Minggu Keduwo
Oleh Wak Amin
Cerbung Musi Bebanyu (Bag 17)
SELAIN ngunjungi panti asuhan, Mamat dan Mang Lebay ngongkon
Ningsih, Olis dan Yuli, nyari kliping koran yang nyeritoke budak ditinggal pegi
emaknyo. Duwo tigo ikok kliping jadila. Kliping itu geknyo didiskusike dengan
sang pelatih, ecaknyotu.
Itu bae?
Yo idakla. Selain kliping koran taditu, Ningsih cee es jugo diajak nonton film anak-anak yang
temanyo tentang budak yang dak katik emak. Atau emaknyo ado, tapi dak pacak
embimbing anak-anaknyo karno sakit dan keterbatasan fisiknyo.
Lebay en Mamat ngenjuk waktu seminggu untuk ngumpulke
kliping dan nyiapke tontonan pendukung drama. Jadi dalam semingguni besigetla
Ningsih, Yuli dan Olis nyari kliping. Di internet ado, koran jugo ado. Sedangke
kaset video minjem punyo konco sekolah.
Waktu Mamat en Lebay sampe rumah Ningsih, entah makmano,
Ningsih samo duwo konconyo berebu tan nyiumi tangan. Tangan siapo? Dak katik
lain, tangan bujang duwo inila. Yang tangannyo dicium dak pacak nulak karno
ngejut nyiumnyo. Bedesir-desir pulo …
“Beres galo, Om. Tinggal becerito samo latihan bae,” kato
Yuli embukak cerito.
“Bagus Om, ceritonyo,” nyimbat Olis.
Daklamotu metu dari dapur Ningsih sambil embawak limo ikok gelas teh manis dan
kue kering yang di lepakke di pucuk tipsi besak. Selain manis, di jeru gelas
ado batu esnyo, bepetak-petak, segi empat. Dingin, lemak nian kalu diminum
panas-panas mak ini.
“Payu Om … sinila kito!” Ningsih ngelepakke idangan taditu
di pucuk ambal libar di ruang tamu.
“Pas niyan. Pacak niyan kau, Ning. Aus kami beduwoni,” kato
Mamat yang dari tadi nak minum banyu es.
Cubo mampir di warung …
Ngemaluke bae …
Jangan tunjukke igo bokektu …
Yo, namonyo jugo bujang. La bangun siang, kalu ari libur,
dak sempat sarapan pagi, numpang tempat konco ngisi perut, itula biaso. Apolagi
kalu lagi buntu.
“Naa … arini Ningsih nawaki. Ngapo nak malu-malu,” uji Mamat
la mulaki tebiaso dak punyo malu.
Ha ha ha ha …
“Malutu idak. Cuman ..” Lebay ngemainke lidahnyo yang dak
betulang, daging galo-galo.
“Cuman ngapo, Om?” Tanyo Olis besemangat niyan.
“Kurang banyak banyu samo esnyo …”
Ha ha ha ha …
“Kalu kurang gektu embek bae banyu sumur di buri rumah,”
simbat Mamat lenak abis banyu di cangkir dio minum.
Kelakar betok samo ketawo dak lamo igo. Sebabnyo, sesuai
jadwal latihan, suwo kali ini khusus embahas asil pandangan dan pendapat
Ningsih, Olis dan Yuli.
Dari sini gektu baru dapatdijingok mano yang kurang dan mano
pulo yang idak kurang. Mano yang la matang mano pulo yang lum. Mumpung lum
pentas, masih banyak waktu nak bebenah, supayo asilnyo baik gektu.
“Cubo kau duken, Lis …” Mamat embolak-balik kliping berita
dari media online.
Olis besiap.
Siaaap … geraaak!
Ayo Lis …
Ngapo guguptu …
Kalu nurut aku, Olis mulaki becerito, budak yang emaknyo dak
katiktu ado duwo perangai. Sikok banyak ngelamun, sikoknyo lagi banyak begaul …
Ngapo biso mak itutu …?
Karno pembawannyo, mun ujiku. Yang lemah pembawaannyo, yo
itula yang galak ngelamun. Di pikiran nyo cuman emak bae. Walau diakui, waktu
emak ado atau masih sehat, dak katik kelainan misalnyo, ga lo-galo kendak pasti
dituruti. Nak duit jajan ado. Nak main samo kawan biso, nak mintak rewang tiduk
jugo biso.
Apo lagi yang dak biso?
“Betul … Nah, selain emak yang laintu samo dengan dak katik.
Akibatnyo, idup jadi benar-benar tepisah, asing. Malas bekawan, bukan katik kawan,
tapi yang nak endorong dio main, bekawantu, uwongnyo la dak katik …”
Yang begaul?
“Na … biasonyo begaul abis. Dio dak ngeraso dak katik emak.
Ado dak ado emak bagi dio samo bae. Bu dak cak inini jarang ado, sedikit
jumlahnyo. Kalau pun ado, masih jugo nak didorong baru dio galak …”
Ai cak professor kau, Lis …
Bentar lagila …
Tunggu bae tanggal mainnyo …
“Apo kesimpulan awak, Lis?” Tanyo Lebay.
“Kesimpulannyo ado duwo jugo …”
Ai ai ngomong beduwo terus …
Apo .. jangan-jangan …
Lah ado yang punyo …
Ajaklah kito …
“Pertamo … agak berat kalu dijadike sikok, Om. Retinyotu,
kalu aku nak jadi budak yang lemah, yo
ha rusnyo yang lemahtula. Jangan digabungke dengan mudah begaul. Kagektu takutnyo jadi kacung arut …dak
tekeruan mano ujung mano pangkal.”
“Oke .. oke, terus …”
“Yang keduwo, embek yang penting bae yang ado kaitannyo
langsung samo pementasan drama kito.”
“Misalnyo?”Mamat ganti betanyo.
“Misalnyo bae .. aku meranke budak lagi ngelamun bawah
tanggo. Nah, kito batasi waktu dan pacak ngelamunnyo. Jangan ngelibar. Ngelamun
karno lum makan, sakit atau karno kebiasoan, na
ini yang kumaksudketu …”
Masih bingung niyeee …
Mak jolas …
Lum paham …
“Jelasnyo mak ini. Kito ngelamuntu ngembek yang la biaso
tejadi dengan budak yang keilangan emak atau berani tampil bedo …”
“Kito jingokla gektu ..” Uji Lebay yang dari tadi lum jugo
diminum es teh manisnyo.
Ado lagi, Lis?
“Jadila dulu itu, Om …” Kato Olis lego pecaknyo. Saking
legonyo, lupo kalu ngelap keringat pakek lap tangan.
Dug … dug … dug …
Lohor datang …
Kito sembahyang …
Bejemaah supayo idup senang …
----------------------
Minggu Ketigo
Oleh Wak Amin
Cerbung Musi Bebanyu (Bag 18)
LEPAS lohor, latihan drama en puisi dilanjutke lagi. Sambil
ngunyah nasi samo pindang patin lalap peti samo kerupuk, giliran Yuli yang
ngomong.
“Senyumla dikit, Li.
Jangan cak nak merengut baetu. Kagek kato Ok Omni ado apo-apo,” kato
Ningsih sambil nyendok kuwah pindang campur kemangi.
Na .. mak itu dong
Baru dang ding dung dong …
Yuli akhirnyo pacak ketawo. Manis niyan ketawonyo. Cak gulo
palu. Narik nafas denget, dio bacoke inti asil pengamatannyo. Katonyo, apo biso
budak-budakni gektu didukung oleh suaro musik?”
“Maksudnyo?” Tanyo Mamat ngerutke kening.
“Cak ini .. Misalnyo bae .. Aku lagi makan dak begulai.
Penonton kan pacak nilai lewat tampilan budak di pucuk panggung. Budakni
tepakso makan atau memang lahap niyan. Na, waktu penonton enjingok sam bil
mikir tadi, ado iringan music yang nada dan segalo tetek bengeknyo disesusaike
dengan keadaan saat itu.”
“Olis, ado yang nak ditanggapi?” Lebay mancing Olis ngomong
yang pecak lenak tengantuk. Kalu dio ngomong kan ilang kantuknyo. Dak tepikir
nak tiduk.
“Aku raso bagus apo yang diomongke Yulitu, Om. Kalu misalnyo
datar bae … rasonyo dak lemak. Sepi … Walaupun penonton tetep dijejeli dialog
dewekan dan dengan uwong lain …”
“Ningsih?!”
“Aku setuju, Om. Asalke bae musiknyo jangan dicampur adukke
…”
Nah, nah … apo pulo kendak budak sikokni …
Kalu es campur maksudnyo …
Bahannyo banyak dicampur jadi sikok …
Ado cincau, cendol en tapai …
Diminum : sedaaaaap ….!
“Mungkin maksud Ningsihtu,” kato Yuli, “Sikok alat musik bae
dimainke. Apo suling bae, biola bae, atau gitar. Jadi jelas, lemak endengarnyo
…”
“Makmano duhai Ningsih?” Giliran Mamat ngelemparke
pertanyaan.
“Iyo, Om. Mak itula yang kiro-kiro Ningsih maksudketu …”
Serempak nulis …
Sambil ngirup pindang …
Lemak en nikmaaaat …
Menggorooook …
Terakhir, giliran tuan rumah Ningsih yang ngomong. Ningsih
mintak waktu nak ngerapike bekas makan mecem piring en gelas samo Yuli dan
Olis. Dibawak ke dapur, dibasuh bersih, dahtu dilap, dimasukke ke gerobok kaco.
Dahtu balik lagi ke ruang tamu sambil embawak sepiring besak
jagung goreng. Mamat dan Lebay pecak serius niyan ngobrol, endiskusike asil
pendapat en masukan Olis samo Yuli barusan. Dirumeskela cak itu.
“Naaaa. Ok Om beduwo .. kito makan jagung duken .. Dijamin
sedepni Om,” kato Ningsih, samo Olis dan
Yuli narokke piring besak berisi jagung ke pucuk ambal.
“Niyan apo Ning, sedep?” Mamat nyicip sebiji duken.
Krup .. krup .. krup …
“Lemak kan, Om?”
“Iyo jugo, Ning. Bay, payu kito cicipi samo-samo …”
Mintak oi …
Dahla Mamat …
Lupo samo kito …
Baru denget telepak bederup tinggal setengah baskom. Ai ai
.. galak galo dengan yang namonyo jagung goreng. Lemak soalnyo. La jelas lemak,
enggorengnyo bae pakek mentega, bukan minyak makan. Dicampur pulo dengan bumbu
penyedep khusus jagung.
Nak lemak lagi kalu embeli …
“Naa, sekarang ito lanjutke dengan Ningsih.” Mamat nyiloke Ningsih ngomong. Dak
usah segan. Apo yang ado omongke bae. Dak usah ditahan, supayo jelas galo-galo.
Ehem …
Ningsih keselekan …
Dikit, dak banyak dak …
“Kalu menurut aku,
meranke wong giloni gampang-gampang saro….”
“Ngapo biso mak itu?” Mamat mulaki serius nyimaknyo.
“Ngapo ujiku gampang-gampang saro, karno waktu kito nyingok
wong gilo, yang sekendak atinyo nak kemano, rasonyo pacak nirunyo. Dak katik
ambatan. Cuman …”
Hayyaaaa …
La cuman pulo haa …
Cuman telus … cuman telus
…
Kagek kulus …
“Waktu nak dipraktekke gektu ragu, apo pacak samo niyan …”
Ha ha ha ha …
Lebay ketawo ngakak.
“Kalu samo niyan pulo, gektu abis pentas, pacak jadi gilo
niyan .. ai biso kacau dunio …”
Laju teketawo ngakak galo.
Ningsih sempat dak pacak emberentike ketawonyo. Kalu dak
ditegur Yuli samo Olis supayo berenti ketawo, dak niyan berenti. Lucu ado, dak
masuk di utak jugo ado.
Sudah … sudah …
Jangan nemen gino ketawotu …
Gektu tekencing di celano …
Laju tau galo-galo …
Jadi, kato Mamat dengan Ningsih, batasi bae karakternyo.
Jangan larut igo, tapi jangan pulo cetek gino. Yang penting, kalu dak pacak
samo persis, endeketi samo lajadila ..
“Caronyo … ini dak usah diomongke, cukup di jeru ati bae,
kito ngenjuk tau penonton bahwa inilah sosok wong gilotu. Harusnyo dikasihani,
bukan dibenci sano-sini. Bukan pulo dijebeli, diuyok, dipukul-pukul dan
dibiarke telanjang …”
Nyimak apo kato Mamat.
“Jadi wong pacak tau kalu sebenarnyo wong gilotu mesti kito urus. Yo katik lain
ngurusnyo kito-kitonila. Kito enjuk taula pihak tekait. Gektu kito
samo-samo ngurusnyo … kan beres.”
“Jadi,” Lebay ngelanjutke omongan Mamat, “Kito tau bahwa
peran kito embawak misi dan bagi kito dak katik yang jauh lebih lemak selain
penonton puas, baliknyo gek tau apo yang nak direnungke en diga weke …”
Itu baru siiiiiip deh …
Dak nyesel bayar
mahal …
Ye dak … ye dak …
--------------------
Minggu Tenang
Oleh Wak Amin
Musi Bebanyu (Bag 19)
UNTUK ngilangi stres
karno la banyak ngomong, ngapal teks samo olah tubuh, disepakati ado minggu te nang
jelang pementasan drama dan puisi. La pasti, ngisi minggu tenang dakken ado
cuman mendep di rumah bae. Jalan-jalanla.
Ke mano?
Diputuske, jalan-jalannyo ke luar kota. Pakek Apo? Mobilla
jelas. Mobilnyo Wak Peng, toke pempek,
bosnyo Mamat.
Jauh dak?
Dak jauh pulola. Kiro-kiro sejam perjalanan dari pusat kota.
Yang embawak mobil, Mamat. Lainnyo duduk tenang. Tigo di buri, sikok di depan
ngerewangi sopir, Lebay.
Ngehemat piknik, embawak bekal dari rumah. Masing-masing
nyiapke dewek, sebelum distorke samo Ningsih. Bekalnyo macam-macam. Pokoknyo
dijamin lemakla embadoknyo.
Cubola dulur-dulur bayangke bae. Mamat misalnya, nyumbang
pempek. Segalo macam pempek sekotak kardus besak. Lebay? Donat tigo kardus
besak. Olis? Namonyo betino, tekwan samo roket yang isi di je runyo wortel samo
kentang. Ningsih samo Yuli nyiapke nasi komplit dengan gulai-gulainyo …
Berangkat dari rumah Ningsih jam enam lebih tigo puluh menit.
Sampe di lokasi, karno lum macet niyan, jam setengah delapan. Beringkes
sano-sini en masang tenda ngabiske waktu sejamla. Jam setengah Sembilan la
pacak santai. Kelar galo-galo …
Dahtu …?
“Kito naik perahu, bedayung belimo ngelilingi danau …
Makmanola kiro-kiro?” Tanyo Mamat.
“Oke baela, Om,” jawab Olis samo duwo konconyo serempak.
Dak banyak cing cong lagi, belimo langsung naik perahu.
Karno serempak naiknyo, ampir tebalik. Untung bae yang punyo perahu tegak di
samping perahu, becepet nahan dan nyeimbangke perahu. Dak jadi tebalik. Aman bae.
“Iseng-iseng uji
nyali ya Pak, Buk.” Kato tukang perahu ketawo nyaring. Endorong perau
lambat-lambat sampe ke tengah sedikit. Lum tengah niyan …
Jangan diem bae …
Dak bejalan perahutu …
Perahu la dak bejalan lagi, baru belimo serempak endorong
perahu. La telanjur ngembek kanan galo arah dayungannyo, yo perahunyo jalan ke
kiri. Dak maju-maju. Muter-muter lagi ado … Ributla Yuli …”
“Kalu ado buayonyo, Om di selo perahuni. Madaki
beputer-puter terus.” La mulaki cemas Yuli. Jugo Olis en Ningsih. Cuman dak
kentaro niyan cemasnyo. Masih pacak penesan samo ketawo nyingok iwak
melumpat-lumpat pucuk banyu.
Haha haha …
Ok Om ketawo …?!”
“La jelasla Om ketawo,” kato Lebay, “Kitonyo salah dewek.
Endayung ke kanan galo, perahu larinyo pasti ke kiri …”
“Jadi makmano, Om?” Sudah betanyo, Ningsih ngelus-ngelus
palak Yuli, ngongkon sabar, serahke bae samo Yang Kuaso.
“ Kito bebagi bae ..
Aku samo Om Mamat belah kanan, kamu betigo belah kiri. Oke?”
“Okela, Om …”
Naa … itu baru beperahu …
Ado kanan ado kiri …
Kan lemak wong enjingoknyo …
Baru pacak tenang Yulinyo. La pacak batuk, la pacak pulo
ketawo, penesan samo Olis. Segelitik-gelitikan, sesiram-siraman banyu. Mak itu
jugo Ningsih. Dak berenti nyanyi …
Nyanyi apo oi …
Melok boleh dak …?
Acing ae …
Ini antaro lain syairnyo …
“Dayung … dayung …
Dayung anak
plembang …
Plembang anak plembang …
Si dayung anak plembang ….”
Diulanginyo sampe limo enam kali. Baru berenti dak nyanyi
lagi waktu nyingok bukit di ujung danau. Cindo niyan. Serbo iju … Pucuknyo
putih, cak embun apo awan, dak tau jugo …
Waw …
Lemak naiknyo …
Naiknyo pakek apo ponakan …?
“Galak kau kesano, Yul? Tanyo Mamat sambil ngusap rainyo
dengan banyu danau. Bening cak banyu ujan.
“Galak bae, cuman …”
Yuli nahan ketawo.
“Cuman ngapo …?”
“Pastila, Om. Kalu malem banyak antunyo …”
Baru tau ya …
Haha haha …
“Pacak dak kito kesano, Om?”Olis penasaran, makonyo dio
melok betanyo. Katik lain. Nak tau bae …
“Pacak bae,” terang Lebay, “Cuman mesti pakek gaet …”
“Lanang apo betino gaetnyo, Om?”
“Ado lanang, ado jugo betino. Teserah kito. Nak milih yang
mano …”
Ditanggung beresla …
Tinggal naek bae …
Turunnyo berejo oi yo …
“Awwww . .. !” Jerit Ningsih sambil meluk Olis. Yang
dipeluk, karno dak biaso dipeluk kecuali samo emak ebaknyo, kegelian. Apolagi
tangannyo Ningsih cak liar niyan nyawel keleknyo.
Enjerit galo-galo. Tapi yang betino bae, lanangnyo idak.
Ado apo?
Ado ulo ruponyo. Waktu Ningsih nyelupke tangan di jeru
banyu, tepegangla ulo banyu. Licin. Ngelingker-lingker pecak nak nyokot.
Mamat en Lebay becepet endayung. Perahu dak lagi di pinggir niyan, agak ke tengah. Ulo
banyunyo ilang dewek. Dak tau pegi ke mano. Dak pamitan lagi. Aman. Dak lagi
enyerit. Ningsih, Yuli dan Olis la pacak senyum geli nyelik bebek angso
berenang beduwo.
Pengen jugo niyeeee …
Ah, mau tau urusan wong lain bae …
Dosa lu …
Puas beperahu, wong limoni melok pulo outbond. Ado
serombongan budak es em a piknik, ngadoke outbond. Enjingok Ningsih, lantaran
ado yang kenal, diajakla naik jembatan tali. Nyebrang ke batu duduk di pinggir
danau …
Namonyo jugo tali, yang diiket-iket, dijadike jembatan
gantung, pasti begoyang. Idak ditiup angin bae begoyang, apolagi kalu ditiup
angin. Pacak bedendang jembatannyo.
Ceritonyotu … Waktu Olis, Yuli samo Ningsih sam-samo naik,
bejalan pucuk jembatan, tibo-tibo berem bus angin kencang. Begoyang kencang
jembatannyo. Tesandarla Olis, untung masih pacak nyekel tali. Kalu daktu
nyampak ke bawah. Mati idak, saro la nunggu …
Karno angin nambah kencang, Olis samo duwo konconyo nambah saro. . Sempat
tejengkang beberapo kali, sebelum akhirnyo teduduk, badan pecak nak melayang.
Mamat en Lebay becepet nulung, ngaman ke . Dilepaske dikit-dikit. Beguyur
bejalan dewek sambil bepegang di kanan dan kiri jembatan.
Sampe dak, Lur …?
-------------------
Telemes Galo
Oleh Wak Amin
Cerbung Musi Bebanyu (20)
SAMPE jugo akhirnyo. Ibarat kato wongtu, la babak belur
duken, baru menang …
Memangnyo, Olis, Yuli en Ningsih, mak itu jugo?
Kurang lebihla. Tepekik-pekik, enggerutuk samo spot jantung,
dan teritung lagi berapo kali. Yang pacak diitung cuman jumlah uwong yang
bejalan pucuk jembatan. Ado tujuh ikok. Duwo lanang di depan, tigo betino di
tengah, diburi duwo. Siapola? Mamat samo mamang kito, Lebay.
Jadi bodigad?
Kwwwk … kwwwwk …
Cak itula kiro-kiro. Kalu Ningsih misalnyo, tejulak ke
kanan, la ditunggu Mamat. Nahan supayo dakdo nyampak. Mak itu jugo Lebay.
Ngapo pulo Lebay?
Mesti begerak cepat. Kalu Olis en Yuli tibo-tibo tepundur ke buri, Lebay la siap nahannyo. Dak
jadi tejungkel.
Na, payahnyo kalu sampe mekik. Dak ado caro lain mulut mesti
ditutup supayo dak mekik lagi.
Caronyo?
Diomongke gancang. Umpamanyo … ‘aw, aduh tolooooong …’ langsungla
dijawab Mamat atau Lebay dengan omongan … “tenang bae .. ado ok om di sini ..’
berentila iu. Balik tenang …
Kalu ngulang lagi?
Mekiknyo? Mak itula. Langsung ngomong, dak boleh lambat.
Kalu lambat pasti ketakutan. Nah, kalu sampe ketakutan itu ngulang
terus-terusan, bahayo besak …
Ngapo?
Pacak retook sekampung. Iyo kalu masih deket. Kalu la di
tengah-tengah, separo jalan, makmano. Samo bae bo’ong. Ibaratnyotu, balik saro,
terus juga samo saronyo …
Nyari gawe niyak budakni …
Dak apola, Lur …
Lanang namonyo …
Dak usah jadi lanang kalu dak galak saro …
Tapi, sesaro-saro lanang, apolagi masih bujang, kalu jalan
samo betino, banyakla lemaknyo ketimbag saronyo.
Makmano itu?
Yo, awak jingokla dewek. Pertamo-tamo, dak banyak metuke
duit. Paling untuk ngudut bae. Yang lain? La ado galo. Dau usah bayar. La disiapke galo oleh betino
taditu, apo dak mantap.
Dahtu romantis. Sesangar-sangat cewek, kalu kito yang
lanangni bejalan samo dio, pasti romantis. Serbo indah. Seolah dunioni cuma ado
kito beduwo. Di rumah makan misalnyo, ado kawan ngomong, makan sesuap-suapan
dan uwong pasti enjingok kito. Makan tinggal milih, pas keluar ke mano bae laju
…
Lainnyo, pacak ngukur diri. Kalu memang kito lanang pastila
ngeraso kitola pelindung betino. Mak itu jugo dengan si betino. Dio ngarep kito
selalu berada di depan, siap ‘klepek-klepek’ demi menghindari dari raso dak
aman.
Mak itula, lebih dan kurangnyo yang dirasoke Yuli, Olis dan
Ningsih. Selain pacak main drama dan baco puisi dengan baik, beparakan dengan
Mamat en Lebay, ado perasaan nak manjo bae, tempat ngadu keluh kesah, dan
numpahke perasaan.
Ai sudahla …
La tau galo …
Ngomong dari jauh bae …
Dari deket takut …
Pas tengah ari. Perut memang lenak mintak diisi, Ningsih
ngajak makan duken. Karno panas di jeru ke mah, wong belimoni milih makan di
bawah pohon sawo. Idak panas, banyak penjingokan, dan rame.
Sambil makan pacak nyelik uwong tuwo mancing iwak di pucuk
jeramba, budak main ski dan berenang di danau, kejar-kejaran dan bepercikan
banyu.
Malek enjingok yang
taditu, belari-larian. Dahtu maraki tukang enjual mainan budak. Melok cak budak
pulo. Niup kelembungan …
Nak kepengen apolagi?
Sepatu roda …
Ado. Tinggal pilih bae. Nak nyewo apo bawak dewek. Kalu nak
nyewo, murah bae. Tinggal milih sepatu nyo. Nak yang kecik, sedang apo besak.
Tempat mainnyo agak ke dekat jalan besak. Di situ jalannyo bagus. Licin, la
bekeramik galo. Lemak kalu samo-samo main sepatu roda.
Dahtu?
Abis makan, numpang salat di musalla, lanjut ke acaro
enjelajah jalan terjal en becek pakek motor trail. Tepakso begantian karno
Olis, Yuli dan Ningsih lum berani bemotor dewekan.
Jadi pertamo-tamo, Mamat samo Olis, terus Lebay dengan Yuli.
Terakhir, Mamat samo Ningsih. Beduwo bae ngelilingi tebing terjal, jugo yang
ado banyunyo. Seru niyan pokoknyo …
Ngapo mak itu?
Ngapo dak seru, keno
becek galo. Badan tepercik lumpur, mak itu jugo baju samo celano. Yang idak
cuman rambut, karno pakek helem.
Idak sampe celako?
Alhamdulillah idak. Selamat galo-galo. Pegi bagus, balik
becek dak jadi apo. Yang penting serunyo itu.
Dak pacak dibeli, dak pacak jugo dicari disembarang tempat. Benar-benar
nikmat.
“Mandi duluuu …” Kato Ningsih ngajak dua konconyo mandi.
Nutul dari buri, Mamat en Lebay.
Nyelam, timbul lagi. Nyelam lagi, timbul lagi.
Sesiram-siraman banyu, belari-lari. Abistu berenang. Enjit-enjitan,
kejar-kejaran di tepi danau yang di sepanjangnyo banyak tetegak kios warung
enjual dogan sa mo jagung bakar.
Bauknyo?
Wooo … dak pacak ngomongkenyo. Sedeeeep niyan …
Beli tula baru tau …
Ha ha ha ha …
Pas sore. Telemes galo-galo. Tetiduk pucuk tikar. Yang
betino di jeru tenda. Lanangnyo di luar tenda. Nyeyak niyan.
--------------------------
Balikla Mak
Oleh Wak min
Cerbung Musi Bebanyu (21)
DI bawah garang …
“Kak … dimano emak, Kak?” Yuli terisak-isak. Olis yang duduk
di sebelahnyo jugo melok nangis. Beduwo bae betangisan.
Karno dak kuat gino nangisnyo, dak ketauan yang lewat depan
rumah kayu itu. Uwong cuman tau gadis duwoni bepelukan. Kangen, kato budak
jaman sekarang, ngelepaskenyo dengan peluk-pelukan.
“Kakak jugo dak tau Dik,” jawab sang kakak, ampir dakdo
tedenger suaronyo kepri lembut makkayo ager dibelah duwo.
Yuli numpahke tangisnyo di pangkuan Olis. Olis cuman biso
nimpoke palaknyo di palak adiknyo yang basah karno keringet.
“Kito cari bae, Kak yo,” kato Yuli dengan nado memelas penuh
harap sang kakak ngabulke permintaannyo.
“Nak nyari dimano, sedangke arini sedenget lagi gelap …”
“Dimano bae, kak. Yang penting emak kito dapet.”
“Kalu bak kito masih idup, dakke sengsaro makini kitoni.
Kito dak perlu lagi mikirke makmano nak nyari emak. Bakla yang nyarinyo .. kito
tinggal nunggu di rumah bae. Nunggu kabar …”
“Makmano kalu kito ngomong samo bak bae, Kak?”
“Husyyy … uwong lamatitu mano pacak diidupke lagi. Kitoyang
idupla yang nak neruske wong yang sudah matitu, kalu ado yang nak diteruske …”
“Kalu cak itu. Kito beduwo disinini nunggu apo yo, Kak.
Duduk bae sementaro emak kito dak tau ke mano. Apo lamati apo masih idup ….
Kito harus temuke emak, Kak, walau makmano keadaannyo.”
Olis ngusap banyumatonyo dan banyumatu adiknyo. Dio masih
ngarep emaknyo biso balik dewekan. Kan la apal jalan balik. Jadi dak saro niyan
nak nyarinyo …”
“Besok pagi bae kito nyarinyo yo …” Kato Olis sambil ngusap
rai Yuli yang masih terisak-isak nangis tapi dak bebanyumato lagi.
Yuli dakdo enjawab. Tapi dio nurut waktu Olis ngajak masuk
kamar. Dak bagus jugo budak gadis be
magrib-magrib di garang, apo kato bujang …
DI bawah pohon beringin …
Ningsih, emak Yuli dan Olis duduk besilo sambil
enggendong-gendong boneka. La sibu kali barangkalinyo boneka itu
dicium-ciumnyo. Malek nyium, ketawo tapi dewekan, dak berewang.
Dengat-dengat tegak, dengat-dengat duduk, dengat-dengat
bebaring. Mak itula gawenyo selamo sejam di bawah pohon lebet daunnyo ini.
Malek duduk dia bejalan muteri pohon. Melengagang katu, senyum-senyum dewek
sambil narik-narik rambut.
Ke mano dahtu?
Ke rumah kosong dak bepagar. Disnila dio duduk main boneka.
Wong yang enjingok keadaannyo pastila iba.
Sebab, Ningsih dulunyo belagak. Kembang dusun. Idup dak kekurangan. Anak
cuman duwo ikok, la gadis galo pulo …
Tapi, sejak lakinyo mati mendadak lum lamoni, dio syok.
Sempat sakit … Dio dak kuat, mangkonyo jadi dak waras mak ini.
Setiap ari dio di kamar bae. Idak makan idak pulo minum.
Ngomong dak galak lagi. Galak ketawo dewek. Yang disebut cuman namo laki, lain
idak. Anak nak makan, makanla dewek. Jarang mandi. Terakhir, dak mandi niyan.
Cuman dak sampe engganggu wong lain, tetanggo sebelah menyebelah, misalnyo.
“Mas, jingokla akuni …!” Kato Ningsih enjeleti rai boneka.
“Aku masih sayang samo kamu, Mas. Ngapo kau tega pegi dewekan, dak ngajak aku.
Padohal waktu kito nak kawin, kau yang ngajak aku kan …”
Nangis terisak-isak.
“Kalu mak ini … lemakla aku mati jugo, Mas. Buat apo idup
kalu dak berego. Idup dak ado retinyo, Mas kalu dak katik kau … Makan laju dak
lemak, minum apolagi. Tiduk dak nyenyak. Teringat samo kau bae, Mas ….”
Nak marah pecaknyo …
“Mas, jawab aku. Ngapo kau diem bae. Apo kau dak punyo mulut
sampe diem bae selamoni. Jawab, Mas!”
Dibantingkenyo boneka itu ke tanah. Dak apo-apo. Ningsih
mandangi denget itu boneka. Sudahtu diembeknyo lagi …
Marah nian caknyotu …
“Jawabla, Mas!”
Ningsih beteriak. Dikoyak-koyakkenyo boneka itu. Ancur galo-galo. Isi perut
boneka beramburan ke mano-mano.
“Aku benci kau, Mas.” Ningsih beteriak lagi. Tegak, matonyo
tajam mandangi siso-siso boneka yang la dak ado bentuknyo lagitu.
Hi hi hi hi ….
Ningsih ketawo ngakak. Untung dak sampe lamo igo.
Ngapo?
Yo, duwo-duwo anaknyo berasil nemukenyo.
“Emaaak!”
Duwo beradikni langsung meluk emaknyo sambil nangis.
“Jangan mak … Emak dak boleh mak ini. Yuli sayang samo emak
…”
“Olis juga, Mak. Balikla Mak …. Kalu mak dak katik, makmano
kami, Mak. Bak la dak katik lagi …!”
Ningsih dak kumat gino lagi.
Saat itula Yuli embawakke puisinyo dengan judul “Emakku
adalah Masa Depanku …”
Kito perhatike samo-samo puisinyo yo, Lur …
“Emakku …
kami beduwo lum kenak balik
kalu emak lum balik jugo …
buat apo kami di rumah
kalu emak kami kelayapan
entah di mano
buat apo kami senang-senang di rumah
kalu emak beari-ari jalan entah ke mano
emakku adalah harapanku
emakku adalah masa depanku
Masa depan kami beduwo
anak gadis yang bak sayangi
anak betino yang emak kasihi …
Emakku …
emakku adalah masa depanku
masa depan kami beduwo
anak gadis yang bak sayangi
nak betino yang emak kasihi …
Emakku …
balikla samo
kami
kito betigo
samo-samo
nunggu rumah
neruske cito-cito Bak
supayo bak pacak
senyum
pacak ketawo-ketawo …
enjingok kito
betigo
jadi wong beguno
…
------------------
Mak Jadi Balik
Oleh Wak Amin
Musi Bebanyu (22)
NINGSIH lum jugo beringgut. Dio masih tetap duduk dengan
tatapan mato kosong. Olis emberanike diri. Tegak, rai ngadep kea rah emaknyo, baco puisi jugo.
Judulnyo apo, Lur?
“Kiro-kiro … “Kami Sayang Emak.”
Hayya .. pasti bagus
… haaa
“Emakku
adalah belahan jiwaku
di
mano emak di situla aku
kadangtu
emak nangis
aku
jugo melok nangis
kadangtu
emak ketawo
aku melok pulo ketawo
aku
dak tau n gapo
yang
aku tau
aku
sayang emakku
aku cinta emakku
cinta
setulus atiku
cinta
dari seorang anak
kepada
emaknyo
lain
idak …
Emakku …
kami sayang niyan samo emak
kami cinto emak
kami rindu emak
balikla emak …
payu kito bersihke dapur
masak masakan yang lemak
kesukaan emak
kesukaan kami beduwo
anak gadismu emak …
Emakku … emak kami
sejak bak dak
ado lagi
emakla pelindung kami
emakla tempat
curhat kami
emakla tempat
kami beduwo bemain
ado emak kami
senang
dak ado emak kami dak tenang
ado emak kami
lego
dak ado emak kami beduwo
pecak wong lolo
…
Emakku … emak kami …
dak
katik lagi yang nak kuomongke
selain
ngarep niyan
pada
emak kami ini
jingokla
kami beduwoni
pandangi
kami emak
lupokela ebaktu …
jadila emak
sebagai bak
dan
kami beduwoni sebagai emak
supayo
lengkap rumahtu
ado bak ado emak
ado pulo anak yang cantik
memikat ati siapo bae
yang enjingoknyo …
Emak …
idupni dak lamo idak
cuman sebentar …
dahtu kito
bakal mati
tinggalke
dunioni
yang pegi yo pegi
yang tinggal yo tinggal
yang dibawak apo duhai emak
dak katik lain
amal yang baik
amal yang saleh
kalu emak banyak amal
emak balik pacak senang
tapi kalu emak dikit amal
emak balik pacak saro
mangkonyo emak …
kami
beduwoni amal saleh emak
tempat emak nanem benih
amal baik gektu dibawak mati
senangla
ati …
jangan ragu duhai emak
dak usah malu ati emak
setiap uwong pernah besalah
setiap wong pernah tesesat
setiap wong pernah nyesel
tapi jarang uwong yang tau
kalu setelah besalah dio
minta maaf …
setelah tesesat dio milih
jalan yang benar …
setelah nyesel dio ubah
jalan idupnyo …
na mak …
mumpuung
lum telambat
payula kito sepakat
saling curhat
saling
ingat mengingat
supayo idup biso selamat
sampe akhir hayat …
Ningsih la pacak senyum. Ketawo, dahtu nangis.
Subhanallah …
Tigo beranak bepelukan. Erat niyan …
---------------------------
Tidak ada komentar:
Posting Komentar