Entok (8)

Novel ...
Entok (8)
Oleh Wak Amin


15
"TUNGGULA denget Cek Yeng," bisik Cek Lung sambil metuke rainyo parak keladi awo-awo.

"Kagek ilang, cakmano." Uji Cek Yeng, bekipas kepanasan. Kuat gino ngipasnyo, keno pipi tembem Cek Agus tangan kidalnyo.

"Ai idakke ilang dak celanonyo. Yang penting kito berempatni sudah tau dimano laki kitotu ngelepakkenyo " kato Cek Pet, nenangke konco-konconyo.

"Kalu mak itu kito disini bae duken," saran Cek Agus. Metuke rai denget, nak mastike bae la pegi apo lum lanang berempattu.

Ruponyo lum.

"Sini bae ...Kato Cek Lung, kesiyan nyelik Cek Agus sumputan di balik batu.

" Kagek terimpit batu sikil kautu. La saropulo. Beurut pulo geknyo."

Sementarotu ...

"Payu kito balik kalu mak itu," uji Wak Yeng. Tugas la kelar, nunggu apolagi.

"Payu galo-galo ..," ajak Wak Pet. La dak ketahanan jugo nak balik.

Balik jugo naik becak. Dakdo saro dak. Cuman iwak bae yang dak dapet karno memang dakdo mancing arini.

Eheeeem ...

Cek Lung ngingatke konco-konconyo yang tibo-tibo tekantuk-kantuk.

"La balik. Bangun ..!"

Pas bangun. Cek Yeng, Cek Agus samo Cek Pet, bukannyo begancang nutul Cek Lung yang la di depan. Justru besiget ngerapike rambut, embeneri kain yang telipet samo baju yang belahan dadonyo tebuka' dikit karno diembus angin.

"Payu. Gancangla dikit," kato Cek Lung pecak nak marah.

"Sabar Cek. Uwong sabar kasian Tuhan," uji Cek Pet.

"Iyo Cek," simbat Cek Agus," Uwong sabartu pasti banyak duitnyo."

"Duit aponyo. Duit kertas iyo ..."

Ha ha ha ha ...

Singkat cerito. Nyampela Cek kito berempatni parak celano dalem yang disingitketu ...

"Masalahnyo, karno agak dalem, tanggungla kalu bepakaian."

"Maksud Cek Lung?"

"Tepakso kito.buka' kain apo celanoni. Baju biarkela .."

"Ai dak galak ai. Malula dijingok uwong lewat. Peraso uwong nak mising," kato Cek Pet.

"Lemakla dak usah nyelem sekalian daripado dak becelano."

"Jangan mak itula Cek," simbat Cek Yeng. "Dak adil namonyotu. Madak'i cuman kami betigo bae yang nyelem. Alangke lemak rasan kautu ..."

"Sudah cak ini bae Cek. Kalu memang dak galak buka' celano apo kain, pacak bae. Dak apo-apo idak. Cayola samo aku," uji Cek Yeng.

"Cuman agak berat bae. Tapi dak apo-apola. Yang penting kautu melok nyelem jugo. Oke?"

"Okelatu Cek Yeng," kato Cek Pet. Seneng dio dak jadi telanjang.

Turun ke banyu ...

Byuuur ...

"Makmano Cek?" Tanyo Cek Yeng. Dio cak nak ketawo enjingok Cek Pet kedinginan. Nyelem lum, la enggigil.

"Tahan Cek Pet yo?!"

"Tahaaan."

Berempat saling endeketke palak. Sempet ketawo, senyum supayo dak gugup igo.

Bleeeep ...

Nyelem berempat.

Berobok ... bok .. bok.

Berobok ... bok ...bok.

Dari pucuk banyu kito cuman biso enjingok gelembungan banyu. Berobokan mak kato uwongtu.

Byaaar ...

Nimbul lagi.

"Kuat niyan selipannyo," uji Cek Pet. Menges sampe metu ingus.

"Masih kuat Cek Pet?"

"Masih Cek Lung ..."

"Payu kalu mak itu kito nyelem lagi .."

Bleeep ...

Tenang pucuk banyu. Dak pecak taditu. Berobokan. Dak ado bunyi. Apo idup apo mati dak tau pulola. Yang pasti, Cek kito berempatni masih ado di jeru banyu.

Byaaaar ...

Cek Pet metu duluan. Dahtu Cek Lung,  Cek Agus dan yang paling buncit Cek Yeng.



16

WAK Agus ...

"Alangke lemak naek becak
Makek baju seneng belagak
Alangke lemak samo emak
Katik nasi langsung ditanak.."

Wak Yeng ..

"Makan nasi lauk tempoyak
Dipajuh beduwo samo budak
Kesano lemak kesini lemak
Tandonyo itu idup enak ..."

Wak Pet ...

"Bangun tiduk langsung mandi
Sudah mandi makan nasi
Alangke lemak ado bini
Sudah belagak cinto mati .."

Wak Yeng ...

"Jalan-jalan ke Pulau Bali
Mampir ke pasar beli  panci
Alangke cindo adik kami
Sudah cantik banyak piti ..."

Wak Agus ngayuh becak ...

Nyanyi samo-samo sambil betepuk tangan, paho samo pipi ...

"Alangke cindo budak itu
Muko cantik lagi ayu
Alangke lemak kue itu
Dipajuh beduwo waktu dalu.

Masak nasi tigo canting
Rebus kangkung samo dencis
Kalu idup nak tahan banting
Banyak begaya rai bengis.

La la la la ...

Lu lu lu lu ...

Le le le le ...

Li li li li ...

Naek angkot kito ke kota
Banyak penjingokan kito mampir
Kalu kito pengen kaya
Rajin bae cengar-cengir.

Hari ini kito puaso
Besok Luso iyo jugo
Kalu kito banyak duso
Cepet tobat janganlah lupo.

La la la la ...

Li li li li ...

Le le le le ...

Lu lu lu lu ..."

Gantian Wak Pet yang ngayuh becak ...

Sekalini dak samo-samo lagi nyanyinyo. Dewekan. Yang nyanyi tukang kayuh bae. Yang di jeru becak teserah nak ngapo. Melok nyanyi boleh, nak tiduk munggu. Diaturi ...

Kloneeeng ...

Triiiing ...

Traang ...

La duwo menit bejalan dak jugo tedenger Wak Pet nyanyi. Eranla konconyo betigoni. Apo ngantuk apo makmano.

Penasaran, nolehla Wak Yeng. Metuke rainyo parak sadel becak. Denget bae. Dahtu dimasukkenyo lagila rainyo.

"Mulutnyo begerak-gerak," bisik Wak Lung.

"Dakken ado." Wak Yeng samo Wak Agus dak cayo. Pasti embudike Wak Lungni. Katik lain.

"Dak cayo, jingokla dewek," uji Wak Lung. Ngomong lewat kuping. Dari kuping ke kuping supayo dak kedengeran Wak Pet.

Lamo masati, barula Wak Yeng samo Wak Agus cayo. Mulut Wak Pet memang begerak-gerak. Caknyotu senang niyan. Senyum-senyum, ketawo dewek. Idak biasonyo. Galak merengut.

"Makmano kalu kito stopke bae," usul Wak Yeng. "Kito tanyo samo Wak Pet. Dio nyanyi apo bedo'a."

"Biarkela bae," uji Wak Agus. "Kan dak lamo lagi nyampe kito. La tanggung. Kito baru tanyo pas becak berenti. Makmano? Setujuuuu ...?"

"Setujula."

Tobe continued.