Entok (4)

Novel ...

Entok (4)
Oleh Wak amin

7
SEDANGKE Wak Agus masih tarawihan di masjid. Bininyo dak sempat marah. Karno baru nak marah, laki la pegi. Keperi cepatnyo pegi, lupo pakek sandal. Jadi tarawihan besikil ayam.

Kiro-kiro jam sembilan, uwong tarawihan balik. Wak kitoni melok ketawo-ketawo waktu konconyo yang lain ketawo. Cuman dio eran, Wak Yeng, Wak Lung samo Wak Pet dak kejingokan batang idungnyo malemni.

"Kemanola ye?" Wak Agus betanyo dewek. Pengen niyan nak ke rumah wak tigotu, tapi takut kemaleman. Sebab, yang namonyo sanjo ke rumah konco deket, dak pacak denget.

"Hei Wak!" Tegur bapak bekopiyah resam. Dio eran nyelik Wak Agus ngomong dewek sambil senyum-senyum.

Untung bae, kato si bapak jeru atinyo, aku tau kalu itu Wak Agus. Cubo kalu idak, apo kato uwong yang baru kalitula nyelik Wak Agus. Pasti diomongke gilo tula.

"Akutu lupo jalan balik Pak Dung," kato Wak Agus, enggaut-enggaut palaknyo. Nyari-nyari alasan bae.

"Ai dakken ado lupo jalan balik Wak Agus. Itu rumahnyo. Kejingokan dari sini," kato Pak Dung, nunjuk ke sebelah kanan.

"Madak'i ... Ecak-ecak eran. Ngucek-ngucek mato pecak uwong dak jelas ngeliyat.

"Apo nak mintak rewangi Wak Agus?"

"Dak usahla Pak Dung. Terimo kasih. Biarla .. Aku pacak balik dewek," uji Wak Agus becepet jalan ke kanan.

Di muko lawang, Cek Agus la nunggu sambil nyekel sapu. Sedangke anaknyo la tiduk. Namonyo budak, lesu puaso, sudah bebuko, nak masuk waktu isya', la tedede. Tetiduk.

Tok ... Tok ... Tok ...

"Assalamualaikum ..."

"Waalaikum salam ..." Simbat bini Wak Agus. Dio ngongkon lakinyo bukak dewek lawang.

Nyeeeet ....

"Malem hani ..."Uji Wak Agus. La tau bakal keno marah, mangkonyo dio ngerayu sampe abis.

" Malem," jawab si bini dengan rai masem.

"Kito maem beduwo yuk," rayu Wak Agus. La lamo niyan dak maem beduwo. Kalu bae pas puasoni ado berkahnyo. Rejekinyo nambah banyak.

"Lajula dewek. Aku sudah makan," kato si bini sambil embuang rai ke kanan, ke kiri. Wak Agus nyelik rai bininyo ke kanan, dibuang ke kiri. Mak itula sampe Wak Agus malek.
dewek.

Karno dak galak, pegila dewek Agus ke dapur. Perutnyo la dak tahan nak mintak diisi.  Jadi, walau dak direwangi, dak jadi apo. Yang penting biso makan.

Bukak tutup makanan ..

Haaaa?

Katik apo-apo. Cuman ado kertas bae tetulis pucuk meja makan. Bunyinyo kiro-kiro mak ini ...

"Makanan abis. Kalu laper beli dewek di warung .."

"Ibuuuuk ..."

"Ibuuuk ..."

"Ibuuuk ..."

Belari ke depan. Bininyo la dak katik lagi. Di pucuk meja kursi tamu ado selembar kertas.

Diembek Wak Agus. Ado tulisan dikit. Dibaconyo jeru ati.

"Dak usah dicari ... Aku lagi mancing."

8
"BAH, ngapola abah dak boleh iwak ariniyo. Biasonyo, kapan abis mancing pasti dapet tula. Idak banyak. Sikok. Idak besak, yo kecik. Atau abahni bo'ong sama aku
Ecak-ecak bae mancing, taunyo ngerayu jando mudo," kato Cek Yeng, bininyo yang lagi engguling-guling pucuk kasur. Entah ngapo, payah niyan tiduk malemni.
Padohal sudah jam sepuluh malem.

"Astaghfirullah Buk. Ati-ati kalu ngomongtu ... ," uji Wak Yeng, tekejut. Duduk denget, dahtu engguling lagi.

"Ibuktu cuman nanyo bae. Sebab, lanang mak ini ari la lihai galo," kato Cek Yeng. Malek engguling, duduk nyandarke badannyo ke kayu pinggir kasur.

"La lihai galo makmanotu Buk. Jangan galak nuduh yang idak-idak."

"Abahnyo mak itula kalu diomongi. Selalu dak cayo. Cubo abahtu sekali-kali nonton tivila. Film, sinetron atau apo baela. Pasti abah tekejut ..."

"Tekejut ngapo Buk?"

"Yang selingkuh mak ini ari banyak lanang."

"Ibuk bo'ong pasti. Ye kan?"

"Bener Bah. Na, mangkonyo Bah. Ibuktu tadi betanyo ngapo abah dak dapet iwak waktu mancing."

Ha ha ha ha ..

"Sudah ngomongnyo?"

"Sementaroni itu duken," uji Cek Yeng. Marakke mulutnyo deket pipi kiri lakinyo. Walau dak mudo lagi, pipi itu masih bae tembem cak dulu.

"Jadi, soal dak boleh iwak taditu memang dak boleh niyan.. Entah makmano ceritonyo, apo karno iwak melok puaso jugo cak kito- kitoni. Dak galak makan umpan. Aku, Wak Agus, Wak Lung samo Wak Pet bae eran. Ngapo biso mak itu ..," terang Wak Yeng.

Dio dak berani nyelik rai bininyo. Semenjak di pucuk kasur dak kalo senyum. Jauh nak ketawo. Apolagi ngelucu.

"Umpan ado kan Bah?"

"Ado ..."

"Abis apo makmap,?"

"Abis ..."

"Na abahnyo. Kalu umpannyo abis pasti dimakan iwak kan. Dak mungkinla nyampak apo picul dari mato pancing."

"Iyo jugo Buk yeee. Bener kato ibuktu .."

"Retinyotu abah embohongi aku."

"Bukan mak itu Buk."

"Jadi makmano?"

"Umpan memang abis. Tapi abah kan dak pulo tau kalu itu diembat iwak. Buktinyo, tali pancing dak begerak-gerak. Biaso bae. Waktu diangkat dak katik lagi umpannyo ..."

"Dakken ado abahnyo .."

"Na, itula ibukni. Diomongi dak cayo. Idak diomongi nak marah bae ..."

"Wajar aku dak cayo Bah. Setau aku, walau dak kalo mancing, umpan abis kalu dimakan iwak. Dak adola ceritonyo .. Umpan abis dewek kecuali ..."

"Kecuali apo Buk?"

"Sungai kecik tempat abah mancingtu ado penunggunyo.'

Haaaa?

" Diem-diem dio enggasak umpan abah. Takutnyo Bah ye ..." Cek Yeng batuk-batuk kecik. Pengen minum, tapi nak metu dari kamar males.

"Takutnyo abah diganggunyo. Mak itu kan Buk?"

"Bukan bae engganggu. Abah samo konco abahtu digasaknyo jugo sampe abis kayak umpantuna."

Ha ha ha ha ...

"Sebab, namonyo jugo sungai Bah. Tempatnyo bae jauh. Sepi pulo. Antu paling galak negak rumah di situ. Beranak pinak sampe banyak. Kito bae yang dak tau. Kalu tau pasti abah cari tempat mancing yang lain. Cayo dak Bah?'

" Cayo. Cayola Buk."

Tobe continued