Macet Sepanjangan
Oleh Wak Amin
Cerbung Musi Bebanyu (Bag 5)
AKHIRNYO diputuske
Mayang dak melok malemni. Cukup beduwo baela. Mang Lebai samo si Mamat.
Mayang dak merajuk dak. Dionyo ngerti. Sebab manggungnyo lum tentu balek
gancang. Biso bae tengah malam. Biso juga besoknyo baru sampe rumah.
Lum lagi kejadian-kejadian yang terdugo. Yo, namonyo betino,
apolagi caem makkayo Mayang. Pacak bae disuwili wong iseng. Dirabo-rabo, kan
embuat balak namonyo. Pacak-pacak begocohan pucuk panggung. Idak benjol bin
remek, yo mati. Daktu masuk penjaro. Duit dak dapet, tempat la sempit.
Cuman, sebelum berangkat ke alun-alun kota, Mamat en Lebay
nekat endatangi rumah Mayang. Nak ngapo? Yo, idak ngapo-ngapo. Minjem motor
bae. Namonyo kawan, dak tega dak minjemi. Akhirnyo dipenjemkela dengan syarat,
ecak-ecaknyotu make iyonian, bawak bagus, baleknyo bagus.
Dengan mengucap bismillah, berangkatla bujang duo ikokni.
Yang embonceng Mamat. Mulonyo mulus. Lancar bae. Dak pulo banyak uwong bemotor
en bemobil. Na, pas di perempatan, mati akal galo. Janganke motor, uwong
bejalan nak nyabrang bae lagi dak pacak keperi macetnyo.
Lum lagi bunyi klakson. Tan… tiiiin … tuuun … ran… rin… run
… Mekakke telingo. Pelisi bae kewalahan dibuatnyo. Jadi sibuk dewekan. Keperi panjangnyo macet, dak pacak dimeteri
lagi. Lum lagi truk besak bederet, dak galak ngalah, melok ngatang pecak nak
nantang.
“Kalu mak inila, uwong bubar kito lum nyampe, Bay,” kato
Mamat , embukak helem, embeneri rambut kusut, dahtu helemnyo dimasukke lagi
jeru palak.
“Makmano kalu kito mentas bae,” saran Mang Lebay.
“Lewat mano, Bay? Tetutup galo caknyotu …”
Mang Lebay bepikir denget. Dio turun dari motor. Maraki
tukang rokok yang lagi ngisi TTS di
warungnyo.
Ngapo dio?
“Bang, jalan mentas situ kiro-kiro aman dak yo?” Nunjuk ke
kanan. Memang ado warung kecik tapi gelap.
“Aman bae. Tapi selamoni uwong jarang lewat situ …”
“Ngapola Bang?”
“Kato uwong banyak antunyo. Jadi uwong takutla …”
“Ooooo … na, kalu sebelahnyo abang?” Nunjuk ke warung kecik
tapi dak bukak lagi.
“Kalu yang itu memang dak katek antunyo, Cuman …?”
Ado uwong beli rokok. Betino ruponyo. Pakek enderok mini,
besepatu tinggi. Main mato pulo samo
Mang Lebay.
“Sampe mano tadi omongan aku ponakan?”
“Dak katek antunyo. Cuman …”
“Lagelep, belubang pulo. Ado yang kecik, sedeng, jugo besak
…”
“Ooooo …”
“Kalu saran dari aku, ponakan ye .. Jalan inila. Memang
lamo. Tapia aman. Ngimbit-ngimbit bae. Ado celah dikit maju. Bila perlu ngepot.
Asal dak engganggu wong lain, dak jadi apo …”
Karno Mamat la manggil-manggil, Mang Lebay dak sempet lagi
nemuke solusi. Dio permisi. Katonyo dengan Mamat, lemak jalan sinila.
“Nurut awak, bagusnyo makmanola?”
“Kito cubo duken denget lagi. Kalu dak beubah-ubah, tetap
macet, kito cubo jalan deket warung itu …”
“Ngapo dak sekarang bae. Dak usah sampe kagek?”
“Banya lubangnyo …”
“ooook .. oooo ..”
La sepuluh menit macet dak jugo bekurang, diputuske beduwo
lewat jalan belubang taditu. Mano tau waktu lewat, lubangnyo ilang, jadi aman bemotor.
Apo memang mak itu?
Kenyataannyo idak. Lubang tetapla lubang.Gelep tetapla gelap.
Dak mandang siapo yang bemotor. Nak lewat tanggung resiko dewek-dewek. Takut
resiko, atret, pilih jalan lain bae.
Menung duken ai.
“Lanjakkela, Bay …!”
Motor melaju kencang. Pas lewat lubang, ngelambat. Huup. Pacak dilewati.
Tapi makmano yang besak itu?
Tepakso turun sikok. Yang turun Mang Lebay. Mamat pasang
gigi duwo.
Reeen … reeen .. reeen
Berhasil. Tapi ban motor becek galo-galo. Beubah cokelat.
Bakal marah Mayang gek nyingok motornyo balek la bebedak.
Apo boleh buat. Taik kambing memang tetepla bulat. Yang
penting selamat.
Sampe lum?
-------------------------
Jalan Mentas
Oleh Wak Amin
Cerbung Musi Bebanyu (Bag 6)
ELUMLA. Masih jauh. Separo jalan bae lagi lum. Ssssst …
Jangan diomongke samo budak duwoni. Gektu patah semangat. Manggung idak, balek
keno bentak.
Tapi, ngomong-ngomong apo yang digaweke Mang Lebay samo
Mamat parak rumah tinggaltu. Apo dak tau kalu di rumah itutu banyak
penunggunyo. Idak lanang idak betino. Kato uwong, antu jadi-jadian. Pa cak
ngerubah bentuk. Kadang lanang, kadangtu betino. Kadang gadis cantik, kadangtu
nenek-nenek keriput. Malah nyerupoi budak kecil enggendong anaknyo sambil
nangis pinggir jalan.
Untungla ado uwong bekopiah putih ngampiri. Nanyo nak
kemano. Setelah dapat jawaban, lanang
bekain putih en beselop jepit ini nyaranke cepet la pegi. Mano tau gektu
tejadi apo-apo.
“Apo kamu beduwo dak tau kalu tempat ini angker?”
“Idak, Wak,” jawab Lebay.
“Nganggu uwong dak, Wak?” Tanyo Mamat, rainyo beubah pucat tapi dak pasi.
“Nganggutu idak … Cuman galak ngolahke …”
“Yang bener, Wak?” Mang Lebay tibo-tibo nak ngencing.
“Benerla. Kalu Wak bohong, kamu beduwo tunggu bae sampe dalu
gek di sini …”
“Idak ah, Wak. Idak.
Kami nak pegi bae ..” Kato Mamat ngenjuk kode ke Mang Lebay becepetla
ngengkol motor.
Anehnyo, beberapa meter motor bejalan, waktu Mamat noleh ke
buri, uwong tuwo taditu dak katek lagi.
“Berenti … berenti duken, Bay …”
Turun dari motor denget. Dahtu ngongkon Mang Lebay ngidupke motor lagi. La
agak jauh, baru dio ngomong.
“Awak tau dak Bay yang lanang taditu?”
“Yo dak taula, Mat. Mano tau aku. Uwong baru inila ketemu-
Ado-ado bae kauni …”
“Kapan kunoleh taditu dak katek lagi …”
“Haaa … madaki Mat?”
“Pecayola samu akuni ..”
“Kalu mak itu positif, Mat.”
“Positif apo?”
“Antuuuu …”
Hi hi hi hi ….
Mecem dikejer antu, motor zig zag ngelewati lubang. Kalu rai
dak tekeruan lagi. Keringetan galo. Sepan mak itu jugo. Untung bae dak
sempaknyo.
Cuman … ado cumannyo. Lanak parak alun-alun, motor mogok.
Kapan dibukak tengki bensin, kosong. Abis bensin. Tepkso endorong beduwo. Jauh jugo. Baru berenti kalu la ado SPBU atau
warung enjual bensin eceran.
“Kito istirahat duken, Bay. Ngembek nafas …” Mamat
bener-bener abis. Bukan abis nafas bae. Keringet bae dak galak metu lagi. Abis
kan namonyo …
“Banyu minum dak katek. Jadila minum banyu ludah,” kato Mang
Lebay duduk besandar parak pelat motor.
“Apo urungke bae yo, Bay?”
“Urungke makmanotu?”
“Kito balek bae ..”
“Ai ai . Janganla, la parak mak ini. Tanggungla …”
Duwo menit sedieman. Bukan dak galak ngomgong. Selain dak
katek lagi yang nak diomongke,
mulutni la kering nian. Kelu,
kato wongtu.
“Payu kito beguyur, Mat.”
Tegak bae la payah. Mamat berat nak ngelangkah. Tapi cumin
denget. Dahtu pacak lagi endorong motor. Limo menit lebih dikit baru pacak
senyum samo ketawo.
Ngapo?
Ketemu uwong enjajo bensin. Warungnyo kecik. Di depannyo ado
duo tigo ikok ban tegeletak. Ado kumpo ban. Besak. Kalu ban kempes, nak tambah
angin, isi bae angin, terus kembung alias kenceng lagi.
“Dari mudik apo Abang beduwo?” Tanyo lanang ceking enjajo
bensin.
“Idak ponakan. Kami dari sinila,” jawab Mamat.
“Ooooo .. Kato aku dari mudik. Biasonyo ye Bang. Kalu lewat jalan sini pasti
dari mudik uwongnyo. Katek lain lagi …”
“Ooook oooo …”
“Ngapo biso cak itu, ponakan?” Gantian Mamat yang betanyo.
“Karno dak macet kalu malem …”
“Kalu siang?”
“Yo, macetla abang …”
“Ngomon-ngomong, apo
bener jalan yang kami lewati taditu ado …” Mang Lebay nunjuk ke belakang, jalan
yang taditu dilewati. Gelap dan wuiiiih … dak pacak ngomongkenyo.
Si tukang bensin eceranni senyum bae. Dahtu ngomong . Dahtu
ngomong …
“Wong tuwo yang abang omongke taditu … itula rajo antunyo …”
Haaaaaa ….
--------------------
Teseler …
Oleh Wak Amin
Cerbung Musi Bebanyu (7)
SAMPE jugo ruponyo di alun-alun. Setelah markirke motor di
tempat parkir, Mang Lebay en Mamat begancang nemui Pak Johan, koordinator
acara. Pas ketemuan langsung ke buri panggung. Ngomong enam mato.
“Kamu beduwo mungkin keno giliran terakhir. Sebab, kalu dak
mak itu kesianla dengan uwong yang datang duluan. Kukiro adil kan?”
Pak Johan dak merluke bantahan. Jawab bae, iyo apo idak. Pas
apo longgar.
“Adilla, Pak.” Jawab si Mamat.
“Tapi yang terakhirtu, sampe jam berapola?”
“Sampe acara nak ampir abis. Kagek kito ketemuan lagi. Oke?”
“Okeee …”
“Na, sekarang kamuk beduwo istirahatla duken. Nak makan, di
jeru kulkas ado makanan. Nak minum, ado. Tinggal pilih bae. Manis ado, pait
ado. Idak manis idak pait jugo ado. Suko-sukola. Punyo kito galo. Asal bae
jangan embat sampe abis …”
“Ngapo mak itu, Pak?” Mamat nak tau bae, lain idak.
“Aku, yang lain jugo, mano tau lapar jugo gektu …”
Mamat ngedipke mato.
“Na … sekarang aku tinggal ye … Jangan nangis.”
Hua ha haha …
Baru tigo langkah Pak Johan ninggalke buri panggung, Mang
Lebay en Mamat besiget bukak kulkas. Langsung ketawo ngakak enjingok apel, buah
pir, jeruk bali, anggor samo kurmo.
“Yang mano duken, Mat, uji awak?”
“Kalu aku, kurmo duken. Ngembek berkatnyo. Kalu awak?”
“Apel baela. Kalu bae lemak, cepet kenyang .. nyang.”
Sikok majuh apel,
sikok embadok kurmo. Lebay abis limo, mamat abis tigo bungkus kurmo arab.
Jadila. Kenyang. Duduk teseler parak tanggo.
Dak lamotu, karno mungkin kekenyangan en capek, bujang duwo
ikokni tetiduk. Tapi bukan di pucuk kasur, nyandar ke dinding.
Ngorok?
La jelas. Idak nian beringgut-ringgut. Uwong lewat sambil
ketawo, dak tau. Rame-rame nyingok sambil
nepuk-nepuk sikil, dak jugo tau. Untungla, Pak Johan datang nak
ngeruwanke apo masih ado apo idak banyu minum.
“Bay … Bay … bangun.” Pak Johan nepuk-nepuk pundak Lebay,
jugo Mamat.
“Bangun, Mat .. la siang.”
Masih dak galak jugo bangun, Pak Johan ngembek banyu
secedok, dipercikkenyo ke rai Mamat en Lebay. Tekejut, baru tebangun.
“Di mano aku. Aku di mano. Apo masih ado di dunio. Dunio
yang mano?”
Dak galak kalah dengan Mang Lebay, Mamat jugo ngoceh dak
keruan aguk.
“Aku di mano. Di surgo apo nerako. Payulah dindo .. aku
galak kau galak. Kau dak galak aku galak …”
Pak Johan cuman biso enggelengke kepalaknyo bae.
“Ado-ado bae budak duwoni,” katonyo di jeru ati.
“Cepet bangun!”
Dipercikke lagi banyu, baru bangun nian. Kapan tebangun malu
dewek. Malu samo Pak Johan, malu samo yang lain. Tibo-tibo ngerumuni sambil
enjingok keeranan. Ado bujang kesurupan ngomong.
Sampe-sampe panitia ngistirahatke sedenget acara kata sambutan-kata
sambutan. Nak mastike bae kalu Mang Lebay en Mamat dak celako.
“Apo perlu kito bawak ke rumah sakit, Pak Johan?” Tanyo
salah seorang panitia yang nak nelpon pihak rumah sakit supayo endatangke
gancang mobil ambulance.
“Dak usahla, Pak. Dak apo-apo. Pecayo bae samo aku.”
“Payu kalu mak itu, Pak Johan, aku teruske lagi acaranyo ..”
“Oke …”
“Oke …”
Suasana yang awalnyo rame kayak pasar, beubah hening
endengerke kato sambutan dari pihak balai kota. Mak itu jugo dengan Mang Lebay
dan se esnyoni. Melok nyimak kato per kato yang disampeke uwong nomor satu di
kota ini. Diresepke dalem-dalem supayo pacak ngembek saripatinyo. Kalu dak buat
apo tecuguk bemalem-malem di sini kalu sampe rumah gektu balek buyan dan dak
tau perkembangan.
Makmanola kiro-kiro?
Dak tau jugola makmano …
Kito tunggu bae sampe abis pidatonyo …
----------------------
Goyang Abis
Oleh Wak Amin
Cerbung Musi Bebanyu (8)
ASYIIIIK .. Goyang sampe pagi.
Bukakla galo-galo …
Mumpung masih mudo
Kalu la tuwo dakke beguno ….
MACAM-macamla omongan penonton waktu artis dandung benyanyi.
Baru tecuguk pucuk panggung bae sudah disuwiti. Makmano dak disuwiti, bajunyo
bae tembus pandang. Roknyo pendek. Kapan nunduk dikit, kito yang tetegak di
depan, pasti tejingok ‘belah durennyo.’
Apo dak mabok …
Mang Lebay en Mamat melok pulo nonton. Tapi idak di depan.
Dari buri bae cukupla. Kecik penjingokan dak jadi apo uwongnyo. Yang penting
melok enjingok. Melok pulo besenang-senang.
Nyanyi la oiii …
Nunggu apo lagi …
Gek la beduuuk …
Ampir bae ribut kalu dak ditenangke panitia. Em senyo banyak
ngomong. Uwong dakdo nak endanger omongan, tapi endanger nyanyian. Bejoget
samo-samo, goyang-goyangan dan melok pulo bedendang, apo salahnyo kalu biso.
“Payula mamang bibik sanak beruyut galo-galo. Pecaknyotu dak
ketahanan lagi.. ..” Kato sang biduanita yang langsung ditanggapi dengan
omongan …”Payuu gancangla oi. La panas inini …”
“Payu kalu mak itu. Supayo dak panas lagi, aku siramke pakek
lagu. Lagu apo? Inila judulnyo … ‘Ke ujung dunia kau tetap kekejar ‘…”
Plak .. plak … plak …
Tariiiik …
“Musiiiik!” Jerit si biduanita dengan suara endesah lambat.
Yang mudo-mudo nambah kelenger dibuatnyo.
“Jangan
tinggalkan aku sayang
betapa kusayang padamu …
setiap malam wajahmu tebayang
kadang menari di atas pembaringan
kadangtu jugo
joget pucuk meja makan
Jangan
pegi kasih
karena ke ujung dunia pun
masih kukejar …
tak
tahan aku sendiri
daripada sendiri …
lebih baik aku
mati ………
Kumohon padamu
sekali lagi …
cintailah aku
bawaku
pergi dari sini
hidup bersamamu
aku
mau walaupun
cuma tinggal di gubuk reyot
tak makan sehari
kan kujalani ….
Reff ….
Jangan tinggalkan aku sayang …
betapa kusayang padamu
sangat mencintaimu …”
Dak nyangko samo sekali kalu lagu ini embuat penonton betino enjerit histeris.
Entah ngapo, apo nian karno lagu, atau …
“Tejepit …” Kato lanang besak tegak deket Mang Lebay en
Mamat.
“Makmano biso cak itu” Tanyo konco di sebelahnyo.
“Dia betino dewekan. Konco betino taditu banyak. Pas la
joget ilang dak tau ke mano … Kapan
dijingok la dikerumuni lanang galo …”
“Terus … terus …” Penaaran jugo konconyoni.
“Yo dak katek terus-terusnyo. Mak itu bae. Budaknyo la
diamanke.”
“Idak dicekel-cekel apo?”
“Idak kato budak-budak taditu.”
Plak … plak … plak …
Penonton betepuk tangan.
Nyanyi lagi Mbaaak …
Kurang …
Tambah lagila oi …
Mumpung lum turun panasnyo …
Dak pacak nolaknyo, tepakso sikok lagu lagi didendangke.
Kalu idak, pacak rubuh panggung ini.
Biso apo?
“Yo bisola. Kalu dirubuhke samo-samo …”
“Baiklah mamang en bibik sanak beruyut alo-galo. Lagu yang
keduwoni bejudul ‘Joget sampe tuwo.’
Suwit .. suwit .. suwiiiit …
“Musiiiik … play!”
Inilah dio lagunyo kando-kando sekalian …
“Joget …
Payu kito
bejoget
asal jangann
ilang dompet
jangan
jauh payu endeket
biar
rejeki dak seret-seret …
Yuk kito bejoget
jangan malu kalu
bejoget
joget sampe tuwo
supayo kito awet mudo …
Joget …
yuk kito
bejoget
sambil joget main terompet
pinjemla duit kalu kepepet
jangan jauh
payu endeket
supayo rejeki dak seret-seret …
Joget …
Joget
Joget
joget
sampe tuwo
rambut
la beuban galo …”
-----------------------------------
Keno Kolah
Oleh Wak Amin
Cerbung Musi Bebanyu (9)
PUAS bejoget, giliran budak betino yang nari. Cantik
galo-galo. Tapi sayangnyo, budak mudo dak nanggapinyo …
Wuuuuuu
Letooooy
Ngantuuuuuk …
Yang namonyo nari, la pasti dakdo samo dengan bedangdut.
Kalu joget biso ngehoji. Kalu ini kan dak pacak. Kito tepelongok, uwong yang
belenggak-lenggok.
“Dak jamannyo lagi, Bang.” Kato lanang gemuk waktu ditanyo
Lebay en Mamat.
“Ngapo mak itu?”
“Yo idak katek gerak. Kito kesinini kan nak eksis. Jingokla
oleh abang dewek. Apo yang kito gaweke, kan dak katek. Meguk bae endanger
musiknyo. Pacak-pacak ngantuk kito …”
“Tapi kan dak lamo narinyo. Paling sepuluh menit,” ucap
Mamat.
“Na itu bae pintakankutu … Pacak kito tahanke .. kalu lamo,
lemakla kito balek. Ini kan bukan acara nganten, ini ulang taun kota kito. Kito
besenang-senang. Betul dak kawan-kawan?”
“Tuuuul be .. tuuuuul! Jawab penonton yang lain serempak.
Betul kato budak mudo, tapi lum tentu kato yang tuwo-tuwo
atau separo tuwo. Sebab, rato-rato melok nari jugo. Ngeliuk-liukke jari tangan,
sikil begerak kiri kanan. Pokoknyo asyikla … Apo lagi yang nari pucuk pang gung
bukan wong basing. Merekatu kan la telatih. Profesional, kato wong jaman
sekarangni.Kulitla mulus, idung mancung, tinggi semampai, bibirnyo .. awwww …
dak pacak ngomongkenyo lagila.
Kurang apo lagi?
“Bukan punyo kito, Om.” Celetuk budak betino parak Mamat.
Cantik jugola, cuman kurus bae cak kurang makan.
“Jadi punyo siapola?” Tanyo Mamat, antaro serius dengan idak.
“Punyo uwong tuwonyola.”
Haha haha ….
Keno batunyo kau sekalini, Mat …
Apo jawab Mamat?
“Kalu kau punyo siapo?”
“Punyo Ok om …”
Ha ha ha ha ..
Na kau …
“Cocoknyo nian Om yo?!” Kato konco betino tadi melok ngekek
pas enjingok Mang Lebay ketawo ngekek sambil
megang perutnyo.
Mang Lebay dak enjawab.
Dasar Mamat kegatelan …
“Nian apo punyo Ok ooom?”
“Kalu dak cayo buat apo aku tetegak dekat Ok Om malem-malem
mak ini?”
Na kau … lantakla …
Pacak pang bing pang malemni …
Lajukela ..
Embat kela …
Masih kecik oi … ‘Itunyo’ bae lum tumbuh …
“Nonton samo Ook Om galak dak?”
“Galak bae … Di mano Om nak nonton, ai ladeni …”
Hihi … hihi … hihi …
Mati kito …
“Abis isi dompet kito,” kato Mang Lebay.
“Kau galak nonton apola?”
“Nonton apo bae, Om. Pokoknyo, yang namonyo nonton, janganla
ditanyo lagi … Nii, ratunyo …”
“Nonton filem?”
“Wuuu … kecik itutu, Om.”
“Ngapo biso kecik mak itutu …?”
“Karno tempatnyo kecik. Di jeru bioskop, bukan di tanah
lapang ini, Om …”
“Memangnyo dak lemak apo?”
“Bukan dak lemak, Om.”
“Kalu idak, ngapo?”
“Ai Omni cak dak tau bae …”
Mamat memang dak tau. Makmanola?
“Dak balek modal, Om …”
“Nah nah .. Dak balek modal segalo. Cak bedagang bae.”
“Om yang lemaknyo, aku dak lemaknyo.”
“Ngapo pacak mak itutu …?”
“Kalu jeru bioskop kan aku nonton, Om idak. Om pasti
ngerabo-rabo pasti. Cak alim sabak. Pagi alim, malemnyo ngerabak …”
Haha haha haha …
“Keno cekinyo sekalini,”
kato Mang Lebay, nutup mulutnyo supayo dak kedengaran ngakak ketawonyo.
Mamat tediem.
“Kalu di sini kan Om dak pacak macem-macem. Pasti dijingok
uwong. Kalu di bioskop, uwong dak enjingok kito …”
Mamat cengar-cengir bae …
“Lihai jugo budak betino ini,” katonyo di jeru ati.
Lum sempet nak ngomong lagi, pundaknyo Mamat ditepuk dari
buri. Ruponyo Pak Johan. Ketawo kejingokan gigi.
“Kito siap-siap …” Kato Pak Johan dengan Mang Lebay en
Mamat.
“Lenak mulaki apo, Pak?” Tanyo Mamat.
“Lenak deket …” Nyingok jam tangan .. “Kiro-kiro limo belas
menit lagila … Siap dak kiro-kiro?”
“Siap …” Jawab Lebay.
“Teserah kamu beduwola. Nak diapoke panggung gektu. Yang
penting bagus, lemak nontonnyo, dan bemanfaat buat kito galo-galo …..”
--------------------------------------
Tidak ada komentar:
Posting Komentar