yang tadinyo la
tenang, panas lagi. Ngapo mak itu?
Ruponyo, lehernyo pecak ado yang ngerabo-rabonyo.
“Sudahla Bah. Gek saro awaktu …Kupelinyetke kepalak awak,
baru tau kau.”
Hilang denget, ngulang lagi rabo-rabian taditu.
“Sudahla abah. Aku lagi dak mut mak inini. Kagek kuceturke.
Tepelacit kau.”
Hilang nian. Lum ado lagi yang ngerabo-rabo. Senengla Bi Cek
kitoni. Dio pacak ngeluncurke sikilnyo pucuk meja. Makso tiduk.
Antaro tiduk dengan idak, lehernyo pecak ado yang
ngerabo-rabo lagi. Kal taditu dak apo-apo, sekarangni ngeraso geli dikit.
“Belajar dimano abah ngerabotu ha?” Tanyo Bi Cek Fir
kelemakan. Kalu cak ini dak apo-apo dirabo. Lemak rasonyo. Kalu yang cak
taditu, aaaa, lemak dak usahla.
“Ngapo berenti Bah?”
Raboan leher dilanjutke lag. Kalu tadi dari kiri ke kanan,
sekarangni ke bawah leher.
“Ai cacam. Alangke mantapnyo raboan abahtu. Kalu mak ini
terus, galakla aku tiap malem mintak raboke. Galakkan Bah?”
La sampe empat kali dak nyimbat, Bi Cek kitoni noleh. Dak
katik uwong ruponyo. Jadi siapo yang ngerabo-rabo taditu.
“Mecem-mecem bae uwong sekarang. Ngerabo bae pakek
nyingit-nyingit segalo,” kato jeru ati Bi Cek Fir.
Dio lanjutke tiduknyo. Belum tetiduk jugo ruponyo. Cuman,
waktu dio nak beringgut, ado lagi yang
ngerabo palak samo lehernyo.
“Alangke sedepnyo,” uji Bi Cek kito. Raboan kalini naik
turun. Lembut niyan. Tapi Bi Cek Fir mulak-I curiga karno raboan kalini pecak
dingin. Pecak dirabo uwong yang tangannyo basah.
Bi Cek lum ngapo-ngapoii. Pasalnyo, selain dak pulo dingin
igo, raboannyo, keperi lemaknyo, lupo kalu tiduk di pucuk kursi.
Sambil nginget-ngingetku apola yang nak dibeli besok pagitu.
Kangkung masih ado. Iwak samo daging jugo. La dipikir-pikir. La dipikir-pikir,
lum tau jugo besoktu beli iwak teri samo iwak asin sepet.
“Lambat-lambat baela,” kato Bi Cek Fir. Agak kuat, dahtu
pecak nak becepet raboannyo.
“Auuuw …”
Nambah cepet bae raboannyo. Dak tahan lagi, Bi Cek Fir noleh ke buri. Dak katik uwong jugo.
“Abaaah … Jamilaaaaah!”
Sampe tigo kali dipanggil-panggil, anak samo lakini becepe
datang.
“Ngapo Buk. Ngapo Buk? Tanyo laki samo anaknyo serempak.
“Ngapo, ngapo. Abah jingok dak wong diburiku tadi?”
“Dak pulo tau Buk. Kamekni baru bae bangun. Ado uwong
enjerit, langsung metu dari jeru kamar.”
“Jadi, siapo yang ngerabo leher ibuk taditu. Abah idak?”
“Idakla. Ibuk kan tau kalu kamek beduwo masuk kamar taditu.
Ibuk liyat kan?”
“Iyo Buk,” simbat Jamilah. “Berat nak ninggalko ibuk dewekan
di ruang tamuni. Karno ibuk tetep makso, yo apo boleh buat. Kamek tinggalke.”
Bi Cek pingsan.
Dibawak Mang Fir samo Jamilah ke kamar. Ditelentangke.
Kiro-kiro limo menit, sadarla Bi Cek kitoni. Dio ngongkon lakinyo ngambekke
banyu putih anget.
“Ini jadila Buk,” kato Mang Fir. Anget jugo banyunyo masih.
Glek .. gek … gek …
“Istirahatla duken ibuktu,” kato Jamilah sambil ngelap kelek
samo rai ibuknyo.
“Dak pacak anakku,” kato Bi Cek Fir, ngongkon lakinyo
nuangke lagi banyu putih ke mulutnyo.
“Ngapo dak pacaktu Buk?” Tanyo Jamilah. Abis ngelap rai, turun ke sikil, kanan kiri.
“Yang ngerabo ibuktuna. Siapo laye?”
“Siapola Bah?” Jamilah ngarepke niyan abahnyo pacak
enjawabnyo. Supayo ibuknyoni dak mecem budak kecik baru lahir mak ini.
Mang Fir ecak-ecak mikir. Dio latau. Kalu dak antu, siapo
lagila. Cuman takutnyo, kalu diomongke gektu bininyoni pasti dak pecayo.
Bener dak?
“Bah … siapo? Bi Cek Fir pecak nak nangis. Jamilah kasiyan
jugo nyingoknyo. Taditu pecak nak makan uwong. Sekarangni mintak tulung niyan.
“Bah …” Karno kesel, dijeritkenyola oleh bininyo.
“Antu Buk … antuuuuu.” Kato Mang Fir.Pucet karno tekejut.
Dak nyangko bininyo nekad enjerit.
“Mano Bah. Mano Bah?” Jamilah samo ibuknyo becepet endeketi
Mang Fir. Ketakutan.
Setelah dijelaske Mang Fir, Bi Cek baru ngerti kalu yang
ngerabo dio taditu adalah antu. Jamilah yang endengernyo nambah takut.
“Bah … kalu gadis pecak akuni diganggunyo dak, Bah?”
“La iyola pulo …”
“Eeee … jadi makmano Bah?”
“Yo makmano. Namonyo
jugo antu. Kito dak pacak enjingok dio, dio pacak enjingok kito. Jadi kito dak
tau. Yang jelas, namonyo antu, galakla
engganggu kito,” uji Mang Fir, ngongkon anak bininyo tenang. Dak usah takut,
apolagi manja ngadepi antu.
“Di lawan yo Bah?” Kato Jamilah sambil enggulungke lengan
bajunyo.
“Nak ngapo kautu Jamilah? Tanyo emaknyo. “Dak usahla cak nak
betatuantu. Makmano kau nak ngelawannyo. Tejingok bae idak kau …”
“Akutu dakdo nak ngelawan dio, Buk?”
“Ngapo ngulung-ngulungke lengan bajutu?”
“Nak ngembek banyu wudhu’ Buk. Nak sembahyang …”
Ha ha ha ha …
“Cak kealiman bae. Sano embekke ibuk nasi samo iwak. Ibuk la
laper …”
“Banyak apo idak nasinyo Buk?”
“Teserah kaula, apo nak banyak, apo nak dikit bae …”
“Jangan lupo Milah. Kopi untuk abah kauni,” kato Mang Fir
nyiapke bantal supayo bininyo pacak embadok sambil besender di pinggir tempat
tiduk.
“Manis apo pait Bah?”
“Manis bae …”
Jamilah becepet nak bukak lawang, tapi dak jadi.
“Ibuk jugo kopi?”
“Iyo … sepanci besak …”
Ha ha ha ha …
“Ibuk-ibu,” uji Jamilah sambil embukak lawang … “Nambah tuwo
nambah gilo …”
III
“EMBEKKE duken uya, Buk.” Kato Mang Fir samo bininyo yang
dak lepas nyekel kainnyo dari tadi.
“Milah baela Bah,” simbat Bi Cek Fir dengan suaro gemeteran.
“Milah!”
“Ya abah,” kato Jamilah dari balik televisi.
“Kau tulung abah, embekke uya di dapur yo …”
“Beresla Bah.”
Bi Cek Fir senyum lego enjingok Jamilah bejalan tegep,
gancang.
“Mudah-mudahan bae dapet laki kayo yo Bah. Bukan cak abah.
La saro, rai dak katik embekkan …”
Ha ha ha ha …
Ketawo dak lemak. Ngesak ado, marah jugo ado. Iiiy … rasonyo
untalketula betino sikokni. Banyak omong, en selalu enjahatke laki. Gawenyo
nguyok-nguyok-I uwong …
“Ini Bah, uyanyo.” Jamilah senyum-senyum dikit sambil
enggendonf=g segelok besak uya alus.
“Cubo dikit bae Jamilah.”
“Kagek kurang pulo abah. Mano tau abah perlu uya yang
banyak. Kan dak susah-susah lagi bolak-balik ke dapur. Mano la buruk, gelep
pulo.” Kato Jamilah, nuangke uya ke telapak tangannyo, dienjukke samo abahnyo.
“Cukup kan Bah?”
“Cukupla.”
“Memangnyo nak diapoke Bah uyatu?” Tanyo Bi Cek Fir.
Seumur-umur baru malemnila ado wong lanang megang uya. Kalu rokok la sering.
“Jingok baela. Kamuk beduwo jangan banyak tanyo. Nurut bae.
Apo yang abah suruh, kerjoke. Roger?”
“Bukan roger, Bah. Oke?” Jamilah nepuk-nepuk pundak abahnyo.
“Oke?”
“Okeee …” Simbat Jamilah samo emaknyo. Bejalan endeketi buri
kursi tamu.
Mang Fir naburke sedikit uya di tangannyo, di buri kursi
tamu tempat diman bininyo ngeraso dirabo-rabo antu. Sambil nabur, dio ngomong cak
ini …
“Uya bukan basing uya
Uya ini luar biasa
Siapo temakan pacak pingsan
Siapo enjingoknyo
pasti cengengesan …
Antu .. marakla kalu
berani
Jangan besumput
bae
Lawanla kamek
punyo diri
Siapo kalah
dak usah engganggu lagi …
Antu
penunggu rumah ini
Jangan besak lagak
Engganggu uwong tapi dak nampak
Kalu kamuk berani
Tampakkan kamu punyo diri …
Wahai antu …
Setelah kutaburi uya ini
Berjanjilah kepada kami
Tinggalkanlah tempat ini
Sebab kalu sampe idak
Jangan kami sampe beraksi
Idup mati supayo kamuktu pado lari …
Wahai antu ..
Aku kalu
ngomong cukupla sekali
Kalu aku ngomong sampe duo
tigo kali
Biso
bahayo kamuk punyo diri …
Antu …
Antu …
Enyahlah kau …
Matila kau gancang …
Jepraaa …
Kupraa …
Cekraaa … “
Allahu Akbar …
“Kemano lagi Bah?” Biniyo la dak tahan. Bukannyo takut, tapi
la ngantuk berat. Matoni dak pacak lagi ngeliyat keperi ngantuknyo.
“Kito bekeliling duken, Buk, Jamilah.” Kato Mang Fir,
embawak gelok uya.
“Aku tiduk be yo Bah. Lajula kamu beduwo ..”
Bi Cek Fir becepet masuk kamar. Nak tiduk. Jalannyo bae la
dak lurus lagi. Pecak uwong mabuk. Abis minum. Kadang ke kiri, kadang ke kanan.
Jamilah dak tega enjingoknyo. Dituntunnyo emaknyo sampe masuk jeru kamar. La
telentang pucuk tempat tiduk, la tepejem niyan matonyo, baru dio metu lagi
nemui abahnyo.
“Bah … abah … abah …”
Dak katik lagi abahnyo di ruang tamu.
Kemanola dio?
“Abah … abah … abaaaah …”
Jamilah bingung, nak kemano nyari abahnyo. Metu dari rumah
dak mungkinla. Gelep. Katonyo taditu di sekitar sinila.
“Jamilah … Sini Nak!”
Jamilah lego. Abahnyo tecuguk deket lawang masuk. Sambil ngaduk-ngaduk uya, dio
ngomong samo anaknyo kalu dio baru bae metu dari kamar kecik. Kebelet nak mising.
“Kamu pegang geloknye ye.” Kato abahnyo sambil naburke uya
di telapak tangan ke parak dinding lawang masuk. Terus maju dikit ke deket we
se.
Berenti denget parak gerobok yang isinyo songket menyongket.
Dahtu dilanjutke ke lawang samping, dapur samo gudang.
“Capek dak kau Jamilah?” Tanyo abahnyo. Walau la tekeliling,
Mang Fir tetep kuat. Dak ado raso capek, apolagi ngantuk.
“Lum Bah,” uji Jamilah. Numpahke uya lagi dari gelok ke
telapak tangan abahnyo.
“Bah …”
“Ngapo Jam?”
“Ngapo tangan abah pucet. Abah sakit yo?”
“Idak ah. Mungkin bae keno banyu taditu. Kelamoan gino di
banyu, jadi kulitni agak pucet.”
“Oooo cak itu …”
“Sudah. Kito kesano lagi.” Abahnyo nunjuk kamar kecik,
tetutup lawangnyo.
“Kalu cukupla Bah. Lenak subuh pulo. Tiduk lum.” Jamilah
nyaranke, kalu misalnyo, nak tetep diteruske, besok pagi bae …”
“La tanggung Jamilah,” uji Mang Fir.
Karno la ado raso ngantuk, sudahtu takut subuh lewat,
Jamilah mutuske tiduk be nyusul emaknyo yang sudah duluan tiduk.
“Yo sudah. Tidukla sano. Abah kesano duken ye …”
“Ati-ati Bah.”
Sambil nguap, Jamilah begancang masuk jeru kamarnyo. Lawang
dibukak, sudahtu ditutup lagi. Kapan dio noleh …
“Abah?!”
Dio nak enjerit tapi dak pacak. Takut setengah mati. Enjngok
abahnyo la tetiduk deket emaknyo.
“Bah, kapan abah masuk? Lewat mano dio?” Jamilah ngomong
dewek.
“Abah …!” Dicekel-cekelnyo tangan abahnyo. Lum jugo
beringgut.
“Abaaaah!”
“Abaaah!”
Mang Fir tebangun. Tapi lum duduk. Masih engguling tula.
Cuman matonyo bae yang melek. Sedangke Bi Cek Fir ngorok tiduknyo.
“Abaaah … bangun!” La mulak-I takut Jamilah pecaknyo. Dio
mulak-I curiga jangan-jangan yang taditu antu …
“Tapi apo iyo yeee?” Jamilah narik tangan abahnyo, supayo
pacak duduk, beceritola dikit samo dio.
Kato abahnyo, selepas Jamilah ngantar emaknyo tiduk di
kamar, dio becepet ke kamar kecik.
“Tibo-tibo perut abah sakit. Mulesla kiro-kiro,” cerito Mang
Fir.
Sudah mising sekali, metu dari kamar kecik, perut mules lagi. Balik
lagila mising. Mak itula bekali-kali.
“Badan abah lemes. Jadi abah putuske tiduk bae duken.”
“Jadi …” Jamilah tekejut endanger cerito abahnyo.
“Maafke abah. Tadi abah la bejanji samo kau nak naburke uya
keliling rumah. Tapi karno badan abah dak kuat lagi, abah tepakso dak pacak
nepeti janji abah taditu.”
“Yo Jamilah maafke. Tapi bukan itu Bah …” Jamilah tibo-tibo
nangis. Bangunla emaknyo.
“Kau apoke dio haaa?! La nak dicekik bininyo Mang Fir
kitoni. Untung bae Jamilah cepet sadar dari nangisnyo.
Dio becerito apo yang tejadi barusan …
Tidak ada komentar:
Posting Komentar