Novel …
Entok (11)
Oleh Wak Amin
21
WAK Lung mintak waktu samo Wak Pet, Wak Agus en Wak Yeng,
nak nyari duken celano dalem punyo penunggu danautu. Tapi dio bingung nak nyari
kemano. Soalnyo, dak kenado salah lepak.
Pusing tujuh keliling, Wak Lung ngembek rokok sebatang dari
kantong celanonyo. Dio enjuk api, dahtu diisep. Alangke sedepnyo. Diisep samo
banyu kopi item manis.
Kiro-kiro jam setengah tujuh, Cek Lung metu dari dapur,
embawak pakaian yang nak dijemurke di depan rumah. Dio la tau lakinyo kepeningan
nyari celano dalem. Dio sengajo singitke. Dio dakken galak ngenjukkenyo.
“Ibuk, apo dak
kesiyan nyingok Abah cak wong lolotu,” kato Sri Wedari, nulung ibuknyo enjemur
pakaian.
“Idakla. Biar jero dio,” uji Cek Lung, senyum lagi idak.
“Iyo Buk. Tapi Abah tetepla Abah. Kalu ado apo-apo kito
beduwo pasti temelok jugola,” kato Sri, ngeluruske tiang jemuran yang sempat
miring ke kiri.
“Sriii .. Sriii …!”
“Tuna, Abah kau manggil,” Cek Lung ngenjuk tau. “Cepetla
datangi …”
“Kalu Abah nanyo celano dalem, makmanola Buk kiro-kiro?”
“Omongke bae dak tau.”
“Kalu Abah makso makmanola Buk?”
“Panggil Ibuk …”
Sri sebenarnyo maju-mundur nak nemui Abahnyo. Bukan karno
takut. Tapi nanyonyo pasti dak katik
lain soal celano dalemtula.
“Bener kan?” Sri ngomong dewekan.
“Apo Ri?” Wak Lung nanyo celano dalem. Dijawab Sri dengan
ecak-ecak dak tau sambil ngomong dewekan.
“Idak Bah.”
“Tadi Abah denger kau ngomong dewekan …”
“”Idak Bah. Abah salah denger kali. Buat apo Sri ngomong
dewekan. Kan ado Abah. Lain kato kalu Abah dak katik. “
“Yo sudah kalu mak itu. “ Wak Lung ngematike rokoknyo.
“Tulung niyan Sri, kalu bae awa teselik. Enjuk tau Abah.”
“Bah.”
“Awak tau?”
“Bukan Bah. Ngapo Abah dak nanyo langsung samo Ibuk. Mano
tau Ibuk tau …”
Wak Lung tediem.
Sri Wedari nambah kesiyan nyingok Abahnyo. Dienjuk tau gek
Ibuknyo marah. Idak dienjuk tau, yo kesiyanla. Abah dewek, bukan wong lain.”
“Bah.”
“Tulung carike ye celano dalemtu.”
“Galak aku nyarinyo Bah. Tapi ado syaratnyo …”
“La besyarat pulo.” Nambah pening pulo Wak Lung. Celano
dalem lum dapet, nak mintak syarat pulo. Tapi dak katik caro lain. Tepakso
dituruti. Kalu bae yang dicari dapet. Syarat yang diminta Sri idak berat igo.
“Makmano Bah?”
“Abah setuju bae. Asalke syaratnyo dak pulo berat igo …”
“Idak Bah,” kato Sri, duduk besilo ngadepke rainyo ke Wak
Lung. Beadep-adepan.
“Syaratnyo Abah enjuk tau samo Sri, untuk apo celano
dalemtu, punyo siapo, mak itu pentingnyo sampe Abah kepeningan nak nyarinyo.”
“Abah takut gek Ibuk kau …”
“Dak apo-apo Bah. Enjuk tau bae samo aku. Dijamin Bah,
selesai Abah becerio celano dalemtu
pasti ketemu.”
“Awak singitke apo?”
“Idakla Bah. Buat apo aku nyingitkenyo. Celano dalem Sri
banyak. Yang le nak buruk ado, yang baru dibeli kemarin ado. Betumpuk.”
Wak Lung diem.
“Bah.”
“Payu kalu mak itu.
Jangan kau enjuk tau ceritoni sambo Ibuk kau. Mati Abah digebukinyo.”
“Beres Bah. Beceritola
…”
Cek Lung yang baru nak masuk jeru rumah dari enjemur
pakaian, melok nguping. Dio ngintip dari balik lawang. Wak Lung becerito samo
Sri sambil nunjuk-nunjuk, cak nak ngongkon uwong beli udutan, ketawo samo takut
…
22
WAKTU Wak Lung pegi ke warung, Cek Lung ngongkon anaknyo Sri
masuk jeru kamar. Sri tekejut jugo. Dio takut emaknyo gelep mato. Enggebuk dio
karno dipanggil Abahnyo tadi.
Dio baru ngeraso lego waktu Ibuknyo senyum. Idak cak taditu,
pecak nak marah bae. Dikongkonnyo duduk pucuk kursi.
“Ibuk nak nanyo samo kau …” Cek Lung ngintip denget dari
balik lawang sebelum ditutup rapat.
“Tanyola Buk. Mano yang biso Sri jawab, yo jawab. Kalu idak,
yo dak usah aku jawab.” Kato Sri Wedari sambil embetulke letak enderoknyo.
“Apo yang diceritoke Abah kau taditu?”
Sri tibo-tibo ketawo ngakak.
“Sri … Sri …” Cek Lung tepakso nepak paho Sri supayo dak
keterusan ketawonyo.
“Maafke Sri Buk,” kato Sri, sempat kesakitan ditepuk
pahonyo. Kuat jugo soalnyo. Sampe bebunyi … Pak .. pak .. pak. Tigo kali.
“Ado yang lucu apo?” Cek Lung enjelitke matonyo pecak nak
makan uwong.
“Lucula Buk.”
“Aponyo?” Cek Lung
nambah penasaran. Kalu taditu paho, sekarang pipi anaknyo yang dio cubit sampe
teabang.
“Ceritonyotu Buk ye .. Abah becerito. Kalu dio keilangan
celano dalem. Mak itu bae.”
Haaaa …?
Cek Lung tekejut dikit.
“Terus .. Terus …”
“Dio mintak tulung carike.”
Haaaa …?”
“Apo jawab awak?” Cek Lung mulak’I nak marah. Jangan-jangan anaknyoni la ngenjuk
tau dimano celano dalemtu disingitke.
“Ujiku Buk. Sri galak nyarikenyo, asalke pakek syarat.”
“Syarat?” Cek Lung la agak tenang, tapi lum lego.
“Abah enjuk tau punyo siapo celano dalemtu, buat apo sampe
dicari-cari …”
“Apo jawab Abah kau?”
“Mulonyo diem Buk,” uji Sri telesu.
“Mak itula Abah kautu. Kapan dio ngeraso besalah, diem. Cak
uwong alim sabak. Pagi alim, malemnyo ngerebak. Ibuk curiga Sri. Jangan-jangan
…”
“Curiga ngapo Buk?”
“Jangan-jangan Abah kautu selingkuh …”
Sri tekejut.
“Dakken ado Buk. Jangan sembarangan nudu uwong lain, apolagi
laki dewek.”
“Buktinyo, celano dalemtu. Itu kan la jelas-jelas punyo
betino. Ngapo sampe disingit-singitke. Bini bae dak dienjuk tau. Pasti ado
apo-aponyo, ye dak?”
Sri Wedari males embahasnyo.
“Ngapo diem? Apo jangan-jangan awak jugo sekongkol dengan
Abah kautu.”
“AStaghfirullah Buk. Nyebut Buk. Sri kan sayang Ibuk.
Madak’I sih Sri tega sekongkol. Kalu iyo, sekongkol soal apo Buk?”
“Celano dalemtu.”
Ha ha ha ha …
“Ngapo ketawo?”
“Mak ini Buk cerito yang sebenarnyo. Galak ka Ibuk
endengerkenyo?”
Mulonyo dak galak. Biasola uwong tuwo. Dak boleh tesingging
dikit, merajukla seabisan.
“Please Buk, supayo jelas.”
“Kan la jelas. Abah kautu selingkuh. Titik. Bukan koma.”
“Buk. Idakdo cak itu.” Sri meluk Ibuknyo supayo tetap
tenang. Digosok-gosoknyo punggungnyo. Dibelainyo rambut yang sikok duwo la
ditegak’I uban, dahtu diciumnyo.
Agak dingin. La mulak’I turun tensinyo.
“Mak ini Buk ceritonyotu. Waktu Abah samo Wak Pet, Wak Agus
en Wak Yeng mancing berempat di danau. Ampir seharian mancing, iwak dak jugo
dapet. Malah yang dapat celano dalem yang nyangkut di pancingnyo Abah …”
“Bener cak itu?”
“Bener Buk. Karno takut keno marah dak boleh iwak, cumin
celano dalem. Wa berempat ini kompak dak ngenjuk tau uwong rumah. . Diemke bae.
Tahanke bae kalu dimarahi karno dak boleh iwak.”
“Pasti ado apo-aponyo?”
“Jadi disingitkela celano dalemtu. Malemnyo mimpi didatangi
betino penunggu danautu. Marah samo Abah. Kalu dak dibalikke saro …”
Cek Lung mulak’I pecayo.
“Jadi dibalikkela ceritonyo Buk. Si betinotu datang lagi.
Nagih lagi. Dak katik katonyo. Ruponyo ado yang ngembeknyo …”
23
LA tau cerito sebenarnyo dari Cek Lung, Cek Agus, Cek Yeng samo Cek Pet
kompak, celano dalemtu dienjukke lagi samo Wak Lung. Wak Lung yang baru balik
dari warung tekejut waktu dipanggil bininyo.
“Pasti keno marah,” ujinyo di jeru ati. Sudah narokke selop
pucuk tempat selop, dio baru masuk sambil bejalan separo embungkuk.
“Bah …”
Wak Lung noleh. Dijingoknyo Sri samo Cek Lung tegak sambil
senyum di burinyo.
“Ini kan Bah yang nak dicaritu?” Cek Lung nyelikke celano
dalem.
Wak Lung dak kewawo nak ngomong lagi.
“Naaa … Embekla.” Cek Lung ngenjukke celano dalemtu. Wak
Lung bukan dak galak. Dio cuman masih dak cayo kalu bininyo la berubah seratus
derajat.
“Embela Bah …” Sri becepet ngembekke celano dalem dari
tangan Ibuknyo. Takutnyo gek, kalu dak cepet, Cek Lung berubah pikiran. Sarola
kito sekampung.
“Terimo kasih anak Abah,” uji Wak Lung terharu. Pecak nak
metuke banyu mato.
“Dengan aku Bah, dak beterimo kasih apo?” Cek Lung
tesinggung. Untung bae Sri anaknyo begancang ngatasinyo dengan ngatoke .. Ibuk
jugola.”
“Iyo Buk. Aku jugo ngucapke terimo kasih. Kalu bangso dak
ketemu ini celano dalem, dak pacak Abah ngomongkenyo,” kato Wak Lung.
Abis makan siang, Wak Lung ke rumahnyo Wak Yeng. Dahtu nemui
Wak Agus. Terakhir ketemuan di rumahnyo Wak Pet.
Wak berempatni sepakat nak embalikke celano dalemtu. Supayo
cepet sampe ke danau, bebecak. Yang ngayuhnyo Wak Yeng. Ngebut niyan. Pecak nak
terbang.
Diburinyo nutul pulo Cek Lung, Cek Agus, Cek Pet en Cek
Yeng. Cek berempatni numpang bajaj. Idak ngebut idak. Tapi jadila. Tekejer jugo
becaknyo Wak Pet.
Jarak antaro bajaj dengan becak Wak Pet kiro-kiro sepuluh
meterla. Supayo dak ketauan, mesin bajaj dimatike, didorong belimo. Tedorongla.
Dak pulo berat igo. Lain cerito kalu endorong mobil derek.
“Mamang bajaj tinggal sini bae. Biar kami berempat bae yo ke
sano,” uji Cek Lung, nunjuk ke arah danau.
“Iyo Mang. Kalu pegi galo, bajaj mamang makmano. Pacak
ilang. Ye dak,” simbat Cek Agus, diiyoke Cek Yeng samo Cek Pet.
“Payula kalu mak itu,” kato Mang bajaj. “Tapi kalu ado
apo-apo temui aku di jeru bajaj. Mamang mungkin tiduk denget. Makmano?”
“Oke Mang.” Berempat serempak ngacungke jari jempol sambil
ketawo idak ngakak.
Sementaro Wak kito berempat taditu sudah turun ke danau.
Samo-samo nyelem. Entah makmano, mudah niyan ngelepakke celano dalemtu di selo
batu.
Dak sampe semenit sudah oke. Berempat metu lagi dari jeru
banyu.
Byuuur …
“Alhamdulillah,” uji Wak Lung, lego niyan rasonyo. Mak itu
jugo Wak Agus, Wak Pet samo Wak Yeng.
“Aman kayaknyo,” kato Wak Pet. Nyelem lagi, dahtu metu lagi.
Sampe tigo kali. Dimelok’I Wak Agus, Wak Yeng en Wak Lung.
Makmano dengan Bicek kito berempatni?
Ngucap alhamdulillah jugo. Yang jelas, dak melok pening lagi
mikirke celano dalemtu. La dibalikke ke tempat yang dimintak penunggu danautu.
“Cuman … “Cek Yeng sengajo dak ngelanjutke omongannyo.
“Cuman apo Cek?” Cek Agus betanyo sambil nyengir kudo.
“Apo perlu laki kitoni dikongkon mincing lagi?”
Dak katik yang enjawab.
“Tempat lain baela kuraso Cek Yeng,” saran Cek Pet. “Biarla tempat ini jadi
kenangan buat anak beranak kito bae …”
“Tempat lain kan masih banyak. Aku setuju. Kito jangan
jerola. Teruske mancingnyo. Tapi di tempat lain,” terang Wak Agus.
“Yang penting, malemni kito jangan sampe lupo,” simbat Wak
Yeng.
“Lupo ngapotu Wak Yeng?” Tanyo Wak Pet, antaro ketawo dak
ketawo.
“Takbiran di masjid …”
“Masya Allah. Hampir lupo,” uji Wak Pet, Wak Agus samo Wak
Lung.
TAMAT …
Tidak ada komentar:
Posting Komentar