Mang Kerio (3)

Mang Kerio (3)
Oleh Wak Amin






SINGKAT cerito ...

Mang Kerio mula'i beraksi. Kalu tadu pake' jas samo dasi. Kali ini make' kopiah item, baju koko dan sewet kotak-kotak beselop jepit.

Dewekan?

Idakla. Samo Cek Leha. Cuman Cek Leha kali ini tampil beda. Kalu bia sonyo besepan atau make' rok, se karang pake' kebaya panjang, jilbab item, sewet motif bemecem-mecem bunga.

Alas kakinyo bukan selop. Tapi se patu bot. Kapan bejalan tedenger cak ini .. kletak kutak .. kletak kutak ...

Samo Mang Kerio naik sepeda un to. Yang embonceng Cek Leha. Wo ng yang enjingok giling-giling palak galo.

Ado yang coment cak ini ... "Ai Mang Kerio, mentang-mentang lebih tuwo, laju ngongkon yang mudo. Perawan pulo .."

Yang lain?

"Ngomong bae mang kalu dak pa cak be sepeda. Dak usah dipakso igo. Yedak .. Yedak."

Kriiiing ...

Kriiing ...

Janganke uwong, cacing lewat bae dikeringke ... Supayo dak teraso pa yah, sambil ngayuh Cek Leha be nyanyi.

Ini dio nyanyiannyo ...

"Alangke lemak jadi lanang
Kemano-mano bekacak pinggang
Dak peduli lintang pukang
Yang penting ati senang .."

Dijawabla oleh Mang Kerio ...

"Kalu aku lemak jadi betino
Katik yang ngelarang kalu nak kemano
Kartu ATM bae ado limo
Laki marah keno goco ..."

Pas simpang tigo. Lampu abang. Sepeda melok berenti.

Cek Leha nyanyi lagi ...

"Alangke lemak makan duku
Dimakan beduwo samo emak
Dak pulo tau lagi buntu
Yang penting makan lemak .."


Kriiiiing ...

Lampu iju. Sepeda bejalan lagi. Nge raso tesinggung, Mang Kerui nyanyi lagi ...

"Nak balik lupo jalan
Akhirnyo duduk parak parit
Jadi betino jangan buyan
Cuman taunyo mintak duit .."

Dibales lagi oleh Cek Leha ...

"Ado apo wong disano
dari tadi rame niyan
Jadi lanang jangan lolo
Cuman tau mintak makan .."

Sesimbat-simbatan. Baru sedieman setelah sepeda zig-zug. Kadang ke kiri, kadang ke kanan.

Dahtu ...

Byuuur ..

Masuk jeru lebak.

Basah galo-galo ...