Entok (7)

Novel ...

Entok (7)
Oleh Wak Amin



13
BESOKNYO, Wak Lung nemui Wak Yeng. Dak katik pulo, kato bininyo. Tadinyo ado. Duduk-duduk di teras sambil embaco koran bekas.

"Kadang ngomong kalu nak pegi. Kadang jugo dak sempet," uji Cek Yeng sambil enjemur pakaian di samping rumah.

"Sudah kalu mak itu Cek. Aku permisi duken," kato Wak Lung. Bejalan sikil bulan puaso, apo dak rengko. Mano laper, buntu pulo.

"Cubo Wak Lung ke rumahnyo Wak Pet bae. Mano tau ado disano," pesan Cek Yeng. Kesiyan enjingok Wak Lung pecak uwong kebingungan.

"Payu Cek kalu mak itu. Terimo kasih."

Di tengah jalan, Wak Lung ketemu Wak Agus. Jadi samo-samola ke rumah Wak Pet. Sampe di rumah Wak Pet, disambut bininyo yang lagi enjemur kopi.

"Baru bae berangkat Wak," uji bini Wak Pet, ngeluruske tikar tempat enjemur kopi.

"Pakek becak dak Cek?"

"Idak rasonyo. Becaknyo ado ..."

"Kemanola Cek peginyo?"

"Na dak tau pulo Wak. Cuman dio taditu pegi samo Wak Yeng," kato Cek Pet, niup-niup arang nak enggosok pakaian.

Wak Agus samo Wak Lung berunding denget. Uwong duwoni mutuske nyari Wak Yeng samo Wak Pet pakek becak. Untung bae, Cek Pet dak keberatan minjemke becak.

Kemanola nyarinyo?

"Makmanola kalu kito langsung bae ke danau tempat kito mancing kemarintu?" Saran Wak Agus.

"Ngapoi?"

" Yo ... Uwong duwo tula. Mano tau ado disano," uji Wak Agus. "Emba likke celano dalem."

Wak Lung tediem.

"Wak Lung."

"Celano dalem."

"Gancangla naek. Aku yang ngayuh becak. Awak tenang baela."

Kloneeng ...

Triiiing ..

Ruponyo benerla feeling Wak Agus. Wak Yeng samo Wak Pet memang nak ke danau. Tujuannyo sikok: embalikke celano dalem.

Wak Yeng dak tahan didatangi betino penunggu danautu. Memang dakdo diapo-apoke dak. Cuman penampakannyotu yang bikin ngeri. Ngomong bae dak biso.

Masalahnyo sekarang, dimano nak ngelepakke celano dalemni. Sebab, si betinotu idak pulo ngenjuk tau nak dilepakke dimano celano dalem kesayangannyoni.

Kloneeeng ...

Triiing ...

"Oi Wak Yeng .. Wak Pet." Pekik Wak Lung sambil ngambur dari jeru becak. Becak sempat nungging, tapi dak tebalik dak. Wak Agus enggiling-gilingke palaknyo bae.

"Wak Lung?!"

"Iyo. Inilah Wak Lung. Aku sengajo nyari kau Wak Yeng." Wak Yeng dak pulo tekejut lagi endengernyo. Dio sudah tau. Pasti soal sempak.

"Tul dak?"

"Wak Yeng tau ...?"

"Karno aku semalemtu didatangi lagi oleh betinotu. Awak jugo kan?"

"Iyo Wak..."

"Na ... Mangkonyo aku nak embalikke celano dalemni," uji Wak Yeng embukak kertas koran bungkus celano dalem.

"Sudah kucuci. Kuenjuk pewangi dan kugosok pulo. Pokoknyo, siiplah. Si betinotu pasti galak nerimonyo lagi."

"Mudah- mudahan bae," uji Wak Pet samo Wak Agus.

"Cuman kitoni," kato Wak Pet, "Lum tau nak dilepakke dimano?"

Empat Wakni tibo-tibo diem. Dak seomongan. Bepikir masing-masing. Nemuke solusi apo yang bagus diembek.

"Kalu aku," uji Wak Agus, " Dibalikke bae di tempat Wak Lung endapetkenyo ..."

"Setuju. Aku jugo cak itu," simbat Wak Lung.

"Wak Pet?" Wak Yeng beharap ado solusi lain. Nyatonyo dak katik. Wak Pet punyo solusi yang samo dengan Wak Lung en Wak Agus.

"Payu kalu mak itu ..." Celano dalemtu diserahke Wak Yeng samo Wak Lung. Karno diola yang endapetke celano dalemtu.

Pertamo-tamo nyari tempat celano dalemtu dapat. Sudah tau, nyelemla Wak Lung. Dewekan bae.

Seleman pertamo lum pacak ngelepakkenyo. Seleman keduwo baru pacak, tapi celano dalem taditu metu lagi dari jeru banyu.

Mak itu jugo seleman ketiga dan keempat. Akhirnyo sepakat, nyelem galo-galo.

14
SATU ... Duwo ..Tiiigo.

Buncitan nyelem adalah Wak Pet. Karno diolah yang ngomendani penyelemanni. Lamo jugo nyelemnyo. Lebih dari semenit. Tapi hasilnyo ..

Cek ... Cek ... Cek ...

Ngapo?

"Gagal lagi," kato Wak Agus, kecewa berat. Brutu'an.

"Kito cari batu dulula," lanjut Wak Agus. Becepet naik dari jeru banyu. Samo Wak Yeng, Wak kito yang awet mudoni nyari batu. Dak jauh dak. Masih di sekitaran danau nila.

Dapet dak?

Dapet. Tapi besak sebesak empat ikok palak uwong tuwo. Nak ngangkatnyo beduwo, dak mungkinla karno berat niyan.

Bukan sembarang batu. Batu gunung. Keras, padet. Mirip dengan batu koral.

"Wak Lung ...Wak Pet," pekik Wak Yeng.

Wak Lung samo Wak Pet lum noleh, apolagi nyimbat. Bukan dak galak. Tapi itu tadi. Peki'an Wak Yeng idak kedengeran. Tesapu oleh tiupan angin kenceng dan suwaro cicit burung.

"Wak Lung ...Wak Pet." Gantian Wak Agus yang mekik.

Lum jugo ado sautan.

"Wak Lung ... Wak Pet."

Baru ado reaksi.

Wak Lung samo Wak Pet serempak noleh. Ngeraso dipeki'i, keduwonyo langsung endeket. Eran nyelik batu besak tecuguk depan mato.

"Kito angkat berempat," kato Wak Yeng. "Kalu aku samo Wak Agus dak biso. Berat niyan batunyo .."

"Madak'i," komentar Wak Lung, antaro cayo dak cayo.

"Cubola angkat dewek."

"Cubo duken kuterai."

Huuuup ...

Hiyaaat ...

Sampek teabang rainyo Wak Lung. Batu lum jugo tegerak.

Ha ha ha ha ...

"Berat apo enteng Wak Lung?" Wak Yeng betanyo sambil penesan bae.

"Jadila beratnyo," uji Wak Lung. "Bangso ado banyu dikit bae, lemak niyan dikanyutke bae ..."

Duduk denget ...

"Siaaaap?" Wak Pet ngebos.

"Siaaap ...bek."

"Satu ... Duwo ... Tiiii go."

Batu terangkat jugo akhirnyo. Tapi dak pacak jauh igo embawaknyo. Mesti berenti-renti. Kalu daktu terengkola kito ..."

"Siaaaap?"

"Siaaaaap... bek."

Limo kali berenti, batu taditu baru nyampek tepi danau. Masalahnyo sekarang, makmano embawak batuni supayo pacak ke tengah dikitla.

"Dipinggirni jadila kalu Wak Pet," kato Wak Yeng, menges-menges.

"Teserah kamukla. Aku nurut bae. Mano baiknyola."

Diputuske, batu dibawak ke tempat celano dalem ditemuke. Jadi mesti lewat banyu. Dak tau pulo, apo samo beratnyo embawak batu di jeru banyu.

"Kalu bae samo," uji Wak Agus, cak keiyoan niyan.

"Kito tenggelemke disitu." Wak Yeng asal nunjuk bae. Nunjuk parak pohon besak.

Hiiiip ...

"Empat ... Tigo ... Duwo ... Saaa tu." Pekik Wak Pet. Parau suwaronyo. Dak lemak kito yang endengernyo.

Jeguuuum ...

Byuuur ...

Batu dak terangkat. Langsung tenggelem. Diputuske disinila tempatnyo. Berempat nyelem lagi. Wak Lung embawak celano dalemnyo.

Bleeeep ...

Bleeeep ...

Bleeeep ...

Semenit nyelem, Wak-wak kitoni baru pacak ketawo.

Ngapo cak itu?

Celano dalem taditu la pacak diselipke jeru batu.

"Kuat caknyo. Payu kito naik. Akula kedinginan. Lapar pulo," kato Wak Yeng enggigil kedinginan.

"Jangan balik duken," pesan Wak Agus. "Kito nak bagi takjil."

"Takjil apo Wak Agus?" Wak Pet nanyo sambil bekedip.

" Bukan takjil," simbat Wak Yeng, "Tapi bagi-bagi enggigilnyo ...."

Ha ha ha ha ...

Tobe continued