Tepelongok …
Oleh Wak Amin
Cerbung Musi Bebanyu (10)
Jreeeeng … jreeeng … jreeeng
.. jeeng …
“Penonton … Apo kabar oi iyo?” Tanyo Mang Lebay.
“Baiiiik …”
“Apo yang nak kamu mintak dari kami berduo malamni?” Tantang
Mang Lebay sambil ngiteri panggung, sedangke si Mamat metik gitar.
“Nyanyiiiii …” Jerit penonton mudo usio. Yan tuwo-tuwo pado
la balek galo. Ngantuk dan tak tahan lamo duduk apolagi tegak. Keram galo sikil
ini.
“Nyanyi apoooo?”
“Dangduuuut, Om …” Pekik betio yang ngolahke Mamat taditu.
“Oke … oke. Kalu mak itu kami beduwo nak nyanyike lagu
dangdut …”
Jreeeeng jreeeng jreeeeng
jeeeng …
Mamat metik gitar, Mang Lebay nabuh gendang. Sikok tegak,
sikok duduk besilo. Yang tegak nunduk enjingok gitar, Mamat. Lebay nabuh
gendang kiri kanan sambil mejemke mato.
Ini dio lagunyo …
Ebat dak?
Dengerke duken bae …
“Kapan datang ajalmu
Sebutlah nama Tuhanmu
di dalam hati …
Lalu
resapkan di lubuk nurani
Pasrahkan
jiwamu hanya kepada-Nya
hanya Dia yang
Kuasa
semoga menerima
pahala
dari perbuatan baik yang kita kerjakan
dan menerima
tobat
atas dosa yang
telah kita lakukan
Ya Allah ya robbi …
Maut suda
batas perut
apa di kau siap menyambut
datang dan pergi
ruh ini
lalu
meninggalkan jasad
terbujur kaku di
dalam tanah
serba gelap …
serba tak
bersahabat …
Ya Allah ya Tuhanku …
Maha Agung
Penerima Tobat
aku bersyukur
atas semua nikmat
yang telah Kau
berikan padaku
yang acap lupa ucapkan terima kasih
pada-Mu,
duhai Pemberi Nikmat …
Jika Engkau
benci aku
Bencilah
aku Ilahi asal …
kemudian kau
terima tobatku …
Jika
Engkau marah kepadaku
duhai Ilahi
robbi …
marahilah aku
sesukamu asalkan
Kau terima segala amal kebaikanku …
Jika Engkau berpaling dariku
Ya Robbi
Izzati …
berpalinglah
asalkan Engkau
bukakan pintu
surga buatku …
Kau tutup rapat
pintu neraka
yang tak pernah berahabat …
Ya Allah,
Ilahi Robbi
Ampunilah kami yang sangat hina
dina ini …
berilah taufik
dan hidayah-Mu
tunjukilah jalan
yang lurus dan Kau ridhai
agar kami
selamat sampai ke tujuan
menemui-Mu
dengan hati yang lapang
dan
bermuka riang …
penuh
keberkahan dan kemenangan …
Ya Allah,
Maha Pengasih dan Penyayang
Bimbinglah
kami ‘tuk capai ridha-Mu
tuntunlah kami ‘tuk raih maghfira-Mu
yang kami
hamba-Mu dambakan
sejak dari buaian
hingga ke hari pertemuan …”
Ampir limo belas menit Mang Lebay mensyairkan tembang menyejukkan
hati itu. Suaranyo yang nyaring melengking embuat penonton dak pacak lagi
begoyang. Tepelongok nyingok bujang sikokni ngemainke nada-nada, turun en naik suaro. Bener-bener luar biaso, ngalahke
penyanyi hebat.
Tepukan gendang yang disambut petikan gitar si Mamat,
ngingetke uwong dengan lagi Irama Gurun Sahara dan Irama Padang Pasir, walau idak persis nian.
Lebay ngeramunyo mirip tembang Hindustan, kentel dengan gendang samo suling,
joget sano sini dengan naik turun iramo lagu yang didendangke.
Tepat tigo puluh menit, budak duwoni, Lebay en Mamat,
selesai beraksi. Tepuk tangan dari penonton, lamo nian baru berenti.
Suwit-suwitan, mekik dak ketulungan dan enjerit dak katek sebab dari budak
mudo, dak pacak dihindarke.
“Terimo kasih … terimo kasih …atas tepuk tangannyo. Terus
terang bae penonton, dulur galo-galo. Kami senang bukan main,” kato Mang Lebay
nerimo salaman budak mudo yang nekat ngeluncat ke pucuk panggung …”
“Nyanyi lagilah, Bang.” Teriak penonton berambut cokelat
tuwo, panjang sampe dengkul.
“Oke … tapi kami nak istirahat duken. Boleh dak?”
Penonton saling jingok.
Kalu istirahat, apo yang nak kami tonton?
------------------
Sukses Manggung
Oleh Wak Amin
Cerbung Musi Bebanyu (Bag 11)
LANTARAN ari lanak parak tengah malem, sedenget lagi show di
alun-alun bakal ditutup, Mang Lebay en Mamat mintak maaf dengan penonton, dak pacak
lamo-lamo lagi becugukan di pucuk panggung.
Waaa … payaah …
Panitianyo amatiran …
Dak manusiawi …
Dak usah manggung kalu banci …
Sempet ado keributan, tapi pacak diatasi oleh petugas
keamanan. Maklumla, yang namonyo wong mudo, lum bejoget kalu lum sampe pagi. Kalu
pacak dak balek-balek lagi sampe tigo ari.
Apo dak kelenger …
“Sekali lagi kami mintak maaf dulur galo-galo … Tapi,
sebelum lampu ini padem galo-galo, kami nak embawakke sikok lagu lagi ditambah puisi, sikok pulo.
Supayo lemak endengernyo, kito pakek gitar ngiringnyo … Setujuuuuuu?”
Diem galo-galo.
Merajuk kayaknyo.
Ah, dak apo-apo …
“Setujuuuuuuuuu ….”
Lum abis penonton ngucapke ‘Setuju’, musik pengiring
tedenger nyaring. Dahtu berenti lagi. Penonton, sebagian kecil ngerabo dado serempak,
tekejut…
Astagaa …!
“Baiklah dulur galo-galo … lagu ini kami enjuk judul ‘Bujang
Bedengkang’.”
Plak … plak … plak …
Kito meloki bae ye lagunyo …
“Kami para bujang
dak katek gawean
selain bedengkang
pagi sampe siang
di pucuk ranjang
malemnyo jalan
sambil
bedendang-dendang
…
Kami para bujang
dak katek gawean
selain cuma begadang
sisip dikit
melok becotang …
cirinyo berambut
panjang
ngisep rokok
belimo sebatang
jarang yang
namonyo puaso
apolagi nak
ngerjoke sembahyang
kalu pacak nak idup senang …
Reff …
Kami
bujang bedengkang
siap ngeronda
jago malam
kami bujang
bedengkang
jangan musuhi kami
apolagi
ditantang …
pacak abis
anak samo emaknyo ayam
yang ado dijeru kandang …
Musik lum berenti, Mamat embaco puisi …
“Antara Aku dan Dia” karya Mamat Bae …”
Plak … plak … plak …
Penonton serempat betepuk tangan.
“Antara aku dan dia …
ibarat gunung samo bukit
ngelemakke uwong
embuat uwong senang becocok tanam …
Apo bae lajuuuu
…
apo bae lancer
pokoknyo idup di
jalan yang benar …
Antara aku dan dia …
‘lah lamo dak besuwo
waktu besuwo di
pasar Palimo
ketawo-ketawo …
ampir nak
begocoh
gara-gara salah
terko
dikiro pacar …
taunyo adik ipar …
Antara aku dan dia
tebentang jalan setapak
dipisahkan bunga yang harum semerbak
baunya bikin yang lewat
hatinya senang
jalan jauh terasa dekat
banyak nian yang
dilihat
seolah berkata ia
…
kita bersahabat
sangat erat
di kala senang dan
melarat …
Antara aku dan dia
kini semakin dekat
seia sekata dalam gaya
seia senada dalam rasa
satu tujuan ke depan
membantu sesama
ringanlah beban
tercapai hati penuh
keikhlasan
asal selamat
sampai ke tujuan
Antara aku dan dia
mengapa tidak
bersama saja …
berjalan
beriringan
setarikan nafas
setarikan tangan
melenggang lapang …”
Puisi abis, lampu panggung padam, lambat-lambat. Terang,
setengah terang, seperempat terang, seperenam, seperdelapan, remang-remang dan
ilang cahayo lampunyo.
Plak … plak … plak …
Tepuk tangan kembali
tedenger, sikok-sikok ninggalke alun-alun. Turun dari pucuk panggung, kelayapan
entah ke mano …
Yang balek, yo balek. Yang idak? Dak tau pulo ke mano.
Dikeruanke takut salah tanggep. Maksud kito bagus, palak bengep laju dak lagi
bagus …
Betul dak …?
----------------------
Dua’an Dulu Ai …
Oleh Wak Amin
Cerbung Musi Bebanyu (12)
NGERASO dak kelemakan, janji embalekke motor abis manggung
tengah malam, taunyo baru balek subuh kesiangan, Mang Lebay nekat nak
ngerewangi Mayang bejajo sayur.
Kapan?
Besoknyo. Malemnyo dio datangila rumah Mayang. Mayangnyo
ado, tenang bae, idak kemano-mano. Lagi salat Isya. Kato ibuknyo Mayang, masuk baela
gektu digigit nyamuk, bentol galo-galo badan. Lebay enjawab, “Biarla, Buk.
Sambil aku makan anginla di sini …”
“Apo berangkat tadi kau lum makan, Bay?” Tanyo si emak,
nongolke rai enjingok Mang Lebay teseler duduk di ayunan …
“Apo Buk?”
“Ini .. Ibuk nanyo, apo kau la dah makan malam?”
“Sudah, Buk. Sudah …” Jawab Lebay sedikit gugup.
“Mumpung gulainyo
banyak . Makanla.. Pindang betok ado, bawung, salay, seluwang goreng, emas pipis, lalepnyo jering
ado, jengkol ado jugo, kabauapolagi …”
“Dak usahla, Buk. Terimo kasihla. Aku sudah makan tadinyo …”
“Niyan sudah?”
“Niyanla, Buk ..”
“Yo sudah kalu mak itu. Ibuk tinggal duken. Ibuk ado gawe di
dapur …”
Ngotaki niyan Lebayni.
Awak lum makan malam.
Dasar besak kemaluan ..
Sambil nunggu Mayang salat Isya, mamang kitoni ngelamun
denget, embayangke idup bahagia samo Mayang.
Bahagia makmanotu?
“Yo .. punyo rumah besak, anak banyak. Mobil tigo, usaha
ado. Pokoknyo serbo ado …”
Dahtu?
“Tiap minggu jalan samo-samo budak. Ke mano? Ke mano bae.
Malek ke mal, bioskop. Bosan ke bios kop, makan malam di restoran ebat. Malek
di restoran, yo enjingok pemandangan di banyak tempat, dalam dan luar negeri.”
Terus …?
“Kalu kito kayo, banyak reto, kan banyak yang biso kito perbuat.
Kito biso bantu uwong saro. Ngenjuk modal
yang nak bukak usaho. Pacak melok embangun masjid dan pesantren.
Galo-galo gratis. Tinggal belajar bae …”
“Kak Lebay …!”
Naa tu .. kan, apo?
Mang Lebay tesadar.
“Ngelamun apo, Kak?”
“Idak ai .. Cuman embayangke bae …Yang.” Lebay salah
tingkah.
“Samo baela dengan ngelamun itutu, Kak.” Kato Mayang ngajak
ngobrol di dalam bae. Bebas nyamuk, bebas ngomong, katek yang endenger. Kalu di
luar, apo kato tetanggo. Pastila banyak jahatnyo daripado baiknyo.
Di ruang tamu, Mayang sudah nyedioke segelas banyu teh manis
anget samo ubi goreng. Dak nyemu-nyemu lagi dio. Itu banyu langsung diteguk
abis. Anget, tapi karno lapar, idak
teraso nian angetnyo. Alhamdulillah, gara-gara banyu setengah gelas, perut
Lebay idak betingkah lagi. Apo karno kenyang, atau anget di perut bae, entahlah
…
Ubinyo Mang?
Jugo dak nyemu-nyemu lagi. Ubi goreng sepiring abis. Na, ini
baru kenyang niyan. Eeeeek … eeeeek. Embetulke letak duduknyo, Lebay
senyum-senyum simpul setelah Mayang tau apo yang diidangke di pucuk meja abis
galo-galo.
“Mayang tambah lagi yo, Kak. Galak dak?” Mayang beringgut
sambil nyipit-nyipitke mato.
“Dak usahla, Yang. La kenyang caknyoni …”
Ai sudahla Bay …
La tau galo …
Rejekitu jangan ditulak
Kalu ditulak pacak keno balak
Kan yang rugi awak …
Hehehe …
Singkat cerito. Banyu teh manis abis duwo gelas en duwo
piring ubi goreng, badan Mang Lebay baru
ba lik bugar. Bukan bugar lepas dari mandi. Bugar karno kenyang. Kenyang
galo-galonyo. Perut kenyang, mato kenyang, palak kenyang, sikil jugo melok
kenyang.
Ah, madaki …!”
Niyanla …
Karno la ampir sejam mendep di rumah Mayang, Lebay baru ngutarake
isi atinyo. Dio nak ngerewangi Mayang bejajo sayur. Biarla diao yang embonceng,
Mayang yang dibonceng. Pasti lemak enjingoknyo.
Kato kau …
Kato uwong, lum tentula …
“La, kakak dak bejajo tahu apo?” Tanyo Mayang keeranan.
Jualan idak, ngerewangi galak.
Lajukela, Yang.
Mumpung mudo
Jangan tesio-sio
Nyesel gek kalu la tuwo
Bener dak dulur-dulur?
“Aku libur dukenla. Aku memang sengajo dari ati yang dalemni
nak ngerewangi kau bae, Yang. Boleh dak kiro-kiro?”
“Yoo kiro-kiro .. makmanola ye?”
Ah, Mayang.
Masih mikir jugo.
“Aku dak pulo makso. Kalu kau galak, aku senang. Kalu dak
galak, yo dak apo-apo …”
Mati kito …
----------------------------
Tidak ada komentar:
Posting Komentar