Mang Kerio (9)

Mang Kerio (9)
Oleh Wak Amin




DEPAN showroom ...

"Mang .. Mang. Jangan diembek Mang. Ini motor aku niyan," kato Zulifan, lanang setengah belagak.

Dio protes motornya nak diembek Mang Kerio ..

"Akutu bukan nak ngembek pona kan. Akutu nanyo bae apo bener niyan nomor polisi motor ini 1243."

"Salah Mang," uji Zulifan sambil nun juk ke nomor motor. "Ini bukannyo 3, tapi 8. Ilang cetnyo bae."

"Mamang dak cayo. Jangan-jangan sengajo awak gesek-gesek supayo dak ketauan kalu motor ini ..."

"Jadi mamang nuduh aku maling motor cak itu?"

"Bukan maling, tapi awak beli di tempat uwong nadah motor hasil maling. Bener dak?"

"Astaghfirullah Mang. Sumpah Mang. Samber gledek Mang. Motor akuni lalamo kubeli. Motor lamo. Caknyo bae bagus karno aku rawat Mang."

Cek Leha nenangke Mang Kerio. Mak itu jugo uwong banyak di de pan showroom.

"Sudah Mang. Malu dijingok uwo ng," uji Cek Leha sambil bebisik su payo dak kedengeran uwong lain.

"Yo. Yo aku tau Leha. Kau tenang bae. Biar aku dewek ngatasinyo," kato Mang Kerio.

Dio parak'i Zulifan yang pecak nak nantang begocoh ...

Mang Kerio ecak-ecak enggulung bajunyo. Yang nonton tegang. Apo lagi waktu si mamang ngentak-ngentakke sepatu barunyo warno item ke tanah.

Ngepeer jugo ruponyo Zulifan.

"Maaf Mang. Bukannyo aku nak ngapo-ngapo. Aku cuman ..."

"Yo mamang taula .."

"Terimo kasih Mang. Kalu mak itu aku boleh pegi yo Mang?"

"Eeeem kagek dulu ponakan," kato Mang Kerio sambil ngeluarke foto motor yang dio cari.

"Kau pernah tejingok dak motor ini?"

Zulifan ketawo ..

"Taula Mang. Samping rumah aku punyonyo kalu dak salah."

"Awak pasati niyan motornya. Kalu awak salah jingok."

"Idak Mang. Idak kenado aku salah jingok. Cayola samo aku Mang. Dak salah lagi kalu motor ini yang di maksud mamang ..."

"Okela kalu cak itu."

"Kalu mamang nak tau rumah aku. Terus bae lurus. Sampe ujung ma mang belok ke kanan. Di sebelah kananni ado rumah kan. Terus ado warung. Tanyo bae disitu. Mano rumah Mang Harun. Pasti uwong tau galo .."

"Mang Harun?"

"Iyo. Ngapo Mang. Mamang kenal?"

"Idak. Terimo kasih ponakan yo. La nyusahi kau."

"Samo-samo Mang ..."