Mang Kerio (89)

Mang Kerio (89)
Oleh Wak Amin


BESOKNYO ...

Waktu nak balik dari kantor, pas ni yan nak masuk jeru mobil, Nona El en dapet telepon dari lanang yang ngaku ngembek kancutnyo.

"Jadi kau nak ngapo. Kucupakke gek kau," ancam si lanang dengan nado suwaro tinggi.

"Dak senang apo?"

Nona Elen narik nafas denget ...

"Anda ini lanang buruk'an," kato Nona Elen, sengajo mancing si lanang supayo marah.

"Apo kato kau. Lanang buruk'an? Kau dak tau siapo aku? Akuni preman besak tau dak .."

"Nak preman besak nak preman kecik, kalu ngeraso lanang jangan sumputan .."

"Naa betino ini. Nak saro niyan. Kuceturketula baru tau .."

"Cubo kalu berani?"

Klontenng ...

Bunyi suwaro kaleng. Marah, kaleng bekas cat jadi sasaran. Keno kucing pulo. Untung dak bedarah.

Si lanang becepet enggari Nona El en. Si nona ngenjuk tau Mang Kerio. Diceritokenyola kronologisnyo dari A sampe Z.

Mang Kerio nyaranke langsung balik bae ...

"Biar gek manang embuntuti dari buri," kato Mang Kerio, la besiyap pulo nak balik samo Cek Leha.

"Tapi Mang .."

"Dak usah takut. Posisi Non Elen sekarang dimano?"

"Parak tugu Mang ..."

"Oke. Kito gek komunikasi terusla. Mamang siap meluncur sekarang."

"Baik Mang ..."

Pucuk jembatan ...

Si lanang marah besak. Ampir bae telepon genggam dibantingkenyo. Dio cepet sadar. Kalu rusak dak pa cak ngontak Nona Elen lagi.

Rugi besakla ...