Mang Kerio (7)

Mang Kerio (7)
Oleh Wak Amin




2. Episode : 'Kemalingan Motor ..'



"TULUNG aku Mang Kerio. Mati aku digebuki laki aku kalu mamang dak biso nolong," kato betino mudo an ak duwo. Sepintas cak masih gadis, keperi cantiknyo.

"Akan mamang usahake. Cuman apo dio yang nak dimintaki tulung tu. Jelas-jelas kalu ngomongtu," uji Mang Kerio sambil neguk banyu kopi siso begadang semalem.

"Kamek keilangan motor Mang .."

"Kapan kejadiannyo dan tau dak kiro-kiro siapo niyan yang ngembeknyo?"

"Kejadiannya semalem. Tengah ma lem Mang, pas aku samo duwo anakku tiduk nyenyak. Aku dak tau siapo yang ngembeknyo. Yang aku tau, pas bangun besok paginyo, motor la ilang ..."

"Laki kau tau?"

"Mako itu Mang. Aku ke sini. Lakiku ke luar kota. Ado gawean. Jadi dio dak tau samo sekali kalu motornyo diembat uwong."

"Tapi awak la enjuk tau kan lewat telepon?"

"Lum Mang. Aku takut."

"Ngapo takut Bik?" Tanyo Cek Leha sambil nawari bolu delapan jam ngawek dewek

"Takut diapo-apokenyo Cek, Mang."

"Diapo-apoke cakmano?"

"Digebukinyo Mang. Masih lemak digebuki. Kadang diterajangke sampe pingsan."

"Sakit dak Bik?"

"Idak jugo Cek. Sudahnyo baru teraso sakit. Bonyok galo-galo."

Ooooo ..

"Kami melok sedih Juane. Tapi ngomong-ngomong kapan laki kau balek dari luar kota?"

"Besok Mang."

"Astaghfirullah Bik. Retinyo cuman sampe malem gek kamek beduwo cari motornya. Kalu dak dapet .."

"Bonyok lagi rainyo bibik." Mato Cek Leha tibo-tibo nyipit sebelah. Dak pulo tau apo maksudnyo.

"Jadi mak ini bae Juane. Kau balek la dulu," kato Mang Kerio," tunggu bae kabar kami dari rumah. Pokok nyo beresla. Doake kami sukses ne muke motor sekalian nangkep yang ngembeknyo."