Ngepek Jando …
Oleh Wak Amin
Cerbung Musi Bebanyu
(Bag 1)
GALO-galo penonton betepuk tangan serempak waktu Mang Lebay
metu pucuk panggung. Bepeci bulet putih keemasan, sewet kotak-kotak, bebaju
koko item campur putih, dio langsung duduk besender di dinding, tempat cicak
galak ngelamun, parak tanggo.
“Alangke saronyo oi iyo nyari betinoni mak ini ari. Nyari
bae payah, apolagi nak enjadikenyo bini …” Kato Mang Lebay, karno lum ado
rewang, ngomong dewekan.
Dak lamotu Mang Lebay tegak. Nak kemano dio? Idak
kemano-mano. Cuman bejalan muteri panggung. Malek ke kanan, yo atret, belok
kiri. Mak itula gawenyo. Sampai tigo kali. Kali keempat ado yang nyawil
keleknyo.
“Oi Lebay!”
Yang dijawil noleh denget. Dahtu ketawo ngakak. Saling
pandang, enjelitke mato, micingke sebelah menyebelah, bepelukan makkayo bujang
gadis yang la betaun-taun dak ketemu.
“Apo kabar, Mat?” Sambil nepuk-nepuk pantat.
“La berapo taun nian
kito dak ketemu?”
“Ai baru kemarin rasonyo, Bay.”
Penonton ketawo.
Sedieman denget.
“Ngapo awaktu pecak …” Feling Mamat konconyoni ado masalah,
tapi dak pacak nyelesaike.
“Ai idak pulola Mat. Biaso bae,” kato Mang Lebay ngajak
duduk di kursi goyang tuwo.
“Awak boleh bae ngatoke idak. Tapi feling aku kau ado
masalah besak …”
“Hahahaha … Cak tau nian. Itula yang aku seneng dari awakni
Mat sejak dulu. Tebukak tapi idak telanjang bulet … Nian. Aku dak embudike,
apolagi nyari rai deket kau …”
“Naa kalu mak itu, klopla. Katoke bae .. apo masalah awak?”
Sungkan raso nak ngomong.
Berat nian. Pecak ado yang engganjal di mulut Mang Lebay.
Mamat bepikir denget. Tegak miring enjingoki kening Mang
Lebay. Dahtu duduk beradepan sambil nunjuk-nunjuk ke antaro idung samo mulut.
“Aku tau sekarang. Pasti soal betino kan?”
Mang Lebay dak ngiyoke, jugo idak ngidakke.
Lantas?
“Iyo kan?!” Pancing Mamat.
Mang Lebay akhirnyo ngangguk, tando bener. Siapo betino yang
ditaksir Mang Lebay, Mamat siap ngerewanginyo.
Panggung tetutup layar.
Lampu padam.
Lengang.
Penonton narik nafas. Ado yang ngudut diem-diem. Ado jugo
nuangke botol minuman ke mulut. Minum. Ado lagi yang bekikik-kikikan ….
Kelang tujuh menit, layar panggung tebukak lagi. Lampu idup,
tapi redup-redup. Ado betino lagi enggen dong anaknyo yang masih bayi.
Diayun-ayunkenyo pakek tangan, sambil bedendang. Inilah dio denda ngannya :
“Tiduklah anakku gancang
Dak usah pikirke igo
Ibuk yang katek lakini
Gek
jugo pasti dapet
Kedip mato sedenget
Lanang
marak pasti tejeret ..”
Penonton tesenyum geli …
Dak pulo tau ngapo biso tegeli-geli.
Dak jauh dari Mayang nidukke anaknyo di pucuk tikar bambu deket
banyu, Mamat samo Mang Lebay ngendep-ngendep maraki sang jando kembang gulo. Cuman
besewet, rambut panjang terurai, kulitnyo, wooow, dak pacak ngomongkenyo. Putih
mengkilat. Dak teselik dikitpun bekas luko, apolagi yang na monyo bikat.
“Pantesla kau tegilo-gilo Bay … Cantik nian. Mecem bidadari lagi
bedandan,” bisik Mamat, cak nak ketawo tapi dak jadi.
“Ngapo. Kau naksir jugo?” Tanyo Mang Lebay, enjelitke mato nyelik
sewet Mayang tebukak dikit diterbangke angin sungi.
“Kalu iyo ngapo. Dak boleh …?”
“Boleh bae … Aku naksir, kau naksir. Kito beradu bae …”
Mamat temangu denget.
“Ai idak ai. Aku ikhlas nulung awak, Bay. Sekarang awak besiapla.
Kito nak ngerayu dio …”
“Makmano?”
Penonton gemes. Nonton sambil nge es em es …
Ruponyo lanang duwoni nyamar jadi betino. Bekebayak, besanggul dan
beabang bibir, singkat ceritonyo. Begantian nari, cak uwong mintak elem, di
depan Mayang. Sambil nari pakek selendang, begantian ngu capke rayuan mautnyo.
Apo rayuannyo? Ini diantaranyo …
Mamat …
“Duhai adik yang tecantik
Kando datang nak memetik
Boleh idak
wahai adik
Jangan
dijawab sampai gitar kupetik …”
Mang Lebay …
“Duhai Mayang yang kucinta
Bukaklah pintu libar-libar
Besok akang ngelamar dinda
Lusonyo
kito langsung belayar …”
Tarik …
“Rayu sampai tuwo!” Teriak penonton.
Mayang tesipu malu endengernyo. Dio sudah tau kalu di depannyo
sekarangni tak lain dan tak bukan Bang Mamat samo Mang Lebay. Sudah ciren.
Galak lewat depan rumah sambil nyekel duren. Baru sekarang seomongan. Itu pulo
langsung bukak-bukakan, ngajuke lamaran.
Apo dak bingung!
---------------------
Cemekek’an …
Oleh Wak Amin
Musi Bebanyu (Bag 2)
PENONTON betepuk tangan lagi. Kali ini lebih kenceng
tarikannyo. Ngapo? Ngiringi Mang Lebay,
Mamat dan Mayang nyudahi fragmen pendek sambil embungkukke badan ngadep ke
depan, ngenjuk hormat dan salam persaudaraan.
Tepuk tangan itu baru berenti setelah Mang Lebay samo duo konconyo
ngilang di balik panggung. Lam pu padem. Layar begulung. Tetutup. Sayup-sayup
tedenger tembang ’ Love Story’, sahdu dan lembut te denger di kuping, pecak nyampeke
pesan ‘Jangan lupo nonton kami main lagi kagektu.’
Dari balek panggung, lum sempet nuruni anak tanggo, tangan
Mang Lebay dicekel lanang. Siapo? Pak Johan, ruponyo, koordinator pertunjukan.
“Hebat nian kauni Bay. Dak nyangko aku,” kato Pak Johan
sambil meluk anget Mang Lebay.
“Awak jugo, Mat,” ngatoke Mamat, “Dak nyangko aku. Kapan
awak belajarnyo. Tibo-tibo siiip di pucuk panggung. Makmano ceritonyotu.”
Mamat dak nyimbat. Cuman senyum dikulum bae.
“Naaa … kalu yang ini, apolagi.”
Pak Johan mandangi Mayang yang lagi ngelap rainyo karno
bekeringetan.
“La cantik, pucuk panggung, ai ai, nambah cantik.”
Terus terang, kato Pak Johan, dak katek yang nak kuenjukke
samo kamu betigoni selain bombon tigo ikok ngobati aus inila.
“Embekla,” kato Pak Johan nyodorke bombon pedes asem.
Sikok-sikok ngembek, anehnyo rai dak enjingok bombon, tapi nyelik kantong baju
Pak Johan yang dipenuhi duit logam galo.
“Jangan dijingokla bombonnyo. Jingokla siapo yang ngenjuk
bombonnyo. Aku …” Kato Pak Johan, ketawo dewekan.
Karno banyak tamu undangan yang nak dilobi dan diantar
balek, Pak Johan dak pacak lamo-lamo ngawani Mang Lebay, Mamat dan Mayang.
Dio pamit pegi.
Tingggalla tigo sekawanni tepelongok denget. Dahtu duduk di
buri gedung sambil nunggu jemputan.
“Alangke cemeke’annyo lanang taditu,” celetuk Mamat.
“Jadila, Mat. Namonyo kito-kitoni wong kecik. Segalo-galonyo
kecik. Badan la kecik, penghasilan kecik, rumah jugo kecik. Dak katek yang
besak,” kato Mang Lebay.
“Tapi Bay, adola sedikit perasaanla. Apo duit cak itu. Kalu
dak duit, apo nasi, jadila. Perut lapar mak ini ngenjuk bombon, dak musimla.
Makmanola Yang, uji awak kiro-kiro …?”
“Yo makmanolaye.
Eemmm .. terimo baela kak. Yang penting kito la main bagus, idak dienjuk
apo-apo jugo dak apo-apo. Masih biso makan …”
Kriiiing … Krriiiing.
Bukan sepeda, tapi becak roda tiga.
Tukang becak jemputan sudah datang ruponyo. Setelah ngembek
honor seadonyo di panitia show, tigo konco ini becepet naik becak. Berebuta cak
budak kecik. Empit berempit tepakso. Apo boleh buat. Nak nyewo taksi, dak
tesewo. Nyari tumpangan, dengan siapo yang nak bebelas kasian.
Di pucuk becak dak ado yang bebunyi selain roda samo tumit
mang becak yang tunggat-tunggit narik be cak. Diem galo-galo. Mamat merem
melek, Mayang pecak nak ngeluncat karno kesempitan, dan Mang Lebay mendadak
teseler keabisan tenago.
“Stop … stop mamangku!” Teriak Mamat.
Keduo konconyo pado tekejut. Tapi karno diomongi nak
embadok, terumpak ngeluncat turun hampir
nyampak.
Ahaaa … embadok duken.
Dimano?
“Pokoknyo kamu beduotu meloki aku bae, “ kato Mamat, “Ke
mano aku, disitula kamu. Tau beres …”
Masuk lurung, metu lagi. Belok kanan, manjat tembok bekawat.
Turun lagi. Ngelewati kandang ayam, ado sungi kecik tempat bebek berenang,
uwong maincing kalu ari libur.
“Naa … itu dio tempatnyo. Kejingokan dak?”
Mang Lebay samo Mayang tepakso micingke mato …
“Itu … yang sebelah kanantu,” tunjuk Mamat.
“Ooooo .. yang pondok itu.” Mayang raso dak cayo.
“Jadi …” Mang Lebay raso nak balek. La lapar, sampek sano
embadok lum tentu. Cugak bae.
“Tenang bae. Ado baka’an di sano …” Mamat ngeyakinke Mang
Lebay yang mulaki ragu nak ke pondok itu.
Kiro-kiro limo menit bejalan sikil, sampeklah betigoni di
pondok kenangan, reyot la miring ke kiri itu. Ado bangku kecik. Meja jugo
kecik. Tiker anyaman bambu buruk. Pecak la setaun dak dicuci-cuci.
“Naa .. tunggula duken di sini. Jangan beringgut-ringgut …”
“Kau nak kemano Mat?” Tanyo Mang Lebay.
“Adola. Tunggu baela denget …”
“Jangan lamo igo, Kak Mamat yo. La lapar ni …” Simbat Mayang.
“Beres … is oke!”
Sepeninggal Mamat, Mang Lebay samo Mayang saling
curhat-curhatan. Kadang ketawo, kadangtu pecak nak nangis, tapi dak metu banyu
mato. Lupo kalu perut la keroncongan.
Dak jauh dari pondok. Mamat lagi nyabut ubi kayu, dewekan
bae. Tecabut sikok, tapi besak dan banyak ubinyo.
Supayo dak payah, itu ubi idak dipikul dak. Diseret bae
ngelewati jalan setapak betanah liat. Enteng jadinyo. Dak teraso gino kalu la
gemeteran nahan lapar.
--------------------------
Tidak ada komentar:
Posting Komentar