Goh-Gohda (8-TAMAT)

Novel ...


Goh-Gohda (8-TAMAT)
Oleh Wak Amin


15
NGAHATOK radu. Tinggal lagi ngo cet  rik magor. Supayo kaliyakan holau, Mang Rolan kilu pandapat mamang pakja.

"Cuba pai. Nyak ga andongi jak kuti pakja. Kintu bagawoh pas rik sai di lom utokkuja."

"Payu mun juksina," cakdu Mang Yahya, "Amun pandapatku langgar ko jugaya. Sobab, dijasa kan lokok sopi.

" Kintu pagarna robah, mak aman dayona. Asu kuruk. Macom-macomda. Amun ya langgar, mak pacak."

"Eeem. Tuwon munih. " Cakdu Mang Rolan. Mihya kintu langgarga mak bangik munih. Juk istana. Mak merakyat. Radu sina, mun cakku mahalda ungkusna."

"Makyawat munih Mang. Pacak-pacakda kita. Mun mak haga mahal umpamana, robahko cutik. Nambunko somenna."

"Mih, api lokok bangik ngaliyakna Mang Yahya?"

"Lokokda Mang. Kan nonti dicet pagarho."

"Payu. Tarima kasihda amun juksapona. Ganta nyak kapingin andongi ide jak Mang Latif."

"Amun cakku, makinda bupagar," torang Mang Latif sambil.maha ngikik.

"Ngapi juksapona Mang?" Tanyadu Mang Yahya.

"Mihya ditanomi bunga. Jadi bungana kita sopok. Kito posai nontukona. Bunga api sai cocok. Mun cocok ompai kita diritko juk kita angguwai pagar. Naaa .. Supayo kaliyakan holau, di tongah-tongahna tanoman nontina kita pasang kawat. Jadi jak luwah kaliyakan gogah ..."

"Satuju nyak rik pandapat Mang Latif," cawadu Mang Kafi. Mihya nyopok tanomanna sai payah. Dipaya nyopokna ..
Sina sai partamo. Karuwana, rawangdu pagar juksipa. Katolu, repotda kita. Mosti rajin buborsihan.

"Tuwon munih ... ," jolasdu Mang Rolan. "Kita dongi pai pandapat Mang Nasir, juksipaya."

"Mun nyak pagor biaso jugada. Mak langgar, makwat robah. Rawangna sai jadi. Ruwa hoda jadi. Kita liyakda nonti ..."

"Modelna Mang Nasir?" Tanyadu Mang Rolan, kapalang nanya sual pagar.

"Juksipa keinginan sai dok lamba han. Biaso bagawoh misalna. To ngahna juki bosi bulat. Disomin, radu. Cet ... Mudah angguwaina. Mak uniga. Ngaliyakna totop cindo. Mun cakku."

Rokob sangarobok.

"Nyak pai." Mang Kafi kilu waktu cawa.

"Lajuda Mang ...," cawadu Mang Latif. Ngakuk punti tingguring sai jak piring. Dikanik rik wai kopi.

"Mun cakku guwai siwoan jugaya. Amun maksina .. warung."

Ha ha ha ha ...

"Tuwon munih," cakdu Mang Yahya rik Mang Latif, ngapabola-i punti tingguring.

"Mih sopi dijasa Mang Kafi." Mang Rolan ragu nonti sai dijual mak ong ka sai ambolina. Malah kona ram pok jomoh.

"Sina sai tikarabaina," cakdu Mang Rolan, ngorah anggomanna angguwai lagi wai kopi.

"Mang Yahya?"

"Holau hoda mun diguwai warung. Warung basingda. Wat ya karupuk, siyabuku, minyak tanoh. Jajanan sanak, wai handak. Ngaliyak kaadaanda Mang. Supayo mamang mak nyolsol. Kabolah kirina dang pagor pai. Sisako cutik guwai warung ..."

16
"PADOKKO nihan somennana Mang Nasir," cakdu Mang Yahya. Radu angguwai pagor, tiyan pakja angguwai warung.

Makya wat balakga warungna. Juk garasi kamonada balakna. Rencana Mang Rolan, warungsa nonti anjual barang kalontongan, mun ya maju.

Munya makwat?

Sai laku jugaya. Umpamana rukuk, gula, kopi, siyabuku, minyak tanoh, bensin. Macom-macomda. Ngaliyak kaadaan.

Modal kok wat, cakdu Mang Rolan. Tinggal lagi radu lambahan rik ra wang, langsungda tiisi. Mih mak lamunga samantarosa. Nonti, po cak nambun sai amboli, ompaida ditambah.

"Di balakangna hoda Mang Yahya?" Tanyadu Mang Nasir.

"Kaunyinna Mang. Bolang-bolingda mun sija disomen, disan makwat."

Ha ha ha ha ...

"Mun mak tigawi, yo ditulungda," guraudu Mang Kafi. Mihya Mang Latif ngaharusko somendu pagar. Mari gampang ngocetna rik mangkilat.

"Ga ditulung payu, mak ditulung payu," cakdu Mang Nasir. Pocak haga miwang.

"Bak api losuho?" Mang Latif buhodak sangarobok. Ya ngaluahko jak calanana. Rukuk jambu bol.

"Ngudut pai Mang Nasir."

"Ngapi mak jakjona Mang Latif."

Rukuk disundut. Dihisap.

Sssssst ...

"Gogah muloh," cawadu Mang Nasir. Ruwa hisap, inumko wai kopi.

"Sina hortinanayo. Losu bakdu makkung ngudut ..." Nyahut Mang Yahya jak balakang. Maha ngikik.

"Cakku buntu .."

Ha ha ha ha ...

"Amun kita sai pangudutsa, bangik da buntu daripado mak ngudut. Bo nor mak Mang Nasir?"

"Layonda lagi bonor. Tuwon."

Ha ha ha ha ...

Dibina ...

Nyomen lantai. Gampang kaliyakanna. Padohal makwat. Sobab, di sakaliling warung, rumput kaunyin-unyin. Jadi diborsihko pai.

Radu diborsihko, tanohna diratako. Mihya kaliyakan padot. Radu sina, somen diaduk. Ompai nyomen

"Buguyur jugaya Mang," cakdu Mang Yahya. Ngaliyak Mang Nasir pocak kaloh-lohan.

"Istirahatda pai sangarobok. Nonti nyak anggawikona," cakdu Mang Yahya.

Tidipaya Mang Latif rik Mang Kafi?

Ngocet pagar. Diguyuri bagawoh. Lambahan gancang radu, Mang Rolan sonang. Pacak ditinggali sapa juga ga ninggalina.

Sambil ngocet, bunyanyida tiyan ru waja mih mak gancang bosan.

Mang Latif ...

"Guwai api sambol sina
Jak jona mak dikanik-kanik
Nyak kapingin ga ancuba
Kintu bagawoh rasana bangik .."

Mang Kafi ...

"Mimang sambolda guwai mamang
Supayo kuat mak losu lagi
Dikanik rik kan dunggak ranjang
Lambahan radu dapokda gaji ..."

Ha ha ha ha ...

Ngakuk imbir Mang Nasir. Mang Yahya ngakuk botol.  Ditabuh buruwa sambil bujoget.

"Joget samapai manom," cakdu Mang Latif.

Andongi tiyan pakja bunyanyi sambil nabuh imbir rik botol, kadongiyanda bak jolma liyu.

Sai-sai bupodok. Turuk bujoget munih.

TAMAT