Goh-Gohda (1)

Novel ...

Goh-Gohda (1)
Oleh Wak Amin

1
"TUBAT Tuhanku. Alang bangikna na hurik nikuja Mang. Sanak kok radu kaunyin. Kobun buhiktar-hiktar, duit bubal-bal di bang," cakdu Mang Yahya di bah ijan. Ga lapah bugawe.

Bugawe apiya?

Asal bugawe kolpah. Mih bugawe bangunan, tolahnana.

"Alhamdulillah kolpah. Juksinada huriksa. Paija, kok diliyakda, lamba han nyiwo, bugawe asal bugawe, anak asak sikolah, mongan kadang mak bugulai. Ditahanko jugaya," jawabdu Mang Roland.

Ha ha ha ha ...

Mak uni sina liyuda Mang Latif. Lapah kukut kabiyansa. Ngaliyak Mang Roland rik Mang Yahya togak di bah ijan, singgahdaya ...

"Ahai. Kabonoran nihan kolpah," cawadu Mang Roland, ngorah mojong diijan pai, sangarobok.

"Wat lukak api yona Mang?"

"Wat, mih mak balakga."

"Jadida. Sai ponting wat sai dicakakko. Bonor mak cakmu Mang Yahya?"

"Sina sai kucawako rik Mang Rolandja. Dang ngaliyak balak rik ronikna. Liyakda kolpahsa. Pacak ngudut jadida," cak Mang Yahya.

Ha ha ha ha ....

Tring ... Ting ... Ting ...

"Nginum pai kolpah yo. Kok radu diguwai. Amun mak diinum, kali watan oi iyu," cak Bik Roland. Ngu sung tipsi. Dunggak tipsi wat tolu golas wai kopi rik punti ting guring.

Ha ha ha ha ....

Maha Mang Yahya. "Bibikja pacak nihan mun nyakja makkung ngopi pagisa."

"Payu mun juksina. Kita cakak pai ganta," ajakdu Mang Roland.

Mojong di garang sambil nginum kopi, eheeem ... dang cawako. Bangik. Apilagi wat sai diudut. Ruku'.

Treeeesh ...

Ruku' dijuk apui, dihisap cutik. Issszt ... Luwahda jak banguk rik hirung hasok handak.

"Juksija kolpah-kolpahku." Mang Roland mula'i bucarita. "Nyakja haga angguwai lambahan. Jadi kilutulung kuti ruwajada. Juksipa kira-kira?"

"Gampang yona Mang," jawabdu Mang Yahya.

"Idanya?" Tanyadu Mang Latif. Tukang bingkil karito rik motor.

"Saminggu lagida."

"Uniga yona Mang Roland. Amun cakku johpagida. Juksipa Mang Yahya?"

"Holau yona. Mihya kita dongipai api cakdu Mang Roland. Kita ruwa ja, siap sadia," cak Mang Yahya.

"Sangarobok pai yo."

Pamit kuruk lom lambahan. Mang Roland cawa rik anggomanna. Mak uniga. Mih samonit lobih tolunga dotik. Radu sina luwah lagi sambil nyurilanko sisu bukatiyak jak ijan.

"Cocok dayona," torangdu Mang Roland. Nginum wai kopi cutik rik nganik kabolah punti tingguring.

"Kuti wat gawe mak pagisa?"

"Wat sabonorna. Mih mak munih ga," jawabdu Mang Yahya. "Gawe anho pacak kilutulung jolma barih da. Mih nyomin parit."

"Niku Mang Latif?"

"Goh-gohda. Wat sai anggantiko nyak. Mun mak ongka, ditutup ju gaya bingkilna. Mak api-api. Sai ponting, duit cakak."

Ha ha ha ha ...

"Pabolak'i yo wai kopi rik puntina." Cakdu Bik Roland. Rogoh jak ijan, ga lapah ti warung amboli iwak nipis rik kangkung.

"Payu bibikku. Hati-hatiyo. Dang nihan tisorup," guraudu Mang Yah ya, ngamatiko udutan, dikurukko lom asbak.

" Pirada upah kuti ruwana kira-kira?" Tanyadu Mang Roland. Mak bangik mun mak ditanya pai. Mariya sona ng kaunyin. Tukang sonang, sai dok du lambahan sonang hoda.

"Basingda Mang. Sipa sai mak am biyakko mamangda. Sinada sai holau, mun cakku ..."

Ha ha ha ha ....

"Dang juksina kolpah. Mak bangik nyakja. Kuti kan wat anak rik ang goman. Porlu ruku', kopi, rik sai ba rihda. Kaunyinnana kan porlu duit. Bonor mak cakkuna kolpah?"

"Mun nyakya." Nyahut Mang Latif. "Terserah Mang Roland. Balak ditari ma. Ronik katarima."

Hua ha ha ha ...

Makkung putuk rasansa. Mang Ro land kilu nihan rik Mang Yahya, Mang Latif, bubonor anguwaiko lambahan nonti.

"Hortinana .... Makin gancang ma kin holau." Mang Roland ngingokko. Dang lupa. " Cindo rik mantiring."

Ha ha ha ha ....

"Insya Allah Mang," jawabdu Mang Yahya. "Duako jugaya sikam ruwaja sihat."

"Sikam hoda. Kilu liyak-liyakko, api sai kurang holau, cawako. Mumpung sai digaweko makkung losai," harop Mang Latif.

"Gampang yona Mang Latif. Caradu kolpahda. Payu nginum muloh."

Triiiing ... Tiiing ...

Triiing ... Tiiiing


Tobe continued