Goh-Gohda (6)

Novel ...

Goh-Gohda (6)
Oleh Wak Amin

10
DIBINGINA, radu mandi, mongan, ngudut rik ngopi, Mang Yahya kuruk kamar. Mak cawa-cawa lagi, cakak dunggak kasur. Turui.

Anggoman rik karuwa anakna hiran ngaliyak Mang Yahya turui gancang.

Bak api?

Diguyang-guyang kona kukut rik pu ngu lakina, mak minjak hoda.

"Raduda Mak," cakdu Lia, anak tuhana. Mak kolu rasana minjakko bapak lagi turui landok.

"Iyu Mak," jawabdu Yeni, si ngura. "Konaikoda Mak."

Bik Yahya lokok panasaran sabonor na. Sai tikarabaisa kintu buhaban. Api cak hun. Laki posai mak diluhunko. Anggoman juksipa. Mak karuhan diaguk.

"Sinakan pangrasa umak bagawoh," cawadu Lia. "Ubak kan sihat-sihat bagawoh. Sakik mak, api-api juga mak. Juksipa pandapatmu Dik?"

"Satuju nyak Yuk. Jak pagi tungguk ibi kan ubak bugawe. Nukang lam bahan Mang Rolan. Losu kok tam tu. Tungguk di lambahan ompai karasaian."

"Api kita turui munih?" Tanyadu Bik Yahya. Kok tikadugok yoja. Mih nga liyak lakina turui landok, anak baina makkung haga turui.

"Kita mojong podok jandilo jugayu Mak. Juksipa. Haga kan?"

"Haga pasti umakmu, Yeni." Cakdu Lia. Dituntunna umakna. Umak rik anakna mojong podok jandilo.

Bangik hoda rupana. Tiyan tolusa bucurita. Kintu Yeni rik Lia bucurita sual sikolah, umakna bucurita waktu ngura paija.

"Sai mona bupodok, umak api ubak yo Mak?" Pancingdu Lia.

"Ubakda yo Mak. Mak kambih mouli mona sai bupodok. Mak holau. Bonor Mak yo."

"Iyu koda Mak cawadu Dik Yeni. Nonti miwang munih. Saroda kita di lambahansa bakdu hiwangna."

"Sabonorna karuwa-ruwana anakku," jawabdu Bik Yahya, ngingokko masa ngura paija.

"Maksuddu Umak?"

"Ubak bupodok, umakmuja hoda bupodok."

Hi hi hi hi ...

"Ngapi kuti ruwana maha?"

"Lucu Mak. Nyak ingok umungan sikam sai ngurasa .." Bakas galak, baibai gatol .."

Ha ha ha ha ..

"Huuusy. Layon juksapona."

"Bugurau bagawoh Mak," cak Yeni, ngusap pipidu umakna. Walau mak ngura lagi, lokok koncong kaunyin-unyin.

"Juksipa kira-kira Mak?" Tanyadu Lia, kapingin pacak bagawoh. Kintu wat faidahna.

"Maksud Umakmuja, umak rik ubakmu mimang sama-sama love."

Ha ha ha ha ...

"Love apiyona Mak?" Lia maha mih mak tikahaha nihan ho.

"Pocak mak pacak bagawoh. Kuti sai ngurasa lobih pacak jak umak muja."

"Kintu sai dimaksud cinta sikam ruwa pacak Mak. Tapi kintu baga woh love sai dimaksud Umak sumang, wat horti khusus."

"Goh-gohda Lia. Maksud umakmuja juksija. Ubak rik umakmuja, cakdu sanak gantasa, saling menyintai .."

" Yeeeah. Umakmu ..."Cak Lia maha di lom hati.

"Nyak laju kapingin Mak," cawadu Yeni.

"Huuusy. Lokok ronik. Dang pai.
Kok balak nonti ompaida butina daian."

"Kok tamtu Mak amun sina. Maksud nyakja kapingin juk umak. Mesra torus rik ubak."

"Nyak hoda Mak," cakdu Lia. "Mun kita saling manyintai huriksa jadi bangikda. Mak ulah bubalah. Sojuk ra sana mun kita wat di lambahan."

Guk .. Guk ...

Heeeergh ..

Guk .. Guk ...

Heeergh ...

"Mak ...Mak. Liyak Ubak. Bak api ya ..." Lia timona modoki ubakna. Dirabana koning. Kintu panas. Mak ya wat.

"Bak ... Bak. Minjak." Korahdu Yeni.

"Asu ... Asu ...Lijungda asu."

"Asu api Bak? Mak ongka asu dija." Cakdu Bik Yahya. Mak katoduh apiya cawaan lakinaja.



11
"DIPA ubakmu hanjona Ria?" Tanya du Bik Latif, juk jolma bingung. Ulang- uloh jak pawon ti ruang tamu. Sai disopok mak ongka.

Dipaya?

"Kok tihalu Mak?"

"Makkung. Cuba sopok pai. Kintu wat di balakang .."

"Rabai Mak. Dibingi juk sija nonti ditinjuk saitoooon .."

"Nonti Mak riki'i. Payuuu .."

Disopok di balakang mak ongka hoda. Muloh lagi kuruk di lom ..."

Pandok putus asa, tiba-tiba Ria an jorit mangking ngamanggil umak na. Ompai jak ngakuk binyulu ga sum bahyang isya'.

"Liyak Mak ... Ubak!"

Mang Latif turui di somin. Landok nihan. Api mak kuruk angin. Mak munihga. Mihya anggomanna hiran, kok uni turui di somin, dibingisa muloh lagi.

"Kita liyak Mak ganta."

"Dang kung pai. Kita sumbahyang pai. Ngakukda binyulu niku
Umak tunggu ..."

"Riki' i Mak. Nyak rabai."

"Payuuu .."

Radu ngakuk binyulu, sumbahyang Isya' tiyan ruwaja. Umak rik anak buimaman. Khusyuk nihan.

Kita sai ngaliyakna ga turuk sum bahyang munih rasana.

Ngapi juksapona?

Sobabna, jak ngangkat pungu tung guk sujud, ruku' pas nihan.

Mang Latif?

Lokok landok turuina. Kadang ti kiri, kadang ti kanan. Matana lokok bi yak ngaliyak.

Ombowna mak honi lagi. Mulang jak nukang, mandi. Buganti kawai. Mongan radu. Ngopi juksina hoda. Sumangna, makkung sumbahyang Isya'.

"Bak ... Oi Ubak." Cakdu Ria. Anggo rakko kukut Mang Yahya supaya minjak.

"Dang kuat ga," cawadu umakna. Sai tikarabaisa nonti suya bakdu tikanjot.

"Bak ... Ubak. Minjak .. Sumbah yang Isya'. Radu sumbahyang turui muloh jadi."

Buulangkali mak hoda minjak, Ria rik umakna anggulik dunggak ka sur. Nunggu Mang Latif minjak. Sauni-uni turui pasti minjak hoda.

Bonor mak kolpah?

Sambil nunggu ubakna minjak, Ria bunyanyi di kabolah umakna sai ngating tasobih.

"Di bingi juksija
Ubak turui
Sikam ruwa nunggu
Idanya minjakna ...

Sangarobok lagi dalu
Joh pagi sikolah
Tikarabai tikadugok
Andongi guru
Anjolasko palajaran ... "

Dijawabda bak Bik Latif ...

"Amun mak minjak-minjak
Dakkoda diminjakko
Mari kita turui
Nonti hoda ya minjak

Dang munih tunggu dalu
Mun ga turui turuida
Sai saro
Mak sikolah kona suya ..."

Mak uni sina, Mang Latif bunyanyi ..

"Ubakmuja jolma susah
Jak ronik tunggu' ganta
Ruku' sangabatang mak kaboli
Mun mak ngahutang ..."

Ha ha ha ha ...

"Hi hu ..." Mang Latif cawa posai. Radu sina bunyanyi lagi.

"Ga turui turuida anakku
Rik umak dunggak pok turui
Tongah dalu nonti ubakmuja minjak
Sumbahyang Isya' rik tahajud ..."

Ha ha ha ha ..

Tobe continued