Mang Kerio (37)

Mang Kerio (37)
Oleh Wak Amin


"PARAKKE kesini lagi tangan Maktu," uji Ali.

Jamilah deg-degan jugo. Dia parak ke tangannyo deket kersi jati.

"Makmano Mak rasonyo?"

"Cak ado tangan Li," kato Jamilah. "Apo ini ..?"

"Yo Mak. Itu tangan bapak," kato Topan. Seneng enjingok rai Mak nyo senyum.

"Iyola kan Mak?"

"Iyola Pan. Dak salah lagi. Cuman ngapo dak anget ye. Dingin cak es," kato Jamilah.

"Dak apo-apola Mak. Yang penting tangan bapak," kato Ali.

"Dahtu makmano Makni Li, Pan?"

"Ngomong bae Mak cubo. Mano tau nyahut bapaknyo."

"Ngomong apola Li?"

"Apo baela Mak. Yang penting Mak ngomong cak ituna."

"Mak cubo ye." Jamilah embenerke letak duduknyo. Kalu tadi besim puh, sekarang besilo.

Ali samo Topan jugo duduk besilo di kiri kanan emaknyo.

"Mas. Apa kabar?"

Lum nyahut.

Padohal Jamil ado di situ.

Jamilah mulak'i gelisah ...

"Sabar Maktu."

"Cubo ulang lagi Mak." Kalu bae, ka to Ali,  bapak pacak enjawabnyo sekalini.

Jamilah bepejam.

Bismillah ...

"Assalamualaikum Mas Jamil. Saya Jamilah isteri Mas."

"Waalaikum salaaam," jawab Jamil.

Alhamdulillah pacak ngomong lakiku. Kukiro bisu ..

"Apo kabar Mas?"

"Kabar baik Dik."

Ouuuw .. Cindonyo suwaro itu. Lem but dan lemak endengernyo.

"Lemak dak disano Mas?"

Jamil diem.

Dak lamotu nangis ...

Sedih niyan endengernyo nangis. Dak pacak ngomongkenyo.

"Mas ngapo nangis?"

"Sedih Dik."

"Ngapo? Dak lemak yo Mas disa no?"

"Dak lemak Dik. Sepi. Katik rewang," kato Jamil, masih sesunggukan.

"Apo gawe Mas disano?"

"Dak katik Dik. Meguk bae," uji Ja mil, dak sesunggukan lagi.

Ali samo Topan teketawo.

Jamilah mikir, apolagila yang nak diomongke ...